İstanbul Təbib Palatasının mükafat mərasimi keçirilib

Professor Zeki Kılıçaslan: “Çünki miqrantların arasında azərbaycanlı işçilər də vardı və onlar da xəstəliyə yaxalanacaqdı”

Turan İnformasiya Agentliyinin məlumatına görə, İstanbul Təbib Palatası peşəsinin icrasında 60 ili geridə qoyan tibb alimlərinə, həkimlərə, doktorantura və magistratura tələbələrinə və səhiyyənin vəziyyətini işıqlandıran media nümayəndələrinə mükafatlar verib.14 mart Tibb Günündə jürilər vasitəsilə müəyyənləşdirilən mükafatlar martın 17-də qaliblərə təqdim edilib. Həkimlik peşəsində 60 ili geridə qoyduqlarına görə mükafat alan mütəxəssislər çıxışlarında ömürlərini bu peşəyə həsr etməkdən məmnun olduqlarını bildirib və son illərdə ölkəni tərk edən gənc həkimlərin yaxın vaxtlarda geri qayıtması üçün onlara müraciət ediblər. Səhiyyə sahəsinin problemlərinə dair materiallar hazırladıqlarına görə Türkiyənin bəzi qəzetləri, TV kanalları və internet saytlarının əməkdaşlarına  İstanbul Təbib Palatasının mükafatları təqdim edilib. Mərasimdə İstanbul Universiteti tibb fakültəsinin professoru Zeki Kılıçaslana “Xalq səhiyyəsinin inkişafındakı xidmətlərinə görə” Nusret Fişek “Xidmət mükafatı” təqdim edilib. Dünya miqyasında tanınmış alim, vərəmə qarşı mübarizənin öncül nümayəndələrindən biri professor Kılıçaslan mərasimdən sonra Turan agentliyinə verdiyi açıqlamada deyib:

“İstanbulun kasıb bölgəsində böyümüşəm, oradakı əhalinin problemlərini gördüyüm üçün həkim olmaq istədim. Vərəmlə mübarizəyə o bölgələrdəki insanların əzablarını görəndən sonra başladım. Ölkəmizə gələn miqrantların vəziyyəti də buna əlavə olununca hamının dərdinə çarə tapmağı özümə borc bildim. Türkiyənin xalq səhiyyəsinin təşkili sahəsində Nusret Fişek çox mühüm  şəxs olub. Onun adına təsis edilmiş mükafatı almaq mənim üçün şərəfdir”.

Turan İnformasiya Agentliyinin “Türkiyədə peşə təşkilatlanması çox güclü olduğu halda Azərbaycanda, təəssüf ki, vəziyyət ürəkaçan deyil. Məsələn, bir neçə gün əvvəl bir həkimi sosial media paylaşımına görə işindən çıxardılar. Azərbaycan Həkimlər Birliyi öz müavininin işdən çıxarılmasına səssiz qaldı” sualına professor Zeki Kılıçaslan bu şəkildə cavab verib:

“Bir ölkənin gücü onun toplumunun gücüylə əlaqəlidir. Yəni, təkcə dövlət idarəsi və ya  hərbi idarəçiliklə güclü ola bilməzsiniz. Onlar da olmalıdır. Ancaq ölkəni əsas güclü qılan faktor- xalqın güclü olmasıdır. Burada əsas iş QHT-lərin üstünə düşür. Həkimin işdən çıxarılmasına mən çaşıb qaldım.  Terrora və qarma-qarışıqlığa çağırış etməmək şərtilə hər bir insan öz fikrini sərbəst şəkildə dilə gətirməlidir. Bu, səhiyyə baxımından da mühüm və gərəklidir. Əgər biz 15 il əvvəl Türkiyədəki silikoz-cins şalvar emalatxanalarında çalışan işçilərin haqlarını azad şəkildə müdafiə edə bilməsəydik, həkim kimi onlara yiyə durmasaydıq, çox insan öləcəkdi. Onların arasında azərbaycanlı işçilər də olacaqdı. Çünki miqrantların arasında azərbaycanlı işçilər də vardı və onlar da xəstəliyə yaxalanacaqdı. Biz bu işləri hökumətin əmrilə dayandırmadıq, əvvəlcə mətbuatın gündəminə gətirdik, sonra etiraz aksiyaları keçirdik, lap axırda prezident Abdullah Gül bizi qəbul etdi və daha sonra parlament qanun qəbul edərək o emalatxanaları qadağan etdi. Ona görə Türkiyə kimi bütün türk yurdlarının, respublikalarının gələcəyi azadlıqdan keçir”.