Gürcüstan XİN-in Rusiya işğalının 9-cu ildönümü ilə bağlı bəyanatı

Bakı/08.08.17/Turan: Gürcüstanın Azərbaycandakı səfirliyi bu ölkəyə qarşı aqressiyanın, Abxaziya və Sxinvali regionunun işğalının 9-cu ildönümü ilə bağlı Gürcüstan XİN-in bəyanatını yayıb.

"2008-ci il avqust müharibəsindən 9 il sonra Rusiya atəşkəs haqda 12 avqust 2008-ci il tarixli sazişi pozmaqda davam edir, beynəlxalq hüquq prinsiplərini pozaraq suveren dövlətin faktiki anneksiyası siyasətini davam etdirir", - bəyanatda deyilir.

Bu cür hərəkətlər Abxaziya və Sxinvali regionunun Rusiyanın hərbi, siyasi, iqtisadi və sosial sisteminə qanunsuz inteqrasiyasına gətirib çıxarıb. İşğal edilmiş ərazilərdə hərbi bazalar yaradılıb, müxtəlif süni sərhədlər qurulub.

İşğal xətti boyunca müntəzəm oğurlanma, qanunsuz saxlanma halları baş verir, sakinlərin öz ərazisinə girməsi məhdudlaşdırılır.

"Gürcüstan əhalisinin etnik diskriminasiyası, onların fundamental hüquqlarının pozulması davam edir.

Öz evlərində yaşayan bu adamlara əcnəbi kimi yanaşırlar", - bəyanatda qeyd olunur.

Gürcüstan tərəfdaş ölkələrin onun mövqeyini dəstəkləməsini, öz ölkəsinin suverenliyini və ərazi bütövlüyünü, həmçinin münaqişənin beynəlxalq hüquq norma və prinsipləri çərçivəsində həlli ilə bağlı bu dövlətlərin və beynəlxalq təşkilatların səylərini yüksək qiymətləndirir.-02D-