"Biz dialoqdan imtina etmirik, amma o, predmetli olmalıdır" - Əli Kərimli

Bakı/29.04.20/Turan: Azərbaycan Xalq Cəbhəsi Partiyası (AXCP) siyasi mübarizədə zorakı metodları rədd edir və qeyri-etik ifadələri işlədilməsini özünə rəva bilmir.

AXCP hakimiyyətlə dialoqdan imtina etmir, amma hesab edir ki, söhbət predmetli, mövcud problemlər haqqında olmalıdır və müxalifətin "ələ alınması" ilə yekunlaşmamalıdır. Bu barədə AXCP lideri Əli Kərimli Pressklub TV-nin "Rakurs" verilişində tanınmış jurnalist Arif Əliyevə videomüsahibəsində deyib. 

Kərimli bildirib ki, karantin rejimi şəraitində o, mənzilində tamamilə təcrid edilib.

Belə ki, aprelin 13-dən etibarən İnterneti, telefon əlaqələri kəsilib, ondan müsahibə almaq üçün gələn jurnalistlər isə saxlanılma və hücumlara məruz qalıb.

Bununla belə, Kərimli qeyd edib ki, müasir həyatda tamamilə informasiya blokadası yaratmaq mümkün deyil. Hətta İnterneti kəsildikdən sonra belə o, ən az 9-10 müsahibə verib.

"İnformasiya blokadasının" səbəblərinə gəlincə, o, hakimiyyətin Kərimlinin, guya karantin şəraitində ictimai fikri çaşdırması haqqında yanlış iddiasını göstərib.

"Bütün telekanallar, radio, qəzetlər, sosial şəbəkələrdə onlarla, yüzlərlə resurslar hakimiyyətin əlində olduğu halda, biz necə ictimai fikri çaşdıra bilərik? Amma, görünür, mənim İnternet-mediada on min, yüz min nəfər tərəfindən izlənilən müsahibələrim onları narahat edir. Bu müsahibələrdə də mən etik çərçivəni aşmırdım, qanunları pozmurdum, hər hansı bir qanunsuz çağırışlar etmirdim. Sadəcə olaraq karantin şəraitində əhaliyə ciddi sosial yardım edilməsini tələb edirdim, və deyirdim ki, dövlətin bu tədbirləri təmin etmək üçün vəsaiti var", deyə Kərimli bildirib. 

Dialoq atmosferinə nə mane olur? Bəlkə nifrət dili, tərəflərin  bir-birini demonlaşdırması?

Bu sualla bağlı şərh verən Kərimli bildirib ki, bu problemin kökündə hakimiyyətin yanlış siyasəti durur.

"Hökumətin səhvi sayəsində ölkədə  milli mətbuat çökdürülüb, axırıncı müstəqil "Azadlıq" qəzeti 2016-cı ildə bağlanıb. Bu, hakimiyyətin öz maraqları baxımından da böyük səhv idi. Son illər söz azadlığı İnternetin yaratdığı imkanlar sayəsində daha geniş yayılmağa başladı. Alternativ fikir hələ ölkədə onlarla qəzet çıxdığı zaman belə indiki qədər geniş yayılmırdı. Tənqidi səslər ölkədən xarici köçürüldü, orada heç bir məsuliyyət