Dövlət �Lahıc bağları� massivində bağların zəbt olunmasına havadarlıq edir

Azərbaycan Konstitusiyası və bizim yaşadığımız gerçəklik müxtəlif paralel və bir-birinə toxunmayan ölçülərdə mövcuddur. Konstitusiyanın 29-cu maddəsi vətəndaşın mülkiyyət hüququnu təsdiqləyir: "Heç bir mülkiyyət növü üstünlüyə malik deyil. Özəl mülkiyyət hüququ qanunla qorunur. Heç kim məhkəmənin qərarı olmadan öz mülkiyyətindən məhrum edilə bilməz. Dövlət miras hüququna zəmanət verir.

Abşeronun bağ massivlərində maraqlı hadisələr baş verir. Sabunçu rayonunun Lahıc bağları qəsəbəsində iki bağ sahibinin - Paşayeva Ülviyyə Nuhbala qızı (bağ N2424) və Mirməmmədov Mirislam Mirmusa oğlunun ( bağ onun mərhum anası Gülbacı Abbas qızının adınadır (N2425) maraqlarını müdafiə edən vətəndaş mənə müraciət edib. Yaxınlıqda qohumlara məxsus daha üç bağ sahəsi var. Yəni, beş qohum 1967-ci ildən qonşuluqdakı torpaq sahələrinə sahibdir. Onların əlində Bağ tresti ilə icarə haqqında 1985-ci il tarixli müqavilə var. Lakin bu il adı çəkilən iki bağ sahibinin ərazilərinin bir hissəsi hansısa Əliyev İlham Gülbala oğlu tərəfindən zəbt edilib. Qonşulardan heç kim onu görməyib.

2018-ci il fevralın 21-də İ.Əliyev iki qonşunun sahəsini qismən əhatə edən əraziyə mülkiyyət hüququ haqda sənəd (kupça) rəsmiləşdirib və "öz" sahəsinə ünvan alıb- N2278.

Ülviyyə Paşayeva -özünün 180 kv. m. sahəsindən istifadə etmək imkanlarından məhrum edilib. Digər 300 kv. m. sahə isə Mirislam Məmmədovun ərazisində zəbt edilib. Bu az imiş ki, İ.Əliyev 5 metr enində qrunt yolunu da zəbt edib. Iki qonşu bağa həmin yolla gedir. Orada traktor işlədərək qonşuların bağlarına yolu dağıdıb.

Beş qonşudan biri - Paşayeva və Mirməmmədovun nümayəndəsi Nuhbala Paşayev Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin 1-ci ərazi idarəsinə müraciət edib. Əraziyə mühəndis gəlib, sahəni ölçüb. Aprelin 24-də idarədən rəsmi cavab gəlib. Cavabı imzalayan idarənin rəis müavini Zəfər Əhmədov bildirib ki, köhnə və yeni qonşunun sahələri qismən üst-üstə düşür, yəni, zəbt faktı var. Rəsmi cavabda sonuncu sözlər yoxdur, ancaq əgər yeni qonşu vətəndaşın əvvəllər yaşadığı ərazini öz adına rəsmiləşdirirsə, buna nə ad vermək olar?

Şikayətçilərin nümayəndəsi Nuhbala Paşayev diqqəti ona yönəldir ki, İ.Əliyev torpaq sahəsinə hüququnun olması haqda çıxarışı açıq torpaq üçün alıb, halbuki, mülkiyyət hüququnun sənədləşdirilməsi zamanı Əmlak Məsələləri Dövlət Komitəsinin torpaq ölçəni mülkiyyətçidən öncə hasar çəkməyi tələb edir ki, torpaqda sahənin sərhədlərini müəyyən etmək mümkün olsun. İ.Əliyev hasar çəkməyib, ancaq "kupça" alıb.

Sonra məmur Əhmədov şikayət edən bağ sahibi Ülviyyə Paşayevaya yazılı şəkildə bildirib ki, onun təqdim etdiyi sənəddə atasının adında (Nuhbala) orfoqrafik səhvlər var və bu səbəbdən Dövlət Xidməti onun torpaq hüququnu təsdiqləyən reyestr çıxarışını verə bilmir.

Xatırladaq ki. söhbət Paşayevanın və onun valideynlərinin 1967-cı ildən sahibi olduqları ərazidən gedir. Ikinci qonşu Mirislam Mirməmmədov Mirmusa oğlu hələlik şikayətlə müraciət etməyib. Ancaq onun adının və soyadının uzun olmasına görə ad və soyadında, ata adında səhv tapmaq məmur Z.Əhmədov üçün asan olacaq. Onlar üçün mühüm olan ərazilərin zəbt olunmasını əsaslandırmaq, "güclü adamı" müdafiə etməkdir, torpağın zəbt olunması isə bağlı açıqlama vermək isə vacib deyil.

Dövlət Xidməti idarəsinin işçisi iki bağ sahibinin nümayəndəsilə söhbətində ərazini zəbt edənlərlə görüşüb "ümumi dil tapmağı" tövsiyə edib. Yeni qonşunun "köhnələr" ilə görüşü baş tutub. İ.Əliyevin əvəzinə Cəlal adında adam fəaliyyət göstərir və onun maraqlarını müdafiə edir. O, zəbt edilən torpaqları boşaltmaqdan imtina edib və qonşulara məhkəməyə müraciət etməyi məsləhət görüb.

Cəlalın hiyləsi ondan ibarətdir ki, əgər hakim yeni qonşunun gizli sifarişini yerinə yetirərək zəbt edənin hərəkətlərinə bəraət qazandıran məhkəmə qərarı çıxararsa və bunu onunla əsaslandırarsa ki, Ü.Paşayeva və M.Mirməmmədov mülkiyyət hüququnu sənədləşdirməyiblər, dövlət reyestrindən çıxarışı məhkəməyə təqdim etməyiblər, o zaman İ.Əliyevin qonşuların torpaqlarına olan hüququ qanuni olacaq.

İ.Əliyevə və onun adamı Cəlala sual vermək istəyirəm - sadə sual: Abşeronda sahibsiz sahələr yetərincədir, üstəlik "Lahıc bağları"ndan daha prestijli və yaxşı qəsəbələrdə. Mütləq insanların 60-cı illərdən bəri yaşadığı əraziləri zəbt etmək lazımdır? Onlar buranı abadlaşdırıblar, ağaclar əkiblər, nəvələrini burada böyüdüblər.. Günahsız adamların, həm də özünün həyatını pozmaq nəyə lazımdır, bir halda ki, boş sahələr əldə etmək daha asandır. Zorakılıq edəni müdafiə etməyə dövlət orqanını nə vadar edir?

Turan-ın müxbiri Cəlala telefon edərək ərazinin zəbt edilməsinin səbəblərini soruşmaq istəyib. O deyib ki, ondan heç bir şey asılı deyil, münaqişə istəmir. Soyadını söyləməsi və başqasının torpaqlarının zəbt olunmasının səbəbləri barədə sualın cavabında isə o, söhbəti kəsərək telefonun dəstəyini asıb.

Qeyd edək ki, hakimiyyət nümayəndələrinin mülkiyyət hüququnu pozanlarla "dil tapmaq" tövsiyəsi Azərbaycanda geniş yayılıb və zəbt edənin maraqlarının müdafiəsi üçün tətbiq olunur.

Turan-a şikayətlə müraciət edən başqa bir mülkiyyətçi də Mərdəkan bağ massivində sahə polisinin bu cür cavabı ilə qarşılaşıb. Yerli dini "avtoritet" ona basqı edərək yerli icmanı razı salmağa məcbur edib, yəni onlara pul versin ki, yeni bağın sahibini bir daha narahat etməsinlər. Vətəndaş isə sadəlövhcəsinə inanıb ki, ölkədə qanun var və polisə şikayət edib. Polisdə ona məsləhət ediblər ki, özü məsələni yerindəcə həll etsin, yəni, qanun pozucuları ilə "ümumi dil tapsın".

Mən Əmlak Məsələləri Dövlət Komitəsinin İnformasiya, içtimayyətlə əlaqələr və protokol şöbəsinin rəisi Qulu Xəlilovla görüşdüm. Sənədlərin surətini və Ü.Paşayevanın Z.Əhmədovdan aldığı cavabı ona təqdim etdim, narazı vətəndaşların vəziyyəti barədə məlumat verdim. Q.Xəlilov vəd etdi ki, iş qurumun mütəxəssisləri tərəfindən öyrənildikdən sonra rəsmi cavab veriləcək. O gündən bir ay keçir. Müxbir üç dəfə Q.Xəlilova telefon edib və "məsələni dərindən öyrənən komitə əməkdaşlarının tezliklə və mütləq hazırlayacağı rəsmi cavab" haqda yeni vədlər eşidib. Nəzakətli qəbula və bizim istəyimizi səbrlə dinlədiyinə görə Q.Xəlilova təşəkkür edirik. Ancaq fakt bundan ibarətdir ki, Əmlak Məsələləri Dövlət Komitəsi cavab təqdim etməkdən yayınıb. Qanun iki dəfə pozulub: bağ ərazisi zəbt edilib və dövlət təşkilatı jurnalistin informasiya əldə etmək və yaymaq hüququna məhəl qoymur.