Jurnalist olmaq istəyənlər imtahan verəcək

Bakı/01.08.18/Turan: Ali təhsil müəssisələrinin jurnalistika ixtisasına qəbul olmaq istəyən abituriyentlər avqustun 6-da qabiliyyət imtahanı verəcəklər.

Dövlət İmtahan Mərkəzinin məliumatına görə, jurnalistika ixtisasına qəbul olmaq istəyənlər bu günün sonunadək qeydiyyatdan keçməlidilər.

Qeydiyyatdan keçən abituriyentlər test imtahanının nəticələrinə əsasən müvafiq müsabiqə şərtlərini ödəməlidilər. Onların topladıqları ümumi bal 200-dən çox olmalıdır. Bu şərti ödəyənlər gələn həftə təqdim olunan mövzu üzrə yazı işi (inşa) yerinə yetirməlidilər.

Tələbə qəbulu ilə bağlı imtahanda iştirak üçün ilk dəfə müraciət edənlər üçün cari ildə "Jurnalistika" ixtisası üzrə yazı işində iştirak pulsuz, dövlət büdcəsinin vəsaiti hesabına olacaq. Digır abituriyentlər isə imtahana görə, ödəniş etməlidir.

DİM qabiliyyət imtahanı mərhələsində təklif olunacaq inşa mövzularını, onlara tələbləri də açıqlayıb.

Qabiliyyət imtahanları adətən, Bakı, Naxçıvan, Gəncə, Lənkəran, Şəki, Bərdə, Göyçay, Xaçmaz və Şirvan şəhərlərində təşkil edilir. 2.5 saat davam edən qabiliyyət imtahanlarına qatılan abituriyentlər seçilmiş 3 mövzudan biri üzrə inşa yazırlar.

DİM hələlik imtahanların keçiriləcəyi ünvanları açıqlamayıb.--0--