Azərbaycan MSK məhsullarının ixracını artırır

Bakı/19.01.18/Turan: 2016-cı illə müqayisədə ötən il Azərbaycan müdafiə təyinatlı məhsulların ixracını 2,3 dəfə artırıb. Bu barədə cümə günü ölkənin müdafiə sənayesi naziri Yavər Camalov bu idarədə keçirilən müşavirədə bildirib.

Müdafiə Sənayesi Nazirliyi ölkə silahlı qüvvələrinin sifarişini yerinə yetirməklə yanaşı, 10-dan çox ölkəyə məhsul ixrac edir. İstehsal həcmi 2016-cı il ilə müqayisədə 10% artıb.

Belə ki, ötən il "Yalquzaq" snayper tüfənginin, müxtəlif mm-lik minaatanların, müxtəlif mm-lik əl qumbaraatanının, zirehli texnikalar üçün tüstü qumbaraatan qurğusunun və tüstü qumbarasının, KXP tipli optik kollimatorun, qəlpəli minalı atəş yığımının və F-1 tipli əl qumbarasının seriyalı istehsalı təşkil olunub, deyə o bildirib.

2017-ci ildə nazirliyin müəssisələri yeni MSK məhsulu növləri istehsal etməyə davam ediblər.

Xüsusən, 136 adda müdafiə təyinatlı məmulatın yaradılması istiqamətində təcrübə işləri aparılıb.

Yaxın gələcəkdə iki yeni zavodun açılması nəzərdə tutulur.

Hazırda Müdafiə Sənayesi Nazirliyinin tabeliyində 56 müəssisə var, deyə Camalov qeyd edib. -05D06-