Hacı Şahin Həsənlinin ölümünə dair irəli sürülən ehtimallar doğru ola bilərmi? – İlham İsmayıl Çətin sualda

Bakı/02.03.23/Turan: Bu gün  səhər tezdən, ölkənin ən nüfuzlu və populyar din xadimi Hacı Şahin Həsənli qəfil dünyasını dəyişib. Rəsmi məlumata görə, o, ürək tutmasından dünyasını dəyişib.

2013-cü ildə Hacı Şahin Həsənli “Məşədi Dadaş” məscidinin axundu, 2014-cü ildən isə Qafqaz Müsəlmanları İdarəsinin Nəsimi rayonu üzrə səlahiyyətli nümayəndəsi təyin edilib.

Tanınmış ilahiyyatçı, din xadimi Hacı Şahin Həsənlinin vəfat etməsi barədə xəbər ölkə gündəminin əsas müzakirə mövzularından birinə çevrilib. 48 yaşlı Şahin Həsənli Azərbaycanda ali dini vəzifəyə real namizədlərdən biri idi.

Böyük nüfuzu olan bir din xadiminin birdən-birə vəfat etməsi istər-istəməz şübhələrə yol açır. Bu şübhələr barədə ölkə mediası da yazır. Son vaxtlar gərginləşmiş İran-Azərbaycan münasibətlərinin fonunda İranın təsir dairəsində olmayan, eyni zamanda böyük tərəfdar kütləsi olan, dövlətin mövqeyindən çıxış edən bir din xadiminin qəfil ölümünün İranın xüsusi xidmət orqanlarının işi ola biləcəyini ehtimal edənlər var.

Təhlükəsizlik məsələləri üzrə ekspert İlham İsmayıl Kamran Mahmudovun təqdimatında yayımlanan “Çətin sual” verilişində bu barədə danışır.