Xəyali qaz

Qaz ixracatçısı olan Azərbaycanın ciddi narahatlıq doğuran və buna görə də  təcili həllini tələb edən problemlərindən biri son vaxtlar ölkə sakinlərinin evlərində bu qazın olmamasıdır. Bu nə qədər inanılmaz olsa da, fəqət təbii qaz ehtiyatı və onun Avropaya ixrac edilməsi ilə öyünən Azərbaycan məmurları yerli əhalinin "mavi yanacağa" olan tələbatını təmin edə bilmirlər. Necə deyərlər,  "çəkməçi çəkməsiz qalıb".

Azərbaycan KİV-ləri az qala hər gün ölkənin bu və ya digər rayonuna qaz verilməsinin müvəqqəti dayandırıldığı haqda adiləşmiş xəbər dərc edir. Bəzən qaz təchizatında bu fasilələr  saatlarla, hətta günlərlə davam edir. Paradoksal haldır ki, Azərbaycan əhalisinə əzab verən  bu nöqsanlar ola-ola,  ölkə öz qazı ilə Gürcüstandakı erməni kilsələrini isidir.

"Azəriqaz" QSC qazın  kəsilməsini  iki şeylə  izah edir:  profilaktik işlərin aparılması və qəza baş verməsi ilə. Təbii ki bu, sual doğurur: əgər profilaktik işlər aparılırsa, niyə qəza baş verir  və  nə ilə izah etmək olar ki, bəzi yaşayış məntəqələrində qazın təzyiqi o qədər zəifdir ki, bir çaydan su pilətədə  saatlarla qalsa da  qaynamır?

Bu suala "Azəriqaz"ın Mətbuat Xidmətinin rəhbəri İbrahim Kərbalayev  “Aзадлыг” Radiosuna müsahıbəsində cavab verməkdə çətinlik çəkib. Yalnız onu deyə bilib ki, borularda qazın təzyiqi standartlara müvafiqdir: "Hər şey  müəyyən edilmiş standartlara uyğundur. Bu və ya digər rayonda qazın olmamasına gəldikdə, qoy  bu barədə sakinlər "Azəriqaz"ın  müvafiq rayon şöbəsinə məlumat versinlər. Əgər problem varsa, əməkdaşlarımız onu araşdırar və həll edərlər. Əgər haradasa qəza baş verirsə, biz kütləvi informasiya orqanları vasitəsilə insanları qazın dayandırılması barədə xəbərdar edirik", –  deyə o, əlavə edib.

Bununla belə, Neftçilərin  Hüquqlarının Müdafiəsi Komitəsinin rəhbəri Mirvari Qəhrəmanlı “Aзадлыг” Radiosuna bildirib ki: "Qış və ya yay mövsümünün yaşanmasından asılı olmayaraq, sosial şəbəkələrdə mənzillərə qaz verilməsində mövcud olan  problemlərdən çoxlu şikayət edilir".

 "Vətəndaşlarımız  həm qazın 7-8 saat ərzində tamamilə olmaması, həm də borulardan qaz əvəzinə əvvəlcə 15-20 dəqiqə ərzində adi hava gəlməsindən  şikayət edirlər. Bunu ciddi surətdə araşdırmaq lazımdır. Ona görə ki, qaz problemləri üzündən çox adam həlak olur. Söhbət yalnız qazdan zəhərlənmədən  getmir. İnsanlar  qızdırılmayan evlərdə qaz təchizatında tez-tez fasilələr yarandığından  əsəb sarsıntısı keçirirlər.

Qazın dövri surətdə kəsilməsi səbəblərini araşdırmaq, "Azəriqaz”ın məmurlarının sözlərinə görə, qəza baş verdiyi və ya təmir aparıldığı sahələrdə təftiş təşkil etmək  lazımdır. Aydınlaşdırmaq lazımdır ki, hökumətin belə qaz siyasəti kimə sərf edir", – deyə M. Qəhrəmanlı  vurğulayıb.

Lakin Turan İnformasiya Agentliyinin direktoru Mehman Əliyev israr edir ki, qaz kəsilməsi  profilaktik işlər və  qəzalarla bağlı deyil. "Qaz sistemli şəkildə, ardıcıllıqla, növbə ilə bütün rayonlarda kəsilir. Bununla əlaqədar mən Azərbaycan Respublikasının Dövlət Neft Şirkətinin (ARDNŞ) prezidenti Rövnəq Abdullayevə məktub göndərmişəm.  "Azəriqaz" İB-in baş direktorunun  satış və istismar üzrə müavini Ruslan Əliyevdən  cavab almışam.  R. Əliyev, o cümlədən,  Xəzər Rayon Qaz Idarəsinə tapşırıb ki, sakinlərin qazla fasiləsiz təchiz olunması təmin edilsin", – deyə Agentliyin rəhbəri bildirib  və onu da əlavə edib ki, indi  qazı, əvvələr olduğu kimi, cümə günləri yox, artıq çərşənbə axşamları saat 9.00-dan 18.00-dək kəsməyə başlayıblar.

"Bax, bu da problemi belə bir «orijinal» həlli", –  deyə M.Əliyev vürğulayıb.

O həmçinin qeyd edib ki, qazın, bunu əsaslandırmadan, qəza, təmir, yeni abunəçinin qoşulması və s. bu kimi bəhanələrlə kəsilməsi qanun tərəfindən qadağan edilir və qaz təchizatı və istehlakçıların hüquqlarının müdafiəsi haqqında qanunların kobud şəkildə pozulmasıdır, bu, qazın keyfiyyəti və şəbəkədə təzyiqinin aşağı olmasına da aiddir.

"Mən “Azəriqaz”ın 2009-cu ilin iyulunda ARDNŞ-nin strukturuna daxil edilməsini səhv  hesab edirəm. Bu, vəziyyəti heç də yaxşılaşdırmadı, əksinə, daha da pisləşdirdi. Bütün dünyada belə bir təcrübə və hətta  tələb  mövcuddur ki, hasilatçı şirkət qazın satışı və paylanması ilə məşğul ola bilməz. Əks halda, bu, şahidi olduğumuz sui-istifadə halları ilə nəticələnir. Bununla əlaqədar, həmin beynəlxalq təcrübəni Azərbaycanda da tətbiq etməyin və ARDNŞ tərəfindən istehlakçıların hüquqlarının kütləvi surətdə pozulmasına son qoymağın vaxtı çatıb", – deyə Mehman Əliyev vürğulayıb.