Abdulla Abdullayevin məhkəmədəki çıxışı (son söz)

Mən ilk növbədə üzümü jurnalistlərə, sonra isə üzdə ədaləti, arxada isə sifarişləri həyata keçirən ədalət təmsilçilərinə, məhkəmə katibinə, vəkillərə tuturam. Çıxışımı aramla edəcəyəm ki, dediklərimi yaza biləsiniz.

Mən bir vətəndaş olaraq bəzi qara qüvvələrin sifarişinin, maraqlarının qurbanına çevrilmişəm. Bu gün məni, sabah isə kimləri öz qurbanına çevirəcəyi bilinmir. Amma mən əvvəlki və indiki çıxışımı tarix üçün edirəm. Bilirəm ki, bir gün gələcək, bu məsələlər yenidən araşdırılacaq, baş verənlərə yenidən qiymət veriləcək. Eyni zamanda mənim kimi şəxslər haqqında yazılıb, yazılır və hələ də yazılacaq. Ən aşağsı bilsinlər ki, mən böhtana, qərəzə, maraqların ədalətsizliyinə məruz qalmışam.

Azərbaycanda hər kəs hər zaman ədalətdən, insan haqlarından, qanunlardan, dəyərlərdən danışır. Sizlər yazın və tarix də görsün ki, bunlar hamsı sözdədir, əməldə deyil. Hər kəs öz maraqları üçün aldadır, şər, böhtan atır, istədiklərini nüfuzdan salmaqla istəklərinə nail olur. Bizdə haqsızlılqarı məktubla yazanlara inanmırlar.

17 aydır ki, həbsdəyəm, prezident İlham Əliyevə 30-dan çox məktub göndərmişəm, amma cavab yoxdur. Mənimlə bağlı mətbuat yazır, vəkillər yazır, yenə də cavab yoxdur. Baş verənləri hər kəs çox sadə şəkildə başa düşməlidir ki,  mən nə etmişəm. 2004-cü ilin iyununa kimi metronun “Gənclik” stansiyası yaxınlığında fəaliyyət göstərmiş AMAY şirkətinə məxsus Ticarət Mərkəzini sökərək yerində dövlətin Gimnastika Mərkəzi tikməsini dəstəkləmişəm. Dövlətdən hər hansı təzminat almadan, başqa ölkələrdəki mənə məxsus obyektləri sataraq başqa bir ərazidə tikinti işi aparmışam. Nobel prospektində AMAY-a məxsus yeni “Xətai” Ticarət Mərkəzinin dam örtüyünü tamamlanmasını verilən kreditlə başa çatdırıb, ümumilli lider Heydər Əliyevin ad günü ilə bağlı açılış etmişəm. Mərkəzin açılışından sonra kondisioner xəttinin qoşulması üçün girov qoymaqla kredit götürmüşəm. Nəticəsi isə həbs edilmişəm, qanunsuz, əsassız, qərəzli ittihamlarla üz-üzə qalmışam. Girovsuz, hər hansı təminat olmadan bizdən 5-10 dəfə artıq kredit götürənlərə heç nə etmirlər. Amma kreditin dəyərindən 5 dəfə artıq girov qoyan, kreditin əksər hissəsini qaytaran bizləri həbs edirlər. Görüşlərimə qadağa qoyaraq həm azadlığımı, həm də hüquqlarımı tapdalayırlar.

Hörmətli hakimlər, mən sizdən ədalətli qərar gözləmirəm. Çünki məhkəmə istintaqının gedişatı, səbəb göstərilmədən məhkəmə prosesinin iki ay təxirə salınması, vəsatətlərin təmin olunmaması, ittıhamla bağlı sübutların verilməməsi, mülki iş olan müqavilə öhdəliklərinə cinayət işi kimi baxılması, hüquq-mühafizə orqanlarının reketsayağı mənə aid olmayan, eyni işə görə əvvəllər də, yəni  2011-ci ildə tələb qoyaraq məhkəmə hökmülə təmin edilən vəsaiti təkrar, yəni, 2014-cü ildə yenidən tələb etməsi ədalətsizlik əlamətlərindən açıq-aydın xəbər verir. Bilirəm deyəcəksiniz ki, “bizə sifariş verən yoxdur”. Amma bir məqamı bilməyinizi istəyirəm. Məni əyani olmasa da qiyabi olaraq hər kəs tanıyır. Mən bişən yeməyin reseptini bilirəm, baxışları, göz-qaşları, eşitdirmələri, əziyyətin necə verilməsini, maraqlar üçün davranışları bilirəm. Özü də tək bu ölkədə yox, dünyanın hər yerində baş verən, şərəfsizliyi, mənəviyyatsızlığı, xəyanəti, qərəzi bilirəm. Bilmədiyim bir həbsxana idi, sağ olsunlar, göndərdilər, onu da bildim.

