Bəyanat

Bu gün “Monitor” jurnalının baş redaktoru Elmar Hüseynovun xaincəsinə öldürülməsindən 12 il ötür.  Elmarın qətlinin sifarişçiləri və qatillər indiyədək  tapılıb öz cəzalarını almayıblar. Onun günahsız qanının yerdə qalması isə Azərbaycan jurnalistikasında ləkə olaraq qalır.

Elmarın qətli çox böyük hadisə oldu. Çünki bu, müstəqil mətbuata qarşı repressiyalara yol açdı və onun faktiki olaraq məhvinə gətirib çıxardı. Bir çox KİV bağlandı və ya hakimiyyətin nəzarətinə keçərək kütləvi təbliğat vasitəsinə çevrildi. Jurnalistika özünün ictimai əhəmiyyətini itirdi və ölkəni dərin sistemli böhrana sürükləyən siyasətin iştirakçısına çevrildi.

Peşəkar jurnalistikanın ardınca xalq jurnalistikası, yəni sosial şəbəkələr, bloqosfera repressiyalara məruz qaldı.

İnternet azadlığına dair  qanunvericilik sərtləşdirildi, həbslərin, sosial şəbəkə fəallarının, həmçinin jurnalistlərin həbslərinin sayı artdı.

Ölkə üçün çətin olan bu günlərdə azad demokratik cəmiyyətin inkişafında təməl daşı olan söz azadlığının aqibətinə görə məsuliyyəti öz üzərimizə götürərək Azərbaycan hakimiyyətini aşağıdakı addımları atmağa çağırırıq:

1.Elmar Hüseynovun qətlinin sifarişçiləri və qatillər məsuliyyətə  cəlb edilsin;

2.Həbsdə olan jurnalistlər və  bloqerlər azadlığa buraxılsın;

3.İfadə azadlığına görə təqiblərə son qoyulsun;

4. KİV, İnternet haqqında qanunvericiliyə məhdudlaşdırıcı düzəlişlər ləğv edilsin;

5. KİV və informasiya azadlığı haqqında qanuna uyğun olaraq sərbəst informasiya əldə edilməsi təmin olunsun;

6. Diffamasiya haqqında qanun qəbul edilsin;

7. KİV-in davamlı və azad inkişafı üçün iqtisadi şərait təmin edilsin;

8. Beynəlxalq norma və standartlara uyğun olaraq keyfiyyətli KİV-in inkişafı üçün şərait yaradılması məqsədilə hökumətlə media  arasında konstruktiv dialoq başlansın.

Bakı, 2 mart 2017-ci il