İrandan qaçan fəal Azərbaycanda öz təhlükəsizliyinə görə narahatdır

İrandan qaçan fəal, etnik azərbaycanlı Puya Purhemməti Azərbaycanda uzun müddət qalmasını təhlükəli hesab edir. O, İrana deportasiya olunacağından və ya İranın xüsusi xidmət orqanları tərəfindən qaçırılacağından ehtiyat edir.

Purhamməti "Amerikanın səsi" radiosunun Azərbaycan xidmətinə bildirib ki, sərhədi qanunsuz keçdiyi üçün Azərbaycan məhkəməsi onu cərimələyib. “Prokuror mənə 1,5 il həbs istədi. Lakin məhkəmə 3000 manat cərimə kəsdi və mənim məhkəməyədək həbsdə qaldığım 3 aylıq müddətlə kompensasiya etdi”, - Purhemməti deyib.

Sonra prokurorluq qərardan protest verib, lakin Apellyasiya Məhkəməsi hökmü qüvvədə saxlayıb.

İran vətəndaşı Azərbaycanda özünü təhlükədə hiss etdiyini və üçüncü ölkəyə getmək istədiyini bildirib. "Birincisi, Azərbaycan üçün problem olmaq istəmirəm və üçüncü ölkəyə getmək üçün humanitar viza almağa köməklik göstərməyi xahiş etdim. İran səfirliyi məni açıq təhdid edir. Bakıdakı ünvanını bilirlər. Ona görə məcbur qalıb yaşadığım ünvanı dəyişdim”, - o deyib.

İran pasportunu almaq üçün İran konsulluğuna İran müraciət edib, çünki onsuz heç bir yerə gedə bilməz. “Konsulluğa müraciət etdiyim zaman məni tutub İrana aparacaqları və ya fiziki cəhətdən ortadan qaldıracaqları ilə hədələdilər", - Purhemməti deyib.

O hesab edir ki, onun İrana qaytarılması edam edilməsi olar. “Bunu dəqiq bilirəm. İran hökuməti məni orada casus kimi ittiham etmək istəyirdi. İndi də Azərbaycana casusluqda ittiham edəcəklər və öldürəcəklər", - Purhemməti əmindir.

İran dissidentlərindən birinin Azərbaycanda oğurlanması ilə bağlı İran KİV-də yayılan xəbərlərdən sonra onun narahatlığı daha da artıb. "Bu yaxınlarda SEPAH - a yaxın media bildirdi ki, Azərbaycanda siyasi fəal qaçırılıb və gizli şəkildə İrana aparılıb", - o qeyd edib.

Purhemməti humanitar viza alması üçün Birləşmiş Millətlər Təşkilatının Qaçqınlar üzrə Ali Komissarlığının ofisinə, Beynəlxalq Qızıl Xaç Komitəsinin Bakı nümayəndəliyinə, ABŞ və digər ölkələrin səfirliklərinə müraciət edib.

“Birləşmiş Millətlər Təşkilatının Qaçqınlar üzrə Ali Komissarlığında bildirdilər ki, 2020-ci lldən onlar bu işlərlə məşğul olmur. Mənə yalnız hüquqi cəhətdən kömək edə bilərlər.

Beynəlxalq Qızıl Xaç Komitəsi də bu işlərlə məşğul olmadığını bildirdi. Səfirliklərdən isə hələ bir cavab almamışam”, - o deyib.

“Müdafiə xətti” hüquq- müdafiə təşkilatının icraçı direktoru Rüfət Səfərov bildirib ki, şəxsin vətəndaşı olduğu ölkədə məruz qaldığı hüquqazidd təqiblərdən yaxa qurtarması üçün sığınacaq hüququ var.

“Milli və beynəlxalq qanunvericilik sığınacaq hüququnu tənzimləyir. Azərbaycan konstitusiyanın 70-ci maddəsi siyasi sığınacaq hüququnu tənzimləyir. Həmin maddənin tələblərinə görə, Azərbaycan əcnəbilərə və vətəndaşlığı olmayan şəxslərə siyasi sığınacaq verir. Siyasi əqidəsinə görə, habelə Azərbaycanda cinayət sayılmayan əmələ görə təqib edilən şəxslərin başqa dövlətə verilməsinə yol verilmir”, -  Səfərov qeyd edib.

Onun sözlərinə görə, Purhemməti İranda dinc aksiyalarda iştirak edib və buna görə edam cəzası təhdidi altında olub.

“O, ölümdən xilas olmaq məqsədilə Azərbaycan-İran sərhədində ağ bayraq qaldırıb, Azərbaycan tərəfindən sığınacaq istəyib ki, bu da beynəlxalq humanitar hüququn və milli qanunvericiliyimizin tələblərinə tam uyğundir. Lakin təəssüf ki, onun barəsində cinayət təqibi həyata keçiriblər, üstəlik 3 ay həbsdə saxlayıblar, sonra isə cərimələyiblər”, - o deyib.

Birləşmiş Millətlər Təşkilatının Qaçqınlar üzrə Ali Komissarlığının Azərbaycan nümayəndəliyi təsdiq edib ki, bu qurum yalnız hüquqi yardımla kömək edə bilər. Nümayəndəlik digər şərhlərdən çəkinib.

ABŞ səfirliyindən "Amerikanın səsi" radiosunun Azərbaycan xidmətinə bildiriblər ki, "viza məsələləri məxfi xarakter daşıyır".

“Buna görə də biz fərdi viza işlərinin təfərrüatlarını müzakirə edə bilmərik”, səfirlikdə deyiblər.

Azərbaycan Dövlət Miqrasiya Xidmətində şərh almaq mümkün olmayıb.