Azərbaycanda Senatın Qarabağa dair qərarına reaksiya

Bakı/26.11.20/Turan: Noyabrın 25-də Fransa Senatı Dağlıq Qarabağda separatçı rejimin dövlət kimi tanınmasına dair qətnaməni demək olar ki, tam tərkibdə qəbul edərək ölkə hökumətinə Dağlıq Qarabağı tanımağı təklif edib.

Fransa XİN yanında dövlət katibi Jan-Batist Lemuan sənədin qəbulunu şərh edərək bildirib ki, Parisin Qarabağın müstəqilliyini tanıması heç kimə fayda verməyəcək, o xatırladıb ki, bu addımı atmağa heç Ermənistan özü  belə qərar verə bilməyib.

Rəsmi Bakı və ekspertlər dərhal reaksiya veriblər.

"Qətnamə tövsiyə xarakteri daşısa da Senat Fransaya qarşı münasibətə güclü zərbə vurdu. Orada Azərbaycan xalqının nifrətini qazanmış yalançı, satqın və vicdansız siyasətçilər idarə edirlər ", - Milli Məclisin deputatı Elxan Ələsgərov sosial şəbəkələrdə yazır.

Analitik Vüqar İsmayılov (Sankt-Peterburq) Fransa senatorlarının hərəkətlərində ardıcıllığın olmadığını qeyd edib: Qarabağda Azərbaycan Ordusu tərəfindən məğlub edilmiş erməni rejimini "dövlət" kimi tanıyıb. Eyni zamanda Paris Gürcüstan, Moldova və Ukraynadakı analoji separatçı rejimi də görməzdən gəlib.

"Fransanı ATƏT-in Minsk Qrupundan qova bilmərik, çünki onu biz formalaşdırmamışıq. Minsk Qrupunun tərkibini ATƏT onun bütün üzvlərinin konsensusuna əsasən formalaşdırıb. Biz ATƏT- in sammitində bəyan edə bilərik ki, münaqişə öz həllini tapıb (qoy, bəziləri bununla razılaşmasın), ona görə də Minsk Qrupunun işində iştirak etməyəcəyik", - İsmayılov yazır.

O, Türkiyə sülhməramlı kontingentinin regiona daxil edilməsinə nail olmağı vacib sayır. Üstəlik, Türkiyə kontingenti, sadəcə, haradasa Pirallahı adasında yerləşən stasionar-monitorinq ofisinə malik olmamalı, mobil, hərəkətli olmalıdır.

Sülhməramlıları dəvət edib-etməmək Bakının müstəsna suveren hüququdur (Parisin rəyi əhəmiyyətsizdir), eyni zamanda onun missiyasının və arealının təyin olunması da. Bu dəfə saziş birtərəfli ola bilər, Ermənistan olmadan, çünki dekabrın 1-dən onun formal olaraq münaqişə tərəfi olmasına son qoyulur.

İsmayılovun fikrincə, Azərbaycanın Dağlıq Qarabağın daxili hissəsi üzərində suverenliyi rəsmən Kreml tərəfindən tanınıb,  deməli, Moskva Qarabağda Türkiyə kontingentinin olması ilə barışmalı olacaq, İsmayılov hesab edir.

Politoloq Fərhad Məmmədov da hesab edir ki, Fransanı ATƏT-in Minsk Qrupunun həmsədrlərindən çıxarmaq lazımdır. ABŞ və Rusiya qalacaq. Korsikanın müstəqilliyini, Yeni Kaledoniyanın Fransadan müstəqilliyini və Fransa tərəfindən  əlcəzairlilərin soyqırımını da tanımaq olar. -0-