Müsavat Partiyası amnistiya aktının ayrı-seçkiliyə xidmət etdiyini bildirir

Müsavat Partiyasının Divanı bazar ertəsi növbəti toplantısını keçirib. Bu haqda Turan-a partiyadan bildirilib. 

Toplantıda partiyadaxili məsələlər, seçkilərə hazırlıq, ictimai-siyasi duruma dair müzakirələr aparılıb. 

Divan partiyanın bir sıra rayon təşkilatlarının partiya başqanının həbsdə olan müavini Tofiq Yaqublu, REAL sədri İlqar Məmmədovun və həbsdəki N!DA Vətəndaş Hərəkatı üzvlərinin azadlığa buraxılması tələbilə bağlı mayın 5-də Atatürk bağında keçirilən flaşmobu bəyəniblər, təşkilatçılara təşəkkür ediblər. 

Prezidentliyə namizəd İsa Qəmbərin Mərkəzi Seçki Qərargahının (MSQ) rəhbəri Arif Hacılı seçki qərargahının fəaliyyət proqramını Divana təqdim edib. Divan fəaliyyət proqramını təsdiqləyib. Seçki qərargahının tərkibinin genişləndirilməsi təklif verilib və təklif qəbul olunub. 

Divan məhkəmə cərimələrini ödəməyən aksiya iştirakçılarının ictimai işlə cəzalandırmasını əsassız sayaraq etiraz edib. Aprelin 30-da keçirilən aksiyaya görə sutkalıq həbsə məhkum olunan gənc fəallara qəzet, kitab və ərzaq verilişinə yasaq qoyulması insan hüuqularının kobud şəkildə pozulması adlandırılıb. 

Toplantıda AXCP fəallarının Şəkidə keçirilən toplantısına tətbiq olunan polis zorakılığı pislənilib. Tətbiqi gözlənilən amnistiya aktının siyasi ayrı-seçkilik mexanizminə çevrildiyi iddia edilir. 

Divanda iqtidarın sosial şəbəkələrdə yazılan yazılara görə cinayət işi açılmasına dair qanun layihəsi hazırladığı, bu layihəni Milli Məclisin müzakirəsinə çıxarmağa hazırlaşdığı deyilir. Bundan başqa, “Azercell” və “Bakcell” mobil operatorlarının “facebook” sosial şəbəkəsindən ödənişsiz istifadəni dayandırdığı qeyd olunub. Divan sözügedən şirkətlərin də siyasi sifariş alətinə çevrildiyini bildirib. Bu qanun layihəsinin və mobil rabitə vasitələri ilə sosial şəbəkələrə ödənişsiz çıxışın dayandırılması cəmiyyətin fəal kəsimini çəkindirməyə hesablanan addım kimi qiymətləndirilib.

Ölkə Baş Prokurorunun təşəbbüsü ilə Milli Məclisə təqdim olunan İnzibati Xətalar Məcəlləsinə əlavə və dəyişikliklər layihəsinə əsasən, sərbəst toplaşma azadlığına görə nəzərdə tutulan cəzaların artırılması, xüsusilə inzibati həbs müddətinin 15 gündən 60 günə qaldırılması, polis işçisinin tələbinə tabe olmamağa görə inzibati həbsin 15 gündən 30 günə qədər artırılması iqtidarın cəmiyyətin fəallaşmasından çəkinməsi kimi qiymətləndirilib. -05D-