A.HACILI: PARTİYALARIN BİRLƏŞMƏSİ GƏLƏCƏYİN İŞİDİR

    BAKI/02.08.10/TURAN: Müsavat Partiyası mərkəzi icra aparatının rəhbəri Arif Hacılı müxalifət qüvvələrinin 31 iyul aksiyası ilə bağlı şərh verib.
     A.Hacılı aksiyanın keçirilməsini ictimaiyyətin diqqətini ölkədə seçkiöncəsi durumun pis olmasına yönəltmək olduğunu xüsusi vurğulayıb. Dinc keçən aksiyaya polis müdaxiləsini pisləyən A.Hacılı bu müdaxilə nəticəsində 70-ə qədər şəxsin saxlandığını, 7 nəfərin cərimə edildiyini, 10 nəfərin isə müəyyən müddətə inzibati həbs cəzası aldığını deyib.
     Saxlanılan bəzi şəxslərin polis müşaiyətilə şəhərdən kənara çıxarılmasına toxunan A.Hacılı bunu insanların müəyyən müddətə polis girovluğunda olması və qanunsuzluq adlandırıb. `Daxili işlər naziri Ramil Usubov elə faktların olmasını inkar edir, mən özüm də daxil olmaqla, bir xeyli adamı polislər Qobustan qəsəbəsində qoyub şəhərə qayıdıblar`, - deyə A.Hacılı qeyd edib.
     Müsavat və Xalq Cəbhəsi Partiyalarının birləşməsilə bağlı proses barədə danışan A.Hacılı bunu gələcəyin işi adlandırıb. O, birləşmə məsələsində təkcə Xalq Cəbhəsi və Müsavat partiyalarının yox, Məmmədəmin Rəsulzadə və Əbülfəz Elçibəy platformasında olan bütün qüvvələrin birləşməsinin nəzərdə tutulduğunu bildirb. Onun fikrincə, hazırda seçkilərə bir blokda qatılmaq Müsavat və Xalq Cəbhəsi partiyaları üçün əsas məsələdir.
     Seçkilərlə bağlı blokun hansı işlər görməsilə bağlı A.Hacılı hazırkı mərhələdə hansı dairədə hansı namizədlərin irəli sürülməsinin üzərində işləndiyini qeyd edib.-05B-