![Vəkil: �Qobustan həbsxanasında Abbas Hüseynova işgəncə verilir�](https://turan.az/resized/./turan-750-500-resize.webp)
Bakı/09.08.17/Turan: "Nardaran işi" ilə bağlı həbs edilmiş, Qobustan həbsxanasında saxlanılan Abbas Hüseynov dəhşətli işgəncələrə məruz qalır. Bu barədə Turan-a vəkil Yalçın İmanov Hüseynovun özünə istinadla məlumat verib.
İşgəncələrdə həbsxana rəisi Aftandil Ağayev, onun müavini Emin Cəfərov, əməkdaşlar İlkin Axundov, Namiq Ağayev və Rövşən, İqbal adlı işçilər və başqaları iştirak ediblər. Bu barədə vəkilə Hüseynov özü avqustun 8-də görüşdə bildirib.
Hüseynov deyib ki, Bakı Apellyasiya Məhkəməsində dindarlara son sözlə çıxış etməyə imkan verilmədiyinə görə onların keçirdiyi etiraz aksiyasından sonra Kürdəxanı istintaq təcridxanasında Hüseynovu 7 günlük karserə salıblar.
Amma iki gün sonra - iyulun 22-də onu və digər məhbus Cabbar Cabbarovu Qobustan həbsxanasına aparıblar. Onları gətirdikdə dərhal qandal taxıblar və asfaltda sürüyüblər.
Hüseynovu, Cabbarovu və daha bir məhbusu üzü divara qoyub qızmar günəş altında saxlayıblar. Hüseynov öz hüquqlarından danışanda ona deyiblər ki, "bura Qobustandır".
Rövşən adlı əməkdaş Hüseynovu göstərərək deyib: "Bu, çox danışır, ona başa salın", bundan sonra gizir İlkin Axundov onu dəyənəklə döyməyə başlayıb. Daha sonra Hüseynovu karserə atıblar. Karserdə saxlanma müddətinin iyulun 25-də başa çatmasına baxmayaraq, Hüseynovu ayın 29-na qədər orada saxlayıblar.
Karserdə vəziyyət dəhşətlidir, yerdə qurdlar, həşəratlar gəzir, yanında unitaz, tamamilə natəmizlik.
Hüseynov namaz qılmaq üçün ona təmiz kağız verməyi xahiş edib, amma bunu da etməyiblər.
İyulun 25-də mayor Namiq Quliyev Hüseynovun qarnına və üzünə yumruq atıb, ona cərəyan verməklə hədələyib və ələ salaraq deyib: "dəyənək məhbusun ayrılmaz dostudur". Hüseynov şikayət edəcəyini bildirdikdə isə mayor deyib ki, "haraya istəyir, şikayət etsin". Bundan başqa guya Hüseynovun cəzaçəkmə müəssisəsi əməkdaşlarını təhqir etməsi haqqında akt tərtib edilib.
Həbsxanada olduğu 17 gün ərzində Hüseynova 4 töhmət verilib. İyulun 26-da onu rəislə görüşmək bəhanəsi ilə karserdən çıxarılıb. Amma həbsxananın həyətində onu dəmir dirəyə bağlayıblar və əllərini qandallayaraq, 3 saat qızmar günəş altında saxlayıblar.
İyulun 29-da karserdə saxlanma müddətinin başa çatmasına baxmayaraq, Hüseynovu "karantində yer olmaması" bəhanəsi ilə karserə qaytarıblar.
Hüseynov bildirib ki, iyulun 29-da "Müsəlman Birliyi" Hərəkatının lideri Taleh Bağırzadə də Qobustan həbsxanasına gətirilib. Onu qonşu kamerada saxlayıblar və o, orada olanları eşidirdi. Bağırzadə nəzarətçi İlkin Axundovdan həkim çağırmağı xahiş etdikdə o, məhbusu təhqir etməyə başlayıb.
Buna cavab olaraq Hüseynov və Cabbarov etiraz ediblər, digər məhbuslar da etirazlara qoşulublar və nəzarətçinin cəzalandırılmasını tələb ediblər. Növbəti gün məlum olub ki, Bağırzadə karserə salınıb. Hüseynovu isə "tubzonaya" (vərəm xəstələri üçün cəzaçəkmə müəssisəsi) göndərməklə hədələyiblər.
Avqustun 5-də "karantin" müddətinin başa çatması ilə əlaqədar Aftandil Ağayev Hüseynovu qəbul edib. Hüseynov qanunsuzluqlar haqqında danışdıqda rəis onun sözünü kəsib və deyib: "bura Qobustandır - hüquqların bitdiyi yerdir".
Bundan sonra Hüseynovu yerə yıxıblar və rəis dəyənəklə onu döyüb. Rəis ona, o cümlədən başına 30-35 zərbə endirib. Bundan sonra Hüseynovu 8 günlük karserə salıblar. Karserdə onu yerə yıxıblar, əllərinə və ayaqlarına qandal taxıblar (faktiki olaraq çarmıxa çəkiblər) və bu vəziyyətdə o, iki gün karserdə saxlanılıb.
Vəkilin sözlərinə görə, Hüseynovun bədənində - kürəyində, ayaqlarında, kürəyinin altında, dizlərində çox sayda travma, qançır var. Biləklərində və ayaqlarında qandal izləri görünür. Hüseynov çətinliklə hərəkət edir, bir ayağı axsayır və otura bilmir.
Avqustun 9-da vəkil işgəncələr haqqında şikayətlə Baş Prokurorluğa müraciət edib.
Hüseynovun karserdə saxlanma müddəti avqustun 13-də başa çatır.
Abbas Hüseynov 2015-ci ilin noyabrında Nardaranda keçirilən xüsusi əməliyyat zamanı saxlanılıb.
2017-ci ilin yanvarında məhkəmə onu ağır cinayətlər törətmək ittihamları - konstitusiya quruluşunu dəyişdirməyə cəhd, terrorçuluq, qətl və s. ittihamlarla 20 il müddətinə azadlıqdan məhrum edib. -06B-
Rəy yaz