Ramil Usubova müraciət

Hörmətli cənab Nazir!

Siz çağdaş Azərbaycan hakimiyyətinin aparıcı Şəxslərindənsiniz. Ölkədə sabitliyin formalaşmasında, cinayətkarlıqla mübarizədə əldə olunan nəticələrdə Sizin müstəsna xidmətləriniz qeyd olunmalıdır.

Dəfələrlə siyasi proseslərin “düyün” nöqtələrində peşəkarlığınız sayəsində YAP iqtidarı hakimiyyətini qoruyub saxlamağa müvəffəq olub. Bütövlükdə iqtidar komandanızın idarəçilik üslubunu qəbul etməsəm də, onun sıralarında olan ayrı-ayrı şəxslərin vaxtaşırı qiymətini vermək zərurəti yaranır. İnanıram ki, hakimiyyət uğrunda mübarizə aparan istənilən şəxsin Sizin kimi peşəkara ehtiyacı vardır.

Nazir olmağınızın müddəti davamlı olduğundan, Şəxsi keyfiyyətlərinizi də dəyərləndirmək imkanım olub.  Şəxsən Sizi tanımasam da, məsafədən  gəldiyim qənaət odur ki, mütaliəli, mədəni, intellektualsınız. Davranışlarınızda kübarlıq da mövcuddur. Sözsüz, insanın şəxsi xüsusiyyətləri onun idarəçiliyinə də yansıyır.

Polis orqanlarının siyasi proseslərə müdaxiləsi mübahisə mövzusu deyil. Başa düşürəm ki, siyasi konyüktürün hegemonluğu şəraitində bunun əksi mümkünsüzdür. Sizin idarəçiliyiniz ümumi iqtidar siyasətinin bir qoludur, fərqli üslubu Sizdən ummaq da ədalətsizlik olardı.

Hörmətli Ramil bəy!

Müraciətimin səbəbi 2 gün əvvəl hüquq müdafiəçisi Leyla Yunusun saxlanması zamanı çəkilmiş videogörüntülərdən əldə etdiyim eybəcər təəssüratdır. Şahidi olduğum mənzərə yazılmış və yazılmamış qanunlara zidd, əxlaqımıza yad olan hadisələr idi.

Əvvəla onu deyim ki, insanlarımızın fərqli siyasi düşərgələrə mənsub olması onların insanlıq və ya vətəndaşlıq statusundan məhrum edilməsi deyil. Mən Leyla xanımı 1989-cu ildən tanıyıram.

Bu müddət ərzində daim fərqli düşərgələrdə olmuşuq. Siyasi baxışlarımızda köklü fərqliliklər var. O həmişə solçu, mən sağçı, o liberal, mən millətçi olmuşam. Onun illər uzunu təbliğ etdiyi “xalq diplomatiyası” siyasətini isə heç vaxt qəbul etməmişəm, hətta bizə kənardan sırınan bu yanlış xəttə qarşı mübarizə aparmışam.

Lakin onun dövlət müstəqilliyi, insan haqları, demokratiya uğrunda apardığı fasiləsiz mübarizəni də yüksək qiymətlindirirəm. Eyni zamanda,  onun Azərbaycan xanımı, alim olduğunu da önə çəkirəm.

Saxlanma zamanı baş vermiş naqislikləri nəzərinizə çatdiırmaq istərdim. Əminəm ki, Siz baş verənlərdən məlumatlısınız, lakin bunları bir daha qeyd etmək istəyirəm:

1. Əməliyyatda iştirak etmiş polislər saxlanılmış şəxsə heç bir rəsmi ittiham irəli sürmədən saatlar ərzində onun insan və vətəndaş hüquqlarını qanunsuz olaraq məhdudlaşdırıblar.

2. Qadının saxlanması zamanı qadın polis əməkdaşlarının cəlb olunmasını təmin etmədiklərinə, bununla qanunun müvafiq tələblərini pozmalarına baxmayaraq, ifadə etmək istəmədiyim tərzdə tərbiyəsizliyə yol veriblər. Bununla da zabit şərəfinə və kişilik anlayışına ləkə gətirən davranış nümayiş etdiriblər (belə görünür, bu anlayışlar onlar üçün karyera qurmaq maraqlarından xeyli əhəmiyyətsizdir).

3. Saxlanma prosesində iştirak edən polis rəisinin Leyla xanımı erməni adlandırması, bu yolla”qəhrəmanlığına” don geydirməsi başa düşülən deyil. Belə primitiv düşüncə sahiblərinin nəinki hansısa heyətə rəhbərlik etmək,  qanunun keşiyində durmaq imkanları belə şübhə doğurur. Əgər bu şəxs “tualetdə güdmə” əməliyyatına Leyla xanımın məlum millətə aidiyyatı ilə əlaqələndirirsə, belə çıxır ki, YAP rəsmilərinin verdiyi məlumata görə, həmin millətdən olan və sayı 30 mini keçən vətəndaşlarımız onun bu şakərindən ehtiyatlanmalıdırlar.

Hörmətli cənab nazir!

Məlum əməliyyatın həyata keçirilməsi zamanı səhlənkarlığa, qanun pozuntusuna, mənəviyyatsızlığa yol vermiş polis əməkdaşlarının müvafiq qaydada cəzalandırılmasını Sizdən xahiş edirəm.

Belə ədalətli qərarı qəbul etməklə Siz, bir Nazir kimi Azərbaycan hökumətinin adına yazılmış bu biabırçılığı təmizləmiş, eyni zamanda, Azərbaycan qadını kimi uca ada  edilmiş hörmətsizliyi aradan qaldırmış olardınız.

Hörmətlə,

Vətəndaş və İnkişaf  Partiyasının(VİP) sədri Əli Əliyev