Azərbaycandakı ekspertlər Gürcüstanda baş verən son hadisələr barədə

Gürcüstan parlamentinin "Xarici təsirin şəffaflığı haqqında" qanunu qəbul etməsi və buna qarşı aramsız kütləvi etirazlar Azərbaycanda siyasi ekspertlər tərəfindən fəal müzakirə olunur.

Cənubi Qafqaz Araşdırmalar Mərkəzinin rəhbəri Fərhad Məmmədov hesab edir ki, qonşu ölkədə baş verən hadisələr regionda qüvvələrin ümumi bölgüsünə təsir göstərə bilər.

Gürcüstan 44 günlük müharibənin nəticələrinin - Ermənistan-Azərbaycan və Ermənistan-Türkiyə normallaşması, kommunikasiyaların açılması - reallaşmasından uzun müddət kənarda qala bilməzdi.

"Gürcüstana Avropa İttifaqı  üzvlüyünə namizəd statusunun verilməsi regionda Qərb məhvərinin yaradılmasında maraqlı olmayan xarici aktyorları hərəkətə gətirib.

Bununla yanaşı, hakim partiya vəziyyətdən istifadə etməyə çalışır. Azərbaycan üçün proqnozlaşdırıla bilən, müstəqil və subyekt Gürcüstan vacibdir", - Məmmədov sosial şəbəkədə yazıb.

İqtisadçı Rövşən Ağayev Qərb siyasətçilərinin Tbilisidə inanılmaz fəallığını qeyd edir və 10 il əvvəl Azərbaycanda vətəndaş cəmiyyətinin Milli Məclisin dünən Gürcüstanda qəbul ediləndən daha mürtəce qanun qəbul etməsinə necə soyuq reaksiya verdiyini xatırlayır. Demokratik dünya da Azərbaycan qanununun qəbul edilməsinə zəif reaksiya vermişdi.

"Məsələ təkcə Qərbin Azərbaycana və Gürcüstana fərqli münasibətində deyil. Mühüm odur ki, Azərbaycanda tərəqqiyə və demokratiyaya can atan azsaylı qüvvələr müdafiəsizdirlər" - Ağayev Qərbin gürcü demokratlara dəstəyini qiymətləndirərkən deyib.

Siyasi ekspert Şahin Cəfərli Gürcüstanı Avropa İttifaqının demokratiya, insan hüquqları, məhkəmələrin müstəqilliyi, ədalətli seçkilər haqqında 9 şərtini yerinə yetirməkdən imtina edən milyarder Bidzina İvanişvilinin iqtisadi layihəsi adlandırıb.

"İvanişvili Avropa İttifaqına təklif edir ki, bu ölkəni olduğu kimi öz sıralarına qəbul etsin. Sahibilə birlikdə. Şübhə yoxdur ki, İvanişvili qapalı rabitə kanalları vasitəsilə Moskva ilə aktiv ünsiyyət qurur", - ekspert deyib.

Cəfərlinin fikrincə, avrointeqrasiya Gürcüstan xalqının "qırmızı xətti"dir və cəmiyyət hökumətin bu xətti keçməsinə imkan verməyəcək.

Azərbaycan Xalq Cəbhəsi Partiyasının sədri Əli Kərimli qardaş gürcü xalqına öz mübarizəsində qələbə arzulayıb və Azərbaycan hakimiyyətini qonşu ölkədə baş verənlərdən nəticə çıxarmağı təklif edib.

"Biz xalq olaraq başa düşməliyik ki, bütün problemlərimizin həlli xalqın demokratiya uğrunda dinc mübarizədə ümumi iştirakı olmadan,  vətəndaş cəmiyyətinin fəal və məsuliyyətli mövqeyi olmadan mümkün deyil".