ABŞ-a köçmə - başdan başlayaq

Rəisim deyir ki, köçməkdənsə yanğın daha yaxşıdır, başqa ölkəyə köçmək isə, şübhəsiz, böyük stresdir. Amma Demokratik Konqo Respublikasına deyil, Birləşmiş Ştatlara köçürsən, odur ki, həyəcanlanmaq üçün səbəb var. Əsas vəziyyəti mümkün qədər tez nəzarət altına almaqdır.

İlk növbədə, ABŞ-dakı həyat haqqında bütün Hollivud filmlərini unudun və sıfırdan başlayın. Yaşıl dollarların az qala ağacda bitdiyini və sadəcə arada-sırada toplamaq lazım olduğuna sadəlövhcəsinə inananlardansınızsa, ayılmaq vaxtı çatıb.

Digər tərəfdən, gəncliyiniz Stalin dövründə keçibsə, nənəm kimi, və Nyu-Yorkun dilənçilərlə, Çikaqonun isə banditlərlə dolu olduğu barədə sovet təbliğatına inanmaqda davam edirsinizsə, ciddi şəkildə yenidən düşünməlisiniz.

Hollivud filmlərindəki cəlbedici səhnələrin əksinə, amerikalılar heç də gec-gündüz günəşli Kaliforniya və Florida plyajlarında uzanaraq və ya Nyu-York butiklərində böyük məbləğlər xərcləyərək zaman keçirmirlər. Daha dəqiq desək, əlbəttə ki, amerikalıların bir qisminin həyatında bu aspektlər var, amma onlar əksəriyyət təşkil etmir.

Rusiyanın Kremlyönlü qəzetlərini oxusaq, maliyyə böhranı və iqlim dəyişiklikləri Amerikaya elə güclü zərbə vurub ki, burada, fantastik filmlərdə olduğu kimi, əhalinin yarısı aclıqdan ölür, digər yarısı isə ümumiyyətlə qırılıb. Bu nağıllara inanırsınız? Onda bəlkə həyatda Amerikaya köçmək kimi cəsarət etməyə dəyməz?

Amma vəziyyəti sağlam düşüncə ilə qiymətləndirmək iqtidarındasınızsa, seçiminizi Amerikanın xeyrinə etmisinizsə və immiqrasiya maneələrini aşmısınızsa, uğurlar!

Burada sizi ilk növbədə nə heyrətləndirəcək? İkinci Dünya Müharibəsində arxa cəbhədə işləyən və Stalinin vəfatına acı göz yaşları axıdan 82 yaşlı nənəmi ilk növbədə göydələnlər və onların çoxdan tikilmiş olması heyrətləndirdi. Mağazalardakı məhsulların müxtəlifliyi, küçələrdə təmizlik də onu valeh etdi.

Məni amerikalıların nə dərəcədə çalışqan millət olduğu heyrətləndirdi. Bakı küçələrində gedərkən hər yerdə gənclərə və iş gününün ortasında çayxanada və ya evin həyətində oturan, heç bir iş görməyən insanlara rast gəlmək olar. Amerikalılar səhər el birliyi ilə işə gedirlər, həm də səhər saat 5-də və ya 6-da başlayanlar da var, bu, yalnız süpürgəçilər deyil. Günorta onlar yenə də el birliyi ilə nahara, axşam evə gedirlər. Ev xanımları da var, amma onların sayı çox deyil və onlar vaxtlarını serial izləyərək keçirmirlər – bu, fəal şəkildə xeyriyyəçilik və ya könüllülüklə məşğul olan qadınlardır.

Bir də amerikalıların iki xüsusiyyəti məni heyrətləndirdi – gülümsəmək və idmanla məşğul olmaq. Bir dəfə də olsa Rusiya telekanalında Mixail Zadornovun konsertinə baxdınızsa, onun “axmaq, həmişə gülümsəyən amerikalılar”la bağlı zarafatlarını xatırlayırsınız.

İntellekt məsələsini sonraya saxlayaq, amma amerikalıların təbəssümü heç də nəzakət ifadə etmək üçün mütləq deyil, sadəcə onlar həyata müsbət yanaşmağa alışıblar. Hamı olmasa da, onlar çox pul qazanır və təmtəraqlı evlərdə yaşayırlar.

İdmana gəlincə. Amerikalılar dünyanın ən kök milləti olaraq qalmaqdadırlar, təəssüf ki, hələlik bu, reallıqdır. Bu, çox vaxt yanlış qidalanmaqdan irəli gəlir. Amma bununla yanaşı, hamı və hər kəs idmanla məşğul olur. Küçələrdə səhər-axşam qaçırlar, velosiped sürürlər, üzürlər, beysbol, basketbol, tennis oynayırlar. Məşq zalları, demək olar ki, həmişə ağzına qədər dolu olur. 40 yaşlı insanlar 20 yaşındakı azərbaycanlılar kimi görünür. Və məsələ sadəcə həyat səviyyələri arasındakı fərqdə deyil. İnsanlar sadəcə yeməklərinin həddini bilirlər və fiziki hərəkətləri unutmurlar.

Əlbəttə, sizin ilk təəssüratlarınızın məhz belə olacağı mütləq deyil. Amma gözlənilməz halların və təəssüratların çox olacağı dəqiqdir. Sadəcə onu qeyd etmək istərdim ki, Moskva göz yaşlarına inanmırsa, Amerika ən dəhşətli fəryadlara və iniltilərə belə inanmır! Amma, axı bu, kefimizi pozmaq üçün bəhanə deyil.

Amma hər şeyin yağ kimi getməsi, problemlərin heç olmasa minimum olması üçün vəziyyəti nəzarətiniz altına almağa çalışın. İmmiqrasiya vəkillik kontoruna gedin, yaşamağa yer tapın, harada işləyəcəyinizi müəyyən edin və s. Növbəti yazılarda bu barədə bəhs edəcəyəm.

Növbəti yazı immiqrasiya məsələləri üzrə haradan məsləhət ala biləcəyiniz haqqında olacaq.

Mənbə: QueenTamara.blogspot.com