Azərbaycan Kullarda həbs edilmiş vətəndaşlarının taleyi ilə məşğul olmur

Bakı/30.06.20/Turan: Azərbaycan hakimiyyəti başqa ölkələrdəki vətəndaşlarının, o cümlədən Dağıstanın Kullar qəsəbəsində çadır düşərgəsindəki yüzlərlə insanın qayıtması yolundakı maneələri aradan qaldırmalıdır. Həmçinin, iyunun 15-də bu məntəqədə etirazlardan sonra cinayət ittihamları ilə həbs edilmiş şəxslərin hər cür hüquqi müdafiəsi təmin edilməlidir. İyunun 28-də Reportyorların Azadlıq və Təhlükəsizlik İnstitutunun (RATİ) vətəndaş cəmiyyəti fəallarının iştirakı ilə təşkil etdiyi videokonfransda səslənən əsas fikir bundan ibarət idi.

Görüşdə qeyd edilib ki, həbs edilənlər insanların başı Vətənə qaytarılmasını gecikdirən Azərbaycan hakimiyyətinin əməlləri səbəbindən bəlaya düşüb. Buna görə dövlət onları müdafiə etməlidir, Azərbaycanın RF-dəki konsulluq xidmətləri isə bu insanlara hüquqi yardım göstərilməsi ilə məşğul olmalıdırlar.

Dağıstanda həbs edilənlərə qarşı RF CM-in 318-ci (hakimiyyət nümayəndəsinə qarşı zorakılıq), habelə 167-ci (başqasının əmlakını qəsdən məhv etmə) maddələri ilə ittiham irəli sürülüb. Onları 10 ilədək azadlıqdan məhrumetmə cəzası gözləyir.

RATİ direktoru Emin Hüseynovun sözlərinə görə, Rusiyada, Dağıstanda hüquq müdafiəçiləri, vəkillər onların səsinə səs verib, onlar həbs edilmiş şəxslərə kömək etməyə hazırdırlar. Belə ki, Dərbəndli vəkil, əslən Azərbaycanlı olan Murad Vəlixanov həbs edilmiş şəxslərin müdafiəsini öz üzərinə götürməyə hazır olduğunu təsdiq edib. Amma bunun üçün onlarla saziş bağlanmalıdır. “Yaxşı olardı ki, sazişi yaxın qohumları bağlasın. Bu halda biz dərhal işə başlaya bilərik. Hətta sazişləri başqa şəxslər imzalasalar belə, həbs edilənlərin özlərinin də razılığını almaq lazımdır, deyə Vəlixanov bildirib.

“Siyasi iradə, ictimai rezonans olsa, cinayət işinə xitam verilməsi məsələsi məhkəməyə qədər həll edilə bilər və ya ən pis halda şərti cəzaya nail olmaq olar. Ümumilikdə bu insanların cinayət törətmək niyyəti olmayıb. Onlar evlərinə buraxılmayan yolçudurlar, bu da əsəblərinin pozulmasına səbəb olub”, deyə Vəlixanov bildirib.

Görüşdə qeyd edilib ki, Azərbaycan hökuməti ilk gündən bu Azərbaycan vətəndaşlarının problemlərinin həllindən uzaqlaşıb.

Sahibkarlar Süleyman Kərimov, Qod Nissanov və işgüzar dairələrin və diasporun digər nümayəndələri kömək göstərilməsi ilə məşğul olmağa başlayıblar.

Azərbaycan tərəfi polisin etirazçılara qarşı sərt güc tətbiq etdiyi 15 iyun hadisələrindən sonra güc qurumlarının nümayəndələrini oraya göndərib, amma onlar heç nəyi əsaslı şəkildə həll etməyiblər.

Müzakirə iştirakçıları qeyd ediblər ki, Dağıstan sərhədindəki düşərgə ləğv edilməli, oraya gələnlərin hamısı isə Azərbaycan tərəf yerləşdirilməlidir.

Bundan başqa, yeni sayt yaradılmalıdır, hansı ölkədən gəlmlərindən asılı olmayaraq, Vətənə qayıtmaq istəyənlər hamısı orada qeydiyyatdan keçməlidir və dövlət bu insanlara kömək etməlidir.

Azərbaycan vətəndaşlarının Vətənə qayıtmasına maneələr yaradılmasının Avropa İnsan Hüquqları Konvensiyasına zidd olduğu qeyd edilib. Konvensiyanın 3-cü maddəsində deyilir ki, “Heç kim vətəndaşı olduğu dövlətin ərazisinə giriş hüququndan məhrum edilməməlidir”. -06D-