İDXAL EDİLƏN TAXIL 100% BAHALANIB

    BAKI/14.09.10/TURAN: İyulun əvvəli ilə müqayisədə Qazaxıstandan idxal edilən taxıl 100% bahalanıb və Azərbaycan sərhədində tonu $270-300-a təklif edilir. Bu, o deməkdir ki, un və çörək-bulka məmulatlarının bahalanması labüddür.
     Azərbaycanın qərb bölgəsində aparıcı dəyirmanlardan birinin təmsilçisinin sözlərinə görə, iyulun əvvəlində Qazaxıstan taxılının tonu $140-a təklif edilib. `Bu gün dəyirmanlarda yetərincə taxıl ehtiyatı var və ona görə istehlak bazarı çörək məhsullarının bahalanmasını xüsusi hiss etmir`, - deyə mənbə bildirdi.
     Avqustun ikinci on günlüyündən Azərbaycanda buğda unu 15-20% bahalanıb. Bu gün 50 kq-lıq un kisəsi 17,5-19 manata satılır.
     Bu il ölkədə taxıl istehsalı azalıb və cəmi 1,85 mln ton yığılıb. Bu, əkin sahələrinin və hektardan məhsulun azalması ilə bağlıdır. Ölkə dəyirmanlarında Turan-a dedilər ki, Azərbaycan taxılının bir çox keyfiyyət göstəriciləri FHN yanında Dövlət Taxıl Fondunun (DTF) tələbinə uyğun gəlmir. Ona görə tələb 500 min ton olsa da, Fondun ehtiyacı üçün az taxıl alınıb.
     FHN DTF üçün yerli taxılın alınması müddətini 1 oktyabradək uzadıb. 3-cü sort taxılın 1 tonu 180 manata alınır. Bu qiymətlə yüksək keyfiyyətli taxıl almaq mümkün deyil. Çünki dəyirmanlar onu 260 manata da ala bilmir, deyə mənbə əlavə etdi.
     Bakı unüyütmə kombinatlarının birində Turan-a dedilər ki, ötən il DTF-nin ehtiyacı üçün alınan taxılın hamısı istifgadə edilib. Hazırda FHN Ələt (həcmi 100 min ton) və Gəncədə (60 000 ton) taxıl anbarları tikintisini başa çatdırır.
     Turan FHN və ya DTF-dən bu il taxıl alınmasının gedişi barədə heç bir məlumat öyrənə bilmədi. 08B .