Anar Məmmədli: NDİ hökumət təşkilatlarını da maliyyələşdirir
Hakimiyyətyönlü KİV-lərdə ABŞ Milli Demokratiya İnstitutuna (MDİ) qarşı guya bu təşkilatın “rəngli inqilab” hazırlaması ilə bağlı başlamış kampaniya böhtan xarakteri daşıyır və Azərbaycan ictimaiyyətinin aldadılmasına yönəlib. Bu barədə Turan-a Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli bildirib. Bu QHT NDİ-nin tərəfdaşlarından biridir.
Onun sözlərinə görə, NDİ-nin bank əməliyyatları haqqında bank sirri olan məlumatların yayılması bu məlumatın xüsusi xidmətlər tərəfindən verildiyini düşünməyə əsas verir.
Eyni zamanda, bu, Azərbaycanın bank sisteminin imicinə zərbə, ona olan etimadın sarsıdılmasıdır, Məmmədli belə hesab edir.
O, NDİ-nin sosial şəbəkələrin inkişafı üçün proqramlar həyata keçirməsi barədə iddiaları gülünc adlandırıb. Bu proses bütün dünyada gedir və Azərbaycan istisna deyil.
Yeri gəlmişkən, bu təşkilat 8 ildir ki, siyasi partiyalara dəstək proqramları həyata keçirmir. “Və bu hakim Yeni Azərbaycan Partiyasının bu layihələrdə iştirakdan imtina etməsi səbəbindən baş verib. NDİ-nin missiyasi siyasi qüvvələrin geniş spektri ilə işdən ibarət olduğu üçün təşkilat partiyalara dəstək proqramına son qoymaq məcburiyyətində qaldı.
Eyni səbəbdən İRİ (beynəlxalq Respublikaçılar İnstitutu) da partiyalara dəstək proqramını dayandırdı”, deyə Məmmədli bildirib.
Son illər NDİ vətəndaş cəmiyyətinin, o cümlədən gənclər hərəkatlarının inkişafı proqramlarını həyata keçirir. Onlardan biri “Yeni liderlər” layihəsidir. Layihədə müstəqil gənclər təşkilatları, müxalifət və hökumətyönlü qurumlar iştirak edir. Əsas məqsəd müxtəlif siyasi baxışlara malik şəxslərin dialoquna yardım göstərməkdir. NDİ təkcə müstəqil gənclər təşkilatlarına deyil, həm də hökumətyönlü təşkilatlara kiçik qrantlar verir.
Məmmədli həmçinin NDİ yerli əməkdaşı Ruslan Əsədə qarşı basqının və etiraz mitinqi zamanı onun saxlanılması ilə bağlı spekulyasiyaların əsassız olduğunu bildirib.
Əsəd aksiyada Azərbaycan vətəndaşı kimi iştirak edib.
NDİ-yə ləkəyaxma kampaniyasının məqsədi vətəndaşları siyasi fəallıqdan çəkindirmək və etirazlar təşəbbüslərinin xaricdən gəlməsi haqda fikir yaratmaq məqsədi daşıyan siyasi şoudur.
Xatırladaq ki, jurnalist Eynulla Fətullayev martın 10-da haqqin.az saytında “Azərbaycanda “facebook” inqilabı üçün 2 milyon dollar” adlı məqalə dərc edib.
Məqalədə deyilirdi ki, NDİ nümayəndəsi Azərbaycanın gənclər təşkilatları ilə digər postsovet ölkələrində həyata keçirilmiş “rəngli inqilablar” ssenarisi əsasında inqilab hazırlanması üzrə işləyir. Bu zaman NDİ-nin bu məqsədlə böyük məbləğdə nağd vəsaitdən istifadə etdiyi iddia edilirdi.
Bundan sonra sanki göstəriş əsasında bir çox hökumətyönlü KİV-lər sözügedən məqaləyə əsaslanaraq, NDİ-yə hücuma keçib. ABŞ səfirliyi NDİ-nin ünvanına səslənən ittihamları təkzib edib. İnstitut özü hələlik şərh vermir. -06B-
Rəy yaz