İnvestorlar QKDK-ya 380 SC-dən şikayət edib

Bu ilin I yarısında Qiymətli Kağızlar üzrə Dövlət Komitəsinə 380 SC-də investorların hüquqlarının pozulması ilə bağlı 166 şikayət məktubu daxil olub. İnvestorların hüquqları ilə bağlı vəziyyət pisləşməkdə davam edir. 

QKDK-nın məlumatına görə, 2012-ci ilin eyni dövrü ilə müqayisədə şikayətlər 43%, şikayət edilən SC-lər 74% artıb. Müəyyən araşdırmalardan sonra 116 şirkətə inzibati cəza təyin edilib. Bu, 2012-ci ilin eyni dövrü ilə müqayisədə 49% çoxdur. SC-lər 24 000 manat cərimələnib. 

QKDK səhmdarların hüquqlarının pozulmasının xarakteri barədə məlumat vermir. Amma məlumdur ki, SC-lərin çoxu (cəmi 1600 dövlət müəssisəsi özəlləşdirilib) Mülki Məcəllədə nəzərdə tutulan elementar hüquqları qorumur. İllik ümumi yığıncaqlar keçirilmir, ümumi yığıncaqlar barədə bildiriş göndərilmir, sənədlər (ümumi yığıncağın protokolu, səhmdarların reyestri, SC-nin nizamnaməsi) səhmdarlara verilmir. «QKDK məhkəmə qaydasında səhmdarların hüquqlarının qorunması üzrə müəyyən hüquqlara baxmayaraq, hüquqi şəxsə inzibati cərimə kəsməklə kifayətlənir, hətta təqsirkarı axtarmır», deyə fond bazarı üzrə ekspert Hafiz Babalı Turan-a bildirib. 

Onun sözlərinə görə, «Qiymətli kağızlar bazarında investorların hüquqlarının qorunması haqqında» 16 iyun 2000-ci il tarixli qanunun 5.1.3 və 5.2 maddələrinə əsasən, QKDK qanunvericiliyi pozanlara qarşı sanksiyalar üzrə konkret informasiyaları ümumi tanışlıq üçün açmalıdır. Amma QKDK bu məlumatları gizlədir və müəyyən dövr üçün ümumiləşdirilmiş məlumat verir. Ona görə investorlar QK bazarında pozuntularla bağlı informasiya mənbəyindən məhrumdur. Bu isə onların hüquqlarının qorunmaması ilə bağlı gərginliyin artmasına gətirib çıxarır, deyə ekspert düşünür.   08B