Hörmətli hakimlər, sizlərə xatırladım ki, bizim kimilər atdan düşəndə təkrar minmək üçün düşür. Vay o günə bəziləri atdan düşə, minməyə bir şey tapmayacqlar. Bizlərin adı malından ağır olar. Ola bilər ki, sizlər məni cəmiyyətə cinayətkar kimi təqdim edəsiniz, amma cəmiyyət çörəyi “qulağına yemir”. Verilən kreditdən 8-10 dəfə artığını məvacib verən şəxsə qarşı irəli sürülənlərə ittiham adı qoyursuz və düşünürsüz ki, insanlar bunu başa düşmürlər? Hər şeyi başa düşürlər, danışırlar, sadəcə siz eştimək istəmirsiniz, eşidəndə isə gec olacaq. Ədalət bərqərar olacaqcvə hər kəs cəzasına çatacaq.

Hörmətli hakimlər, bizim kimilər bizləri yandıran bir iş görmərik və ya Sokratın dediyi kimi “qanunu pozmaqdansa ədalətsizliyə məruz qalmaq yaxşıdı”.

Hörmətli hakimlər, heç vaxt mərdi qova-qova namərd etməyin. Ədalətsizlik olan yerdə bütün dəyərlər itir, cəmiyyət məhvə doğru gedir. Bundan irəli gələrək təəssüflə və nigarançılıqla deyirəm ki, görəsən gələcəyimizi kimlər təmsil edəcək?       

Hörmətli hakimlər, ədalət təmsilçiləri, ölkə prokuroluğunun icazəsi ilə Korrupsiyaya Qarşı Mübarizə İdarəsinin, dövlət ittihamçısının şəxsimə və işçilərimə qarşı irəli sürdüyü ittihamlar bütün hallarda əsassız və qanunsuzdur. Onlar ölkə Konstitusiyasına, Milli Məclisin qəbul etdiyi qanunlara, Ali Məhkəmə Plenumunun qərarlarına zidd gedərək, qanunun aliliyini tanımayaraq, dəxli yoxdur, özlərinə uyğun maraqlardanmı, qərəzdənmi, xainlikdənmi, repressiyadanmı, terrordanmı cinayət törədərək, hansı yolla isə məhkəmələrin dəstəyini əldə edərək dövlətə, cəmiyyətə ölkənin inkişafına xəyanət etməklə mövcud hakimiyyətin nüfuzuna zərbə vururlar. Azərbaycan hüquqi dövlət kimi bir çox beynəlxalq qurumlarda, əsasən də BMT-nin İnsan Hüquqları və Avropa İnsan Hüquqları konvensiyalarına imza ataraq demokrarik ölkə kimi öhdəliklər götürüb. Amma buna baxmayaraq, qanunu qorumalı olan bir təşkilatın rəhbərliyinin icazəsi və imzası ilə qanunun aliliynə xələl gətirməklə bir çox insanları, o cümlədən bütünlükdə xalqı ümidsiz və çarəsiz buraxıblar.      

Bu özbaşınalıqları bu gün ölkə əhalisinin bilməsinə baxmayaraq, prokurorluğun qanunazidd mövqeyi insanları qorxu, təhdid, təzyiq altında saxlamaqla lazım gələndə şər-böhtan atmaqla cəmiyyəti hakimiyyətə qarşı çevirirlər. Qanunun aliliyini qorumalı olan qurumlar qanuna zidd gedərək Azərbaycanın beynəlxalq aləmdə nüfuzuna xələl gətirməklə onun hüquqi dövlət olmasını şübhə altına alırlar.      

Hörmətli hakimlər, məhkəmənin ilk günündən həm vəkillər, həm özüm dövlət itithamçısının ittihamlarla bağlı sübutlar siyahısını təqdim etməsi üçün həm yazılı, həm də şifahi vəsatətlər qaldırdıq. Bu vəsatətlərin siz tərəfdən təmin olunmaması nəticəsində ittihamdan öz müdafiəmizi düzgün qurmağa şərait yaradılmadı.  Təəssüf edirəm ki, sübutlar siyahısı ilə bağlı vəsatəti, nə də digər vəsatətləri qəbul etmədiniz. Şəxsimə qarşı müstəntiq və dövlət ittihamçısının mənasız, məntiqsiz, əsassız, qərəzli, qanunazidd  ittihamları ilə bağlı dəfələrlə yazılı və şihafi açıqlama versəm də məhkəmə istintaqı zamanı araşdırma lazımi tərzdə getmədi. Əsas şahidlərin və zərərçəkmişlərin dindirilməsi zamanı verilən suallar cavabsız qaldı və ya məhkəmə dayandırıldı. Mənim düşüncəmə görə, məntiqlə siz də qanunazidd halın mövcudluğunu başa düşməklə prosesi davam etdirməyin mənasız olmasını bildiniz. Bildiniz ki, nəticə sizin qərarınıza bağlı qalır.

Hörmətli hakimlər, dövlət ittihamçısının ittihamı oxumaq üçün 15 gün vaxt istəməsi müqabilində 15 gündən sonra gəlib 14 dəqiqəlik çıxış etdi. Eyni zamanda yürütdüyü ittihamla bağlı vicdanının səsindən, insani düşüncədən, hüququn aliliyindən çıxış edib-etməməsi mənə məlum olmadı. Amma onun ittihamı məni çox düşündürdü. Düşündüm ki, ittihamçı görəsən özünü bu insanların yerinə qoyaraq fikirləşibmi ki bu insanlar adam öldürüblər, vətənə xəyanət ediblər, oğurluq ediblər, nəyisə mənimsəyiblər, bəzi adamlar kimi şərəfsilzik və ya mənəviyyatsılıq ediblərmi ki, bu qədə ağır cəza istəyirəm? Fikirləşibmi ki bu adamlar hər şeylərini unudaraq gecə-gündüz işləyiblər, bu insanların ailəsi, uşaqları var və bu qədər ədalətsizlik edirəm? Fikirləşdimi ki bir gün Allahın qəzəbinə gəlib mənə də ədalətsizlik edərlər, dörd divar arxasında ailəm, uşaqlarım başsız qalar.

Hörmətli hakimlər, heç kim fikriləməsin ki, əməlləri qarşısına çıxmayacaq. Allah hərədən öz əməlinə görə hesab sorar.

Hörmətli hakimlər, bu millət çox hallarda xain düşmən qüvvələrin ədalətsizlyinə məruz qalıb. Məs, 37-ci illərdə erməni xainlər xalqın ziyalı sinfini məhv etmək üçün ədalətsiz ittihamlar irəli sürüblər və nəticəsi də sizlərə məlumdur. İndi isə ölkənin iqtisadi inkişafını ləngitmək, etibarına, etimadına zərər yetirmək  üçün qanunazidd addımlarla, qərəzli şəkildə iş adamlarını məhv edirlər. Bizləri məhv etməklə tək bizi yox, ölkənin gələcəyini, nüfuzunu, millətin yaşayışının ümid-gümanlarını məhv edirsiniz. Prezidentin dediyi kimi, ölkənin inkişafını ləngidənlər, iş adamlarına mane olanlar, təkcə onlara xəyanət etmir, həm də dövlətə xəyanət edir. O zaman soruşmaq lazımdır ki, mənə qarşı sürülən ittihamlar nədən ibarətdir və məni nə səbəbə həbsə aldınız?

Dediyim kimi, bizə verilən vəsaitin 8-10 qatı qədər mən ildə işçilərimə məvacib verirdim. Hələ vergi, kommunal, əmlak ödəmələri və s. kimi xərcləri demirəm. Şirkətin malı-mülkü isə bizə verilən kreditlərin 200-300 qatı qədərdir. Kreditlər bağlanıb, öhdəliklər bitib, o zaman mənə olan tələb nədir? Deməli, başqasına aid olan vəsait borclarını mənə ödətdirmək istəyirsiniz, ya da malımda-mülkümdə gözünüz var, ya da istəmirsiniz ki, mən bu ölkədə yaşayıb işləyim, bu, bəyəm yoldur? Məgər bunun yolu ədalətsizlik, qanunsuzluq, özbaşınalıq, zorakılıq, hərc-mərclik, sui-istifadə idı, yox. Onsuz da dövlət qarşısında hər kəsin boynu tükdən nazikdir. Bizlərə olan belə davranış tək bizə ziyan gətirmir, bütünlükdə millətə və dövlətə, onun gələcəyinə ziyan gətirir. Bizlərə qarşı bu haqsızlıqları etməklə minlərlə insanı ac qoyursunuz, ehtiyac içində yaşamağa düçar edirsiniz, səfil, məzlum halda küçələrə salırsınız, yaşayışları üçün hər cür əmələ əl atmağa göndərirsiniz, çörək pulu üçün xəyanətə sövq edirsiniz. Nəticədə, millətin mənəviyyatını korlayırsız, gələcəyini məhv edirsiniz, sonra isə milli dəyərlərdən danışırsınız ki, onu da məhv edənlər sizsiniz. Prezident demişkən, məgər bu, millətə və dövlətə xəyanət deyil?

Jurnalistlərdən və vəkillərdən xahiş edirəm ki, baş verən haqsızlıqları, ədalətsizlikləri işıqlandırsınlar. Çünki prezident müşavirədə özü də qeyd etdi ki, mənə çox məktublar çatmır, çox məlumatı İnternet və mətbuatdan alır.  Aristotel demişkən, tarix yalnız ədalətliləri yad edir, qalanları haqda sadəcə danışır.   

  İndi isə mənim istər isintaqın, istər məhkəmənin gedişilə bağlı suallarım var:

1.Tərəflər arasında mülki öhdəliklər qüvvədə olduğu halda Sahibkarlığın İnkişafına Kömək Milli Fondunun verdiyi kreditin müddəti başa çatmadan, hər hansı araşdırma aparılmadan Korrupsiyaya Qarşı Mübarizə İdarəsi hansı əsasla Fondun qanundankənar müraciəti ilə cinayət işi başlayır və 7 nəfəri cəzalandıraraq qanun pozuntusuna yol verir? Üstündən 4 il keçdikdən sonra barəsində artıq məhkəmə qərarının olmasına, Fondun verdiyi kreditlərin əvəzinə verilən kreditin həcmindən də artıq əmlak girovu qoyulmasına baxmayaraq, Fond təkrar KQMİ-yə qanunsuz müraciət edərək bu dəfə şəxsimə qarşı qərəzli cinayət işi başladır. Eyni tələbə görə əsassız olaraq ikinci dəfə krediti nəqd şəkildə ödətdirir. Bu öhdəliklərin iki dəfə yerinə yetirilməsinə və özü də mülki xarakterli iş olmasına baxmayaraq, qanunazidd olaraq 17 aydır ki, həbsdə saxlanıram. 

2. Hansı səbəb və maraqdan, kimin sifarişindən irəli gələrək Fondun əsassız olaraq 2014-cü il martın 11-də ölkə prokurorluğuna göndərdiyi məktub araşdırılmadan, müraciət edilən məsələ barəsində əvvəllər məhkəmə qərarı olması nəzərə alınmadan, işin mülki xarakterli olmasına baxmayaraq, eyni işə görə cinayət işi başlanması üçün müraciət bir gündə, yəni marıtn 12-də həm ölkə prokurorluğunda qeydə alınır, həm məruzə, həm müzakirə edilir, elə eyni gündə də KQMİ-də qeyddiyyata düşür, cinayət işinin başlanmasına icazə verilir, müstəntiq təhkim edilir, şəxsimə qarşı cinayət işi başlanmaqla ittiham irəli sürülür. Yəni, bu “ildırımsürətli operativlik” düşündürücü deyil, ciddi qanun pozuntusunu görmürsüz? Bütün bu proses martın 11-də saat 17:00-dan, yəni, iş günün sonuna az qalmışdan martın 12-də saat 18:00 arasında baş verir.

3. Müqavilə iki hüquqi şəxs arasında bağlandığı halda eyni işə görə iki dəfə cinayət işi başlanıb. İlk dəfə edilən əsassız müraciətə görə “Birlikbank”ın İdarə Heyətinin sədri və məsul şəxslər qanunsuz şəkildə cəzalandırılıb. 4 ildən sonra isə təkrar, yəni, ikinci dəfə yenə də əsassız və qanunsuz müraciət əsasında cinayət işi başlamaqla məni də ittiham edirlər.

4. 2010-cu ildə başlanılan əsassız cinayət işində mənim də cinayət “payım” var idisə məni niyə o zaman məsuliyyətə cəlb edərək cəzalandırmayblar, ya əksinə, cinayətim yox idisə, 4 ildən sonra mənə qarşı cinayət işi necə yaranır?

5. Verdiyi kreditləri Fond birbaşa firmaların hesabına köçürülməsi üçün özü araşdıraraq “Birlikbank”ın İdarə Heyəti və Müşahidə Şurasını öz qərarı ilə razılaşdırdığı halda bank müvəkkil təşkilat olaraq vəsaitlərin verilməsinə yox, geri qaytarılmasına cavabdehdir?            

6.Fond öz qərarı ilə birbaşa ayırdığı kreditlərin hara xərclənməsinin monitorinqini aparmadan (belə monitorinq aparılsaydı akt məhkəməyə təqdim edilməli idi, amma  tələblərimizə və vəsatət qaldırmağımıza baxmayaraq, belə bir sənəd məhkəmə istintaqına təqdim olunmadı), səbəbləri araşdırmadan, bankla müzakirə keçirmədən, verilən kreditlərin vaxtı keçmədən məhkəməyə müraciət etmək əvəzinə nə səbəbə KQMİ-yə müraciət edib? 

7. Fond verdiyi kreditlərin təyinatı üzrə və ya hər hansı istiqamət üzrə istifadə olunduğunu bilirdisə nə səbəbə müqavilə bağladığı “Birlikbank” qarşısında hər hansı tələb qoymayıb və ya hesabına sərəncam qoymaqla verdiyi kreditləri geri tələb etməyib?

8. Nə səbəbə Fond 2003-2007-ci illərdə verilmiş kreditlərn vaxtı keçməsinə baxmayaraq, onlar barədə müraciət etməyib və istintaq nə səbəbdən onlarla bağlı bizə qarşı etdiklərini etməyib?

9. Nədən kreditlərin vaxtı bitməmiş lisenziyası geri alınan “Birlikbank”a Mərkəzi Bank tərəfindən təyin edilən ləğvedicyə yox, cavabdeh olmayan şəxsə qarşı ittiham

irəli sürülərək həbs edilir?  Buradan da aydın olur ki, Mərkəzi Bank “Birlikbank”ın lisenziyasını qərəzli, əsassız ləğv etməklə, “qara pulların yuyulması” məlumatları yaymaqla bankın nüfuzuna xələl gətirib və sonradan bu dediklərini məhkəməyə təsdiq edəcək bir sübut belə təqdim edə bilməyib. Buradan da bu nəticə alınır ki, Mərkəzi Bank, Fond və KQMi əlbir olaraq öz maraqlarını təmin etmək üçün mənə, “Birlikbank”a və AMAY-a külli miqdarda maddi-mənəvi ziyan vurmaqla işgüzar imicimizi ləkələyiblər.

  10. İstintatq mənə çağırış vərəqi göndərmədən, guya göndərdiyi çağırışı almağımı təsdiq edən bir sənəd göstərmədən, çağırış olubsa gəlməməyimin səbəbi öyrənilmədən, xəbərdarlıq olmadan, etika xatirinə könüllü getdiyim halda nədən çağırışa gəlməməyimlə bağlı həbs edilmişəm?

 11. Nədən Fond tərəfindən edilən müraciət əsasında 2010-cu ildə “Texnikabank”la bağlı qanunazidd məhkəmə hökmü ilə 3 nəfər əsassız cəzlandırılıb və üstündən 4 il keçdikdən sonra öhdəliklər olmadığı halda eyni işə görə təkrarən, yəni, ikinci dəfə     yenə də əsassız olaraq şəxsimə qarşı cinayət işi başlanıb?

 12. Nədən Fondun müraciətində müqavilə öhdəlikləri olmasına baxmayaraq, heç bir əsas, sübut olmadan istintaq Atatürk prospektində tikilmiş binanın 262 sakinindən 178 nəfərini əsla dindirmədən, mənim qohumlarımı, hətta bacımı belə zərərçəkən kimi tanıyıb, qərəzli şəkildə ekspertizalar keçirərək əsassız itithamlar irəli sürüblər və qanunazidd adıımlar atıblar.

13. Götürülən kreditlərin bir çoxu ilə bağlı öhdəliklərin bitməsinə, xərclənmə yeri, mənbəyi məlum olmasına baxmayaraq istintaq qərəzli şəkildə, hər hansı sübut təqdim etmədən, sifarişli ekspertiza keçirərək qiymətləri “gülünc” hala salmaqla mənə qarşı “mənbəyi bəlli olmayan” çirkli pulları leqallaşdırmaq itithamı irəli sürüb. Guya mən bu pulları İrana sərmayə qoymaqla leqallaşdırmışam. Qeyd etmək istəyirəm ki, haqqında danışılan kreditlər 2007-2008-ci illərə təsadüf edir, mən isə Azərbaycanda prokurorluğun qanunsuz əməllərinə etiraz olaraq İrana 2012-ci ildə getmişəm və oradakı fəaliyyətimin götürülən kreditlərlə hər hansı şəkildə əlaqəsi yoxdur.

14. Şəxsimə qarşı hansı səbəblə vəzifəsindən sui-istifadə ittihamı irəli sürülüb? Əgər müstəntiq bankın İdarə Heyəti və Müşahidə Şurası ilə təsdiq etdiyi qaydalara söykənirsə, deməli, hələ bir hüquqşünas kimi indiyə qədər öyrənməyib ki, qaydaları təsdiq etmək məsuliyyət yox, tələbdir. Banklar haqqında qanunverilcikdə göstərilir ki, bankın idarə edilməsinə məsul şəxs İdarə Heyətidir. Müşahidə Şurası adından da göründüyü kimi, nəzarətedici orqandır.

   Fonda gəlincə,  Fond verdiyi kreditləri özü araşdırır, yoxlayır, müzakirə edir və nəticədə Fondun İdarə Heyətinin qərarı ilə birbaşa şirkətlərin hesablarına ödəyir. Fond tərəfindən verilən kreditlərin yalnız müvəkkil bank geri qayıtma öhdəliyi götürür.                      

15. Müstəntiq hansı əsasla mənə və şirkətin işçilərinə qarşı mənimsəmə ittihamı irəli sürüb? Hansı əsas və sübutlara söykənərək bu qərara gəlir? Ortada hansı vəsait itib ki, ya hansı lazımsız və ya dəyərsiz əşyalar alınıb, ümumiyyətlə hansı əsaslara söykənərək  belə qərar verilib?

16. Müstəntiq hansı əsasla şirkət əməkdaşlarını “cinayətkar dəstə” adlandırır. Onda belə çıxır ki, bu şəxslər şirkətdəki vəzifələrini yerinə yetirməsinlər? Buradan alınan nəticə odur ki, bir gün gələcək ki, sizlərə də cinayətkar dəstə adı qoyacaqlar. Onda belə çıxır ki, şən işini gördüyünə görə kimsə qərəzli olaraq sizə cinayətkar dəstə adını qoyar ki, siz cinayətkarsınız. Məgər vəzifəsini yerinə yetirmək cinayətdir, elə isə o zaman mənə deyin görək, bu ştat cədvəli nə üçündür? 

17. Nədən müstəntiq müqavilədən irəli gələn hallara dələduz ittihamı irəli sürüb?  Ali Məhkəmə Plenumunun dələduzluq haqqında qərarı var, heç olmasa  onu oxusun. Dələduz özgənin əmlakını özününküləşdirənə deyərlər. Bizlər kimin əmlakını özününküləşdirmişik?

 18. Həm “Brilikbank”la, həm AMAY-la, həm “Texnikabank”la ikinci dəfə cinayət işi başlanır, nədən KQMİ məhkəmə qərarı ilə götürdüyü sənədləri və o cümlədən “Birlikbank”ın sənədlərini  geri qaytarmır?

19. Nə səbəbə müstəntiq məni qanunda mövcud olmayan “faktiki rəhbər” adı ilə ittiham edir, məgər Azərbaycan hüquqi dövlət deyil, ya qanunun aliliyi gözlənilmir?

20. Müstəntiq əvvəlcə Fonddan götürülən 3.400.000 manat kredit vəsaitinə tələb qoyur. İttihamda da göstərilir ki, 3.400.000 manat ödənildikdən sonra müstəntiq mənə aidiyyatı olmyan 520 min manat və ya 890 min manat tələb qoyur. Sual olunur ki, əgər bu rəqəm tələb edilirdisə, niyə əvvəlcədən tələb edilmirdi? Niyə pul vəsaiti ödənildikdən sonra qeyd edilən vəsait mənimsəmə kimi göstərilməklə ittiham irəli sürülür? Birincisi, mənimsəmə kimi göstərilən vəsaitlər müqavilə ilə verilən kreditlərdir. İkincisi, bu ittihamla 2010-cu ildə “Birlikbank”ın İdarə Heyətinə qarşı qanunsuz cinzyət işi başlanıb və onlar cəzalandırılıb. Üstündən 4 il keçdikdən sonra təkrar olaraq eyni işə görə yenidən cinayət işi başlanır və mən ittiham edilirəm. Üçüncüsü, necə olur ki, “Birlikbank”ın lisenziyası ləğv edilən, rəhbərliyi tam tərkibdə işdən kənarlaşdırılan 2011-ci ildən bu yana, yəni, Mərkəzi Bank “Birlikbank”a təyin etdiyi inzibatçıdan 3 il ərzində daxili olan vəsaitlər barədə heç nə tələb etmir, amma heç bir məsuliyyəti olmayan şəxsdən tələb edir?

21. AMAY-la bağlı verilən kreditlərin vaxtı bankın lisenziyası ləğv edildiyi vaxt, yəni, 2011-ci ildə hələ bitməmişdi. Nədən Fond KQMİ-yə müraciət edərkən müqavilə iki hüquqi şəxs arasında bağlansa da tələbini banka yox, aidiyyatı olmayan şəxsə ünvanlandırılır və cinayət işi açmaqla həbsə alınır.

 22. Banklar haqqında qanunda deyilir ki, lisenziyası ləğv edilən banka Mərkəzi Bank inizbatçı təyin edirsə bütün öhdəliklərə görə həmin inzibatçı cavabdeh şəxs sayılır. Əgər lisenziya ləğv edilən zaman kreditlərin vaxtı bitməmişdisə, o zaman bu niyə inzibatçıdan yox, bankdan kənarlaşdırılan şəxslərdən tələb edilir. Nəyə görə eyni işə görə iki dəfə cinayət işi açılır. Birinci dəfə tələb edilən vəsait daşınmaz əmlakla, ikinci dəfə isə nəqd pulla ödənilir. Amma 2011-ci ildən bu yana bunlara birbaşa cavabdeh olan Mərkəzi Bankın “Birlikbank”a inziabtçı təyin etdyi şəxsə qarşı hər hansı tələb irəli sürülmür.  

23. Dövlət itithamçısı deyir ki, 3.900.000 manat +150.000 manat %. Siz reketsiniz ki, məni “yükləyir”siniz? O zaman bu qanunlar niyə yazılır? Nirə krediti götürənlərdən yox, aidiyyatı olmayan adamlardan tələb edirsiz? “Mən razı, pulu verirəm, amma siz də məndən qanun yolu ilə yox, reket kimi tələb edin verim”.

24. “Xudafərin” firması ilə bağlı 3.500.000 manatın mənimsəmə kimi qeyd olunmasına gəlincə, şirkətlər qurulanda onun əsas məqsədi fəaliyyəti nəticəsində gəlir əldə etmək olur. Tutaq ki, 3.500.000 manat gəlir var. Amma 262 nəfərin mənzil hissəsinin həcmi təqribən 57 min kv.metrdir, yəni, pilləkənlər, dayanacaqlar, su anbarı, nasosxana, zirzəmi və s. Göstərilən vəsait ümumilikdə tikintiyə xərclənib və əlavə də olaraq şirkət tərəfindən vəsitlər xərclənib. Tikintinin tamamlanması üçün əlavə vəsait tələb edilir ki, ekspertiza onu göstərməyib.Göstərilən rəqəm 2003-cü ilin qiymətlərilə nəzərdə tutulub. Əgər məhkəmə məsləhət bilsə, illər üzrə tikinti materiallarının qiymətlərini Statistika Komitəsindən götürə və ya sorğu göndərə bilər.

  25. Şirkət açmaq, hesab açmaq, kredit götürmək hansı qanunvericiliklə  qadağan edilir? Məgər götürülən kreditlər mənimsənilib? Əksinə, götürülən kreditləri mal-materiallara  yönləndirməklə alınan materiallardan vergilər, fazilər, əmək haqları  ödənilib ki, bundan da dövlət xeyir götürür.

26. Dövlət ittihamçısı müqavilələrdən irəli gələn hallara qarşı cinayət işi qaldırılmasının mümkünlüyünü qeyd edir. İlk növbədə qeyd etmək istəyirəm ki, kreditn verilməsinə bank məsuldur. İkincisi, kreditlərin təminatı kimi tək daşınmaz əmlak çıxış edə bilməz. Eyni zamanda təminat məktubu şirkətlərin aktivi, dövriyyəsi və s. kimi təminatlar da öhdəlik sayılır. Bank tərəfindən verilən kreditlər təminatlı olub.    

27. Hörmətli hakimlər, leqallaşdırma ilə bağlı müstəntiq və dövlət ittihamçısının irəli sürdüyü ittihamın heç bir əsası yoxdur, yeri gəlmişkən , bu barədə dövlət ittihamçısı özü də qeyd edir. Qanunvericilikdə “cinayət yolu ilə ldə edilmiş, mənbəyi bəlli olmayan vəsaiti dolayı yolla daşınar və daşınmaz əmlaka  yönəltdikdə” ifadəsi keçir. Amma müstəntiqin qeyd etdiyi kimi göstərilən vəsaitlər kredit vəsaitləridir, istifadə yeri də bəllidir. Məhkəmə istintaqı zamanı həm mən, həm vəkillər leqallaşdırma ilə bağlı ittihamın araşdırılmasını tələb etsək də sizlər buna “heç bir sübut olmadığı” mövqeyi bildirmişdiniz.

  Hörmətli hakimlər, bir neçə qanunları sizlərin yadına salmaqla baş verənlərə yəni,  hüququ pozanlara, ədalətsizlik edənlərə, götürülən öhdəliklərə arxa çevirənlərə qiymət verərək münasibət bildirməyinizi istəyirik.

1. Cinayətin subyekti fiziki şəxsdir, müqavilə öhdəliyi isə mülki xarakterlidir.
2. Müqavilə öhdəliyi mülki xarakterlidir, cinayət işi aşmaq qadağandır. Ali Məhkəmə Plenumunun 2002-ci il qərarı; 2015- ci il Avropa İnsan Haqları Konvensiyası
3. Banklar haqqında qanunda lisenziyası ləğv edilən banka Mərkəzi Bank inzibatçı təyin etdikdən sonra  bu şəxs bütün öhdəliklərə cavabdeh şəxs sayılır. Köhnə rəhbərlik işdən kənarlaşdırəldıqdan sonra bankın işinə müdaxilə etməsi qadağandır.

Bütün dünyada iş adamlarının normal fəaliyyətinə gərəkli olan işgüzar mühit, münasibət, fəaliyyət təhlükəsizliyinə təminat, qanunun aliliyi, maliyyə dayanıqlığı, demokratik cəmiyyət, insan hüquqları kimi amillər var. Bu amillər olmayan ölkəyə heç bir iş adamı gəlməz. Bu gün Azərbaycanda iş adamlarına, xüsusən də sərmayəçi olan iş adamlarına qarşı atılan addımlar narahatlıq doğurur. İş adamlarına mövcud münasibət ölkəni etibardan salmaqla geniş mənada nüfuzuna xələl gətirir. İş adamlarına mövcud münasibət ki, təkcə xarici sərmayədarları deyil, eləcə də yerli sərmayədarları ehtiyatlı olmağa, öz sərmayəsini ölkədən çıxarmağa vadar edir. Bu hal artıq Azərbaycanda mövcuddur. Bizlərdən dövləti xəbərdar etmək, ona məlumat verməkdir. Dövlətin vəzifəsi isə dövlətə xəyanət edənləri, öz maraqlarını güdənləri cəzalandırmaqdır.          

      A.Abdullayev                                                  İmza:______________________

   01.09.2015-ci il.