Vergi amnistiyası hökumətin bəsirətsizliyini göstərdi – ekspert

Hökumət nəinki 5-10 il öncəni görmür, hətta 5 gün qabağı da planlaşdıra bilmir. Vergi amnistiyası təşəbbüsü bunu sübut edir, deyə iqtisadçı Natiq Cəfərli hesab edir.

Turan-ın məlumatına görə, o, Facebook səhifəsində qeyd edib ki, vergi amnistiyası ideyası, ilk baxışdan, çox pozitiv görünür, amma əslində belə deyil.

«Əgər hökumətin belə bir fikri var idisə, büdcə qəbul edilərkən bunu niyə nəzərə almadılar? Cəmi 5 gün əvvəl büdcə qəbul edilib, parametrlər, gəlirlər, xərclər qeyd olunub, həmin silinməli olan 624 mln manat vəsait də vergi proqnozuna daxil edilib, amma indi ayılıblar ki, vergi amnistiyası etmək lazımdır», deyə o qeyd edir.

İqtisadçı hesab edir ki, əvvəl maliyyə amnistiyası elan edilməli, “kölgə iqtisadiyyatı” işıq üzünə çıxarılmalı, korrupsiya və digər yollarla əldə edilmiş maliyyə vəsaitlərinin böyük bir qismi büdcəyə qaytarılmalı, digər hissəsinə amnistiya verilməli və bununla paralel olaraq, vergi amnistiyası da elan edilməli idi.

«Ən əsası isə bütün bunlar siyasi idarəetmə və sistem dəyişikliyindən sonra olur. Maliyyə və Vergi Amnistiyası ilə paralel Lyustrasiya və Reabelitasiya qanunları da qəbul olunmalı, adı korrupsiyada hallanan vəzifəli şəxslər hakimiyyətdən uzaqlaşdırılmalı, uzun illər vətəndaşların əlindən alınan mülkiyyət və digər haqlar reabelitasiya yolu lə onlara qaytarılmalıdır, deyə  N.Cəfərli qeyd edir.

N.Cəfərli qeyd edib ki, həmin silinməli olan 624 mln manat vəsait də vergi proqnozuna daxil edilib. İndi ya parlament bir daha yığışıb büdcəni dəyişməli, ya da o çatışmayan 624 mln manatı biznesmenlərdən yığmalıdır.

Xatırladaq ki, «Vergi Amnistiyası haqqında» qanuna əsasən, vergi ödəyiciləri 2017-ci ilin yanvarında borcun 30%, fevralda 50%, martda 70%-i ödəsə, qalan hissə amnistiyaya düşür. 71D