Dəhşətli gecə və ya Leyla Yunusun mənəvi qələbəsi

Hüquq-müdafiəçiləri Leyla Yunus və onun həyat yoldaşı Arif Yunusun bu gecə saxlanmasını qanunsuzluğun və özbaşınalığın növbəti dəfə nümayişi adlandırmaq olar.

Onları Parisdən Dohaya uçan təyyarədən düşürdükdən sonra üç saat ərzində alt paltarına  qədər yoxlayıblar. Sonra səbəblərini açıqlamadan axtarış aparmaq üçün onları evlərinə götürüblər.

Leyla və Arif Yunuslara order təqdim olunmayıb, lakin onu vəkil Xalid Bağırova göstəriblər.

Baş Prokurorluğun müstəntiqi Ləmbəranski L.Yunusun bu sənədi göstərmək tələbindən imtina edib. Mənzilə neçə müstəntiqinl və L.Yunusun neçə nümayəndəsinin daxil olacağı barədə uzun müzakirələr A.Yunusda son dörd  gün ərzində ikinci hipertonik böhrana səbəb olub.

Müstəntiqlər qərara alıblar ki, A.Yunus qəsdən özünü xəstəliyə vurub, odur ki, onu evin girəcəyində saxlayıblar, 7-8 nəfər mətbuat işçisini və L.Yunusun yaxınlarını küçəyə çıxarıblar.

Hüquq-mühafizə orqanları həqiqətən düşünüblər ki, Arif özünü qəsdən xəstəliyə vurub və qaçmaq niyyətindədir. Bu hərəkətlər L.Yunusun əsəbiləşməsinə səbəb olub və o, müstəntiqləri mənzilə buraxmaqdan imtina edib. Təcili yardım A.Yunusu reanimasiyaya götürdükdən sonra müstəntiqlər L.Yunusa axtarış aparmağı təklif ediblər, lakin o qəti şəkildə imtina edib.

Bu qarşıdurma bütün gecə davam edib. Müstəntiq Ləmbəranski vaxtaşırı kiminləsə telefonla danışıb, vəziyyət barədə məlumat verib. Saat yeddiyə yaxın Yasamal rayon polisinin rəisi Ismayıl Əsədov hadisə yerinə gəlib. L.Yunusa ultimatum verilib: ya qapını açsın, ya da sındırıb açacağıq. L.Yunus deyib: “sındırın açın”.

O, qapını açmaqdan imtina etməsini ona və həyat yoldaşına qarşı “qeyri-insani” davranış ilə izah edib. O həmçinin polis zabitinin təhqirinə məruz qalıb. Belə ki, polis zabiti onun qonşunun mənzilinə tualetə tək getməsinə izn verməyib.

“Bax, bu “kişi”, polis zabiti dayanıb mənim unitaza necə əyləşdiyimə baxırdı və bundan sonra siz qanunçuluqdan danışırsınız”, - hüquq-müdafiəçisi qəzəblənib.

  Polislərin özlərini ləyaqətli aparması ilə bağlı jurnalistlərin və Yunusun həmkarlarının çağırışlarına cavab olaraq polis rəisi deyib: “Siz operativ qaydaları bilmirsiniz, birdən o, tualetdə özünə nəsə edər, odur ki, bizim əməkdaş onun yanında olmalı və bunun qarşısını almalıdır”.

  Uzun müzakirələrdən və qarşılıqlı ittihamlardan sonra müstəntiqlər  qapını sındırmaq fikrindən daşınıblar L.Yunusu ifadə vermək üçün prokurorluğa dəvət ediblər.

Bütün gecəni yatmayan L.Yunus öz vəkili və onu müşayiət edən başqa bir şəxslə saat 7:00-da dindirməyə gedib və saat 14:00-a qədər orada qalıb.

Qeyd edək ki, prokurorluğun müstəntiqləri hansı əsaslarla axtarış aparmaq istədiklərinin səbəblərini, axtarış üçün kimin sanksiya verdiyini, Leyla və Arif Yunusun nədə günahkar olması və nədə şübhəli bilinməsi barədə açıqlama verə bilməyiblər.

Xatırladaq ki, bundan əvvəl MTN jurnalist Rauf Mirqədirovu həbs edib. O, Ermənistanın xeyrinə casusluqda ittiham olunub. Guya bu “cinayət”i 2008-2009-cu illərdə L.Yunusun rəhbərlik etdiyi Sülh və Demokratiya İnstitutunun keçirdiyi tədbirlər çərçivəsində sənədləri erməniləri ötürməklə törədib.

Odur ki, çox güman ki, Leyla və Arif Yunusu bu “cinayət”də iştirakda ittiham etmək istəyirlər.

Onu da qeyd edək ki, Leyla və Arif Yunusu hava limanında müşayiət edən qərb diplomatları bir neçə dəfə Prezident Administrasiyasına telefon edərək yüksək vəzifəli şəxslərlə, əsasən Novruz Məmmədovla danışıblar.

Lakin çərşənbə axşamı səhər N.Məmmədovun nümayəndəsi Turan agentliyinə belə bir şeyin baş vermədiyini bildirib.-02В-