İljham Əliyev: Sülh istəyirlərsə, torpaqlarımızdan çıxmalıdılar

Bakı/01.08.18/Turan: "...Bəlkə də dünyada öz vətəndaşlarına bu qədər qayğı və diqqət göstərən ikinci ölkə yoxdur".

Avqustun 1-də müharibə əlillərinə, şəhid ailələrinə ev, mənzil verilməsi mərasimindəki çıxışında prezident İlham Əliyev belə deyib. AZƏRTAC-ın məlumatına görə, prezident ölkəiqtisadiyyatının inkişafda olduğunu vurğulayıb.

"Gələn il daha yaxşı nəticələr olacaq. Artıq ilkin proqnozlar verilib. Gələn il sürətli inkişaf ili olacaq. Beləliklə, maliyyə imkanlarımız daha da genişlənəcək və ölkə qarşısında duran əsas vəzifələrin, infrastruktur layihələrin, eyni zamanda və ilk növbədə, sosial məsələlərin həlli üçün biz bu vəsaitdən istifadə edib sizin problemlərinizi həll edəcəyik", deyənİ.Əliyev Dağlıq Qarabag münaqişəsinin tənzimlənməsindən, Ermənistandakı son siyasi gəlişmələrdən də bəhs edib. O, münqaişənin bir həll yolunun olduğunu vurğulayıb.

"Ölkəmizin ərazi bütövlüyü bərpa edilməlidir. Dağlıq Qarabağ bizim əzəli tarixi torpağımızdır. Bunu tarix deyir, beynəlxalq hüquq deyir və bütün dünya dövlətləri ölkəmizin ərazi bütövlüyünü tanıyır və dəstəkləyir", deyən prezident Ermənistanın ağır günlər yaşadığını ifadə edib.

"Azərbaycan Ermənistandan sülh çağırışlarını eşidir"

"İyirmi il Ermənistana rəhbərlik etmiş kriminal xunta rejimi çökdü. Onların işğalçı siyasəti iflasa uğradı. Onların bu vəziyyətə düşməsinin əsas səbəbi işğal siyasətidir. Çünki əgər işğal siyasəti olmasaydı, Ermənistan regional layihələrdən təcrid edilməyəcəkdi və beləliklə, bizim imkanlarımızdan faydalana bilərdi. Məhz işğalçılıq siyasətinə görə Ermənistan bu gün bu ağır, təcrid edilmiş vəziyyətdədir və iqtisadi inkişaf üçün heç bir perspektiv yoxdur. O vaxta qədər ki, Azərbaycanla münasibətlər normallaşmayacaq. Normallaşmanın da bir yolu var - işğalçı dövlət bizim torpaqlarımızdan dərhal və qeyd-şərtsiz çıxmalıdır".

İ.Əliyev bu durumu Ermənistanın yeni hökumətinin yaxşı başa düşməli olduğunu qeyd edib.

"Əvvəlki kriminal xunta rejiminin səhvlərini buraxmamalıdır. Düzdür, yeni hökumət indi daxili işlərlə daha çox məşğuldur, ancaq bildirməliyəm ki, onlar tərəfindən səslənən ziddiyyətli bəyanatlar həm bizdə, həm bu məsələ ilə məşğul olan ölkələrdə və beynəlxalq təşkilatlarda təəccüb doğurur. Çünki bir-birini təkzib edən bu bəyanatlar başadüşülən deyil", deyən İ.Əliyev bir-birinə zidd olan belə bəyanatların sülh prosesinə vurulmuş növbəti zərbələr olduğunu qeyd edib.

İ.Əliyev Ermənistandan sülhə yönəlmiş çağırışların da edildiyini, Azərbaycanın bu çağırışları eşitdiyini ifadə edib.

"Biz də sülh istəyirik, amma biz torpaqlarımızı istəyirik. Torpaqlarımız qayıtmayana qədər sülh olmayacaq və Ermənistanın yeni rəhbərliyi bunu çox yaxşı başa düşməlidir. Sülh istəyirlərsə, erməni əsgəri torpaqlarımızdan çıxmalıdır. Erməni əsgərinin Azərbaycan torpağında nə işi var?! Müharibədən əziyyət çəkmiş, həlak olmuş, əlil olmuş Azərbaycan vətəndaşları öz torpağında həlak olublar, əlil olublar, Ermənistan torpağında yox. Ona görə münaqişənin həllinin bir yolu var - işğalçı qüvvələr bizim torpaqlarımızdan dərhal və qeyd-şərtsiz çıxarılmalıdır. Onda bölgədə sülh yaranar. Onda Ermənistan ilə Azərbaycan arasında əlaqələr yarana bilər", prezident deyib.

İ.Əliyev Azərbaycanın öz siyasətindən əl çəkməyəcəyini vurğulayıb.

O, çıxışının sonunda vurğulayıb ki, "Ermənistan rəhbərliyi bilməlidir ki, sülh istəyirsə torpaqlarımızdan öz xoşu ilə çıxmalıdır".--0-