Ramiz Ənvəroviç nədən narazıdır?

Avqustun 29-da Prezident  Administrasiyası rəhbərinin KİV redaktorları ilə görüşü, görünür, dövlətin KİV-ə “qayğısı” yolunda növbəti mərhələ olacaq.

Bu hadisəyə qiymət versək, o, xəbərdarlıqlar və hədələrlə dolu sərt təlimat kimi görünürdü. Bu mənada Mehdiyev administrasiya rəhbərindən daha çox prokuror rolunda çıxış edib.

Belə ki, Mehdiyevin KİV-ə “irəli sürdüyü” əsas tezislər və əsas iradlar:

Onları bir neçə kateqoriyaya bölmək olar – ideologiya, siyasət, mənəvi-etik normalar.

Maraqlıdır ki, Mehdiyev ifadə və KİV azadlığına və müstəqilliyinə zəmanət verən Konstitusiyadan, ölkə qanunlarından sitat gətirir və onlara istinad edir. Lakin jurnalistlərin fəaliyyətinin əsasına qanunları deyil, vətənpərvərlik, milli dövlətçiliyə sadiqlik kimi anlayışı qoyur. Məhz bu, KİV-in fəaliyyətinin ideoloji əsasını təşkil etməlidir, Mehdiyev belə hesab edir.

Siyasətə gəlincə, administrasiya rəhbəri, demək olar ki, redaktorların üzərinə bütün “ədalətli və vicdanlı” insanların gördüyü dövlət-siyasi sistemdə islahatlarda böyük uğurların, bütün sahələrdə böyük nailiyyətlərin olduğunu etiraf etmək öhdəliyi qoydu.

Mehdiyevin məntiqinə görə, bu uğurların mövcudluğunu şübhə altına alanlar avtomatik olaraq ölkənin və xalqın düşməni olur.

Beləliklə, ölkənin xoşbəxt bu gününə və işıqlı gələcəyinə kim inanmır? Mehdiyevə görə, bu, Sülh və Demokratiya İnstitutu, Reportyorların Azadlıq və Təhlükəsizlik İnstitutu, Hüquq Maarifçiliyi Cəmiyyəti, Seçkilərin Monitorinqi və Demokratiyanın Tədrisi Mərkəzi və digər “xarici dairələrə agentlik rolunda çıxış edən siyasiləşmiş QHT-lər”dir.

“Bu, hiddət doğurmaya bilməz”, deyən Mehdiyev “ədalətin” artıq qalib gəldiyini və bütün bu QHT-lərin həbs edildiyini və ya ölkədən kənarda olduğunu əlavə etməyi unudub.

Bu “anti-Azərbaycan şəbəkəsinin” fəaliyyəti yüksək qrantlar müqabilində, insan hüquqlarının müdafiəsi adı altında xarici təşkilatlara, dairələrə donoslar göndərməkdən, Azərbaycanın üzvü olduğu beynəlxalq təşkilatlarda ölkəmizə qarşı kampaniyalar təşkil etməkdən ibarətdir.

Mehdiyev hesab edir ki, QHT və KİV-lərdən ibarət bu “5-ci kolon” xaricdəki erməniyönlü qüvvələrin və qurumların göstəriş və təlimatları ilə hərəkət edir. “Sxem çox sadədir. Həmin QHT-lər və KİV-lər müvafiq tapşırıq əsasında Azərbaycanın daxili və xarici siyasətini ləkələmək məqsədi güdən, əsassız, subyektiv mülahizələrdən ibarət, bir çox hallarda isə iftira xarakterli donoslar hazırlayır və ölkəmizə qarşı qərəzli münasibəti ilə seçilən xarici təşkilatlara göndərir, onların əsasında da həmin qurumların bəyanatları hazırlanır və yayılır”.

O, bu fəaliyyətə nümunə kimi “absurd siyasi məhbus siyahılarını”,  insan hüquqlarının pozulması, vətəndaş cəmiyyəti institutlarına və KİV-lərə, jurnalistlərə “təzyiqlər” barədə uydurmalar, korrupsiya problemini göstərib.

“Anti-xalq” və “düşmənçilik” fəaliyyətinin nümunəsi kimi Mehdiyev hüquq müdafiəçilərinin yazıçı Əkrəm Əylislinin müdafiəsinə qalxaraq, onun fikrini ifadə etdiyinə görə təqib edildiyini iddia etməyə çalışdıqlarını göstərib.

Təqsirsizlik prezumpsiyasını pozan administrasiya rəhbəri hüquq müdafiəçisi Leyla Yunusu ermənilərin xeyrinə casusluqda və dövlətə xəyanətdə ittiham edib.

“Bütün bunlar təkcə Azərbaycan hakimiyyətinə qarşı deyil, Azərbaycan xalqına qarşı düşmənçilik və milli xəyanətdir”, deyə o qeyd edib.

Azərbaycan hakimiyyətinin gözdən salınmasında liderlik edən KİV-lər arasında Mehdiyev “Azadlıq” qəzetini və “Azadlıq” radiosunu göstərib.

Daha sonra Mehdiyev rəsmi Vaşinqtonun üzərinə düşərək, az tanınan publisist Maayan Yafedən sitat gətirib: Nə qədər ki, Konqres “Azadlıq” radiosuna istədiyini dərc etməyə imkan verir, Yaxın Şərqdə hava hücumlarına cəlb olunmuş və Orta Şərqdə münasibətləri pisləşən ABŞ-dan müttəfiq ölkələr də uzaqlaşacaq.

Mehdiyev “Anti-Azərbaycan şəbəkəsinin” üzvlərindən ayılmağı və Azərbaycanın düşmənlərinə işləməkdən və “donoslar” hazırlamaqdan imtina etməyi tələb edib, əks halda onlar məsuliyyətə cəlb ediləcəklər, deyə o, hədələyib.

QHT-lərlə “haqq-hesabını” bitirən Mehdiyev, nəhayət, KİV-dəki vəziyyətin təhlilinə keçib. Buna cəbhədə avqustun 1-dən 5-dək baş verən son qarşıdurmalar əsas olub. Mehdiyev bəzi KİV-lərin bu hadisələrlə bağlı rəsmi şərhləri deyil, öz təfsirlərini verməsindən qəzəblənib.

Bundan başqa, Mehdiyev ədalətli olaraq, hərbi hissələrin və döyüş texnikasının yerdəyişməsi, itkilərin sayı, yaralanan və həlak olan hərbiçilərin adları haqqında məlumat verən bir sıra KİV-ləri tənqid edib. Bunun səbəbləri kimi administrasiya rəhbəri “adekvat” fəaliyyət göstərə bilməyən ictimaiyyətə müvafiq məlumatı verə bilməyən bəzi dövlət qurumlarının təqsirini də etiraf edir.

Lakin hərbi xarakterli məlumatların yayılmasında əsas təqsiri Mehdiyev jurnalistlərin və internet-resursların peşəkar olmamasında görür. O, həmçinin silahlı qüvvələri “nüfuzdan salan” və düşmənin dəyirmanına su tökən hərbi ekspertlərin şərhlərini tənqid edib.

Konkret KİV adı çəkməyən Mehdiyev onları Müdafiə Nazirliyinin məlumatını gözləmədən hərbi məlumatları dərc etməkdə ittiham edir. Misal kimi Mehdiyev avqustun 7-də Tovuzda saxlanılan Karen Petrosyan məsələsini göstərir. Bu hadisənin Müdafiə Nazirliyi və KİV tərəfindən müxtəlif şəkildə təqdim edilməsi ordunun nüfuzuna ziyan vurub və etibarsızlıq yaradıb.

Avqustun 26-da da buna bənzər hadisə baş verib, saytlardan biri başqa bir “erməni diversantının” saxlanılması haqqında yanlış məlumat yerləşdirib. “Prezident Administrasiyasının müdaxiləsindən sonra həmin məlumat saytlardan çıxarılıbdır. Lakin bir neçə saat keçdikdən sonra həmin məlumat yenidən saytların birində yerləşdirilib və digər resurslar da, hətta xəbərdarlıq olunmuş saytlar da onu təkrar veriblər”.

Daha sonra Mehdiyev “düşmənin” məlumatlarının ilkin formada dərc edilməsini yolverilməz adlandırıb.

O, həmçinin bir çox saytları və KİV-i reytinqi artırmaq üçün plagiat, uydurma məlumatlar və “sensasiyalar” dərc etməkdə ittiham edib.

Çıxışına yekun vuran Mehdiyev Milli Təhlükəsizlik Konsepsiyasından və Dövlət Sirri haqqında Qanundan sitat gətirərək, jurnalistlərdən hərbi sirləri yaymamağı tələb edir və onların pozulmasına görə məsuliyyət daşıdıqlarını xatırladır.

O, jurnalistləri prezident İlham Əliyevin və onun komandasının son 11 ildə həyata keçirdiyi nailiyyətləri “obyektiv” qiymətləndirməyə çağırıb.

Qeyd edək ki, Mehdiyevlə görüşdə iştirak edən KİV-lərin mütləq əksəriyyəti və ya hamısı rəsmi, hökumətyönlü və hakimiyyətlə əməkdaşlıq edən qurumlar idi. Mehdiyevin danladığı KİV-lər görüşdə yox idi. Lakin ən maraqlısı odur ki, Mehdiyevin qeyd etdiyi pozuntulara məhz hökumətyönlü KİV-lər yol verib.

Hakimiyyətin uzun illər davam edən müstəqil KİV ovu, əlaltı KİV-lər üçün şərait yaradılması, onların daim maliyyələşdirilməsi mətbuatın peşəkarlıq səviyyəsinə ciddi ziyan vuraraq, obyektivlik kimi anlayışları arxa plana keçirib.

Bunun nəticəsi kimi mətbuat Jurnalistlərin Peşə Kodeksinin mövcudluğunu unudub, reket, ən bəsit yalan, ləkəyaxma, siyasi və kriminal sifarişlərin yerinə yetirilməsi prinsipləri çoxdan prioritetə və normaya çevrilib. Həqiqət anlayışı və ya onu tapmaq istəyi isə çoxdan əksər KİV-lərin məqsədi deyil.

Uzun illər müstəqil KİV boğulub və məhv edilib. Bu, maliyyə, güc və digər metodlarla həyata keçirilib. Bu gün jurnalist peşəsi artıq nüfuzlu və maraqlı deyil.

Əsl jurnalistlər  təbliğatçılar və hökumət buyruqcuları ilə əvəzlənib, amma hakimiyyət onları belə idarə edə bilmir.

Buna görə, yaranmış vəziyyətdə Ramiz Ənvərovic  və onun komandası, ilk növbədə, özünü günahkar bilməlidir.