POLİS PREZİDENT ADMİNİSTRASİYASININ QARŞISINDA ETİRAZ AKSİYASININ KEÇİRİLMƏSİNƏ İMKAN VERMƏYİB

    BAKI/30.08.10/TURAN: Bu gün saat 13.00-a yaxın Binəqədi rayonunun 50-yə yaxın sakini evlərinin sökülməsinə etiraz olaraq Prezident Administrasiyasına gəlib. Prezident Administrasiyasının qəbul otağının qarşısında polis dəstələri onları saxlayaraq avtobuslara əyləşdirib və Binəqədi rayon İcra Hakimiyyətinə yola salıb. Bu barədə Turan-ın müxbiri hadisə yerindən məlumat verib.
     Polis şikayətçilərin jurnalistlərlə danışmasına imkan verməyib və aksiyanı çəkən bir neçə jurnalisti saxlayıb.
     Vətəndaşların narazılığına onların evlərinin sökülməsi və Binəqədi qəbiristanlığının köçürülməsi, bu yerdə isə yeni metro stansiyasının tikilməsi ilə bağlı hakimiyyətin planları səbəb olub. Belə ki, hakimiyyət bildirir ki, sözügedən yerdə yaşayış evləri qanunsuz tikildiyindən adamlara kompensasiya verilməsi nəzərdə tutulmayıb. Əsasən son 10-15 ildə tikilmiş onlarla ev söküntüyə məruz qalıb.
     Ötən həftə qəbiristanlığın sökülməsinə başlanılıb ki, bu da yerli əhali ilə polis arasında qarşıdurmaya səbəb olub.-03C-