Azərbaycanda sortluq kənd təsərrüfatı malları tapmaq çətindir

Qarpız, kartof, pomidor və s. kimi kənd təsərrüfatı məhsulları yetişdirən təsərrüfatların çoxu GMO toxumlarından istifadə edirlər. Ölkədə ekoloji təmiz və insan üçün təhlükəsiz məhsul istehsal edən təsərrüfat tapmaq çətindir. Belə bir bəyanatla Azad İstehlakçılar Birliyinin sədri Eyyub Hüseynov yayda istehlak bazarının vəziyyətinə həsr edilmiş mətbuat konfransında çıxış edib. 

    «Cin butulkadan çıxıb. GMO 10 ildir sahə və bostanları zibilləyir və bu şərlə qanun vasitəsilə mübarizə aparmaq çətindir», - deyə o bildirib. Onun sözlərinə görə, qadağaya baxmayaraq, Azərbaycana geni modifikasiya edilmiş orqanizmlərin toxumu gətirilir. Dövlət Fitosanitar Xidmətinin fəaliyyətini tənqid edən Hüseynov qeyd edib ki, bu qurumun əməkdaşları işlərinin öhdəsindən gəlmirlər. «Bu yaxınlarda Bakı bazarlarının birində monitorinq zamanı fəallarımız müəyyən ediblər ki, DFX işçilərinin nitritləri yoxladığı cihazlar sertifikatlaşdırılmayıb. Amma bu cihazlar belə kənd təsərrüfatı məhsullarında yüksək zəhər konsentrasiyası müyyən edib». O qeyd edib ki, DFX-nin səyyar laboratoriyaları torpağın analizi üçün sahələrə getmir. 

    Hüseynov hesab edir ki, son iki ildə dövlət istehlak siyasətini yaxşılaşdırmaq üçün bir sıra tədbirlər görüb. İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Xidməti yaradılıb. Mal və xidmət istehlakçısının hüquqlarının qorunmasına yönəlmiş qanunvericilik aktları qəbul edilib. Dövlət başçısı istehlakçıların hüquqlarının müdafiəsi və keyfiyyətsiz mal istehsal edənlərlə mübarizə zərurətini qeyd edib. Bununla belə, Hüseynov istehlak bazarında vəziyyəti “ağır” adlandırıb.