Bu gün xərçənglə mübarizə günüdür

4 fevral xərçənglə mübarizə günüdür. 

Dünya ölkələri bunla bağlı proqram qəbul edir. Tibb Universitetinin rektoru Əhliman Əmiraslanov Turan-a bildirib ki, belə sənəd hazırlanır. «Proqram kompleks yanaşma tələb edir. Orda diaqnostika və müalicə, ətraf mühitin qorunması, rasional qidalanma və s. əksini tapmalıdır. Artıq universitet və parlament komitəsi səviyyəsində monitorinqlər aparılıb», - deyə o bildirir. 

Təəssüf ki, bu xəstəliyə dolayı yolla da olsa səbəb olan ərzaqların cədvəli yaradılmayıb. Onkoloji xəstələrin dəqiq sayı bilinmir. Baş onkoloq Azad Kərimlinin sözlərinə görə, 2012-ci ilin may-sentyabrında 10 rayonda I və II mərhələ 10 min xəstə aşkarlanıb. Ümumən ölkədə bu xəstələrin sayı 100 minə qədər ola bilər. 

Qərb və cənub iqtisadi rayonunda bu xəstəlik çox yayılıb. Çünki tərəvəzçiliklə məşğul olanlar kimyəvi gübrələrə təmas edir. Cənub sakinləri metal bankalarda İrandan gətirilən yağdan geniş istifadə edir. Bu da xərçəngin yaranmasında rol oynayır. 

Ölkədə histologiya üzrə mütəxəssis qıtlığı var. 

Dövlət bu xəstələri bütün dərmanlar və müalicə ilə pulsuz təmin etməlidir. 2013-cü ildə bu məqsədlə 40 mln manat ayrılıb. Amma onkoloji mərkəzdə dərmanların 100 manata satılması halları olub. 

Xəstəliyin ilkin mərhələsində müraciət etdikdə bu xəstəlik Azərbaycanda 100% müalicə edilə bilər. Milli Onkologiya Mərkəzi və Uşaq Onkoloji Mərkəzi ilə yanaşı 7 rayonda onkoloji dispanserlər var. 

Xəstəliyin qarşısının alınması üçün profilaktik tədbirlər lazımdır. Süd vəzi xərçənginin müalicəsi üçün qadınlar mammoqrafiyadan keçməlidir və bu, ən müasir metoddur. Təəssüf ki, rayonlarda xəstəlik kritik həddə çatdırılır. Hökumət maarifçilik işləri aparmalıdır.   

Ümumdünya Səhiyyə Təşkilatının məlumatına görə, qarşıdakı 20 ildə dünyada xərçəng xəstələrinin sayı 70% artacaq. --17D—