Qarabağ: müharibənin alternativi yoxdur?

Ermənistan SQ ötən gün ərzində cəbhənin müxtəlif hissələrində 60, 82 və 120 mm-lik minaatanlardan, qumbaraatanlardan, habelə iriçaplı pulemyotlardan atəşkəs rejimini 116 dəfə pozub. Azərbaycan Müdafiə Nazirliyinin məlumatına görə, atışma həm Ermənistan ərazisindən, həm də Qarabağda aparılıb.

Xüsusən, Ermənistan ərazisindən Tovuz, Qazax və Gədəbəy rayonlarına atəş açılıb.

Qarabağda Tərtər, Goranboy, Göygöl, Ağdam, Füzuli, Xocavənd və Cəbrayıl rayonları istiqamətində atışma olub.

Əməliyyat şəraitini nəzərə alaraq, Azərbaycan Silahlı Qüvvələri düşmən mövqelərinə və səngərlərinə 122 atəş zərbəsi endirib.

Bu zaman Tərtər və Ağdam rayonlarında aprelin 26-28-də çoxsaylı kəndlərin artilleriyadan kütləvi atəşə məruz qalması və mülki əhali arasında qurbanların olması ilə müqayisədə, ötən gecə sakit keçib.

Ermənistan tərəfi həmçinin cəbhədə vəziyyətin nisbətən sakit olduğunu bildirir.

Bu arada, Ermənistan tərəfi diplomatik istiqamətdə mövqeyinin sərtləşdiyini nümayiş etdirir.

Belə ki, Ermənistan prezidenti Serj Sarkisyan danışıqların bərpa edilməsinin üç şərtini bəyan edib – atəşkəsin pozulma hallarının araşdırılması mexanizmlərinin tətbiqi, ünvanlı bəyanatlar və Azərbaycan tərəfdən “təcavüzün bərpa edilməməsi”nə zəmanət.

Qarabağ separatçılarının lideri Bako Saakyan isə bildirib ki, Ermənistan tərəfi rayonların qaytarılmasını müzakirə etmək niyyətində deyil və bu, yalnız Dağlıq Qarabağın müstəqilliyi etiraf edildiyi halda mümkündür.

Ermənistan tərəfin bu meydan oxurcasına yanaşması faktiki olaraq problemin sülh yolu ilə həlli şansını sıfıra endirir. Bununla belə, ATƏT-in Minsk Qrupu apreldə baş verən gərginlikdən sonra tamamilə sülh prosesini davam etdirmək iqtidarında olmadığını nümayiş etdirir. Ermənistan yenidən danışıqları təhlükəsizliyin gücləndirilməsi üzrə tədbirlərin qəbulunun müzakirəsinə, yəni münaqişənin həllinə deyil, konservasiyasına bağlamaq istəyir. Azərbaycanın ölkənin ərazi bütövlüyünü bərpa etmək hüququndan istifadə etməkdən başqa çıxış yolu qalmır. -06D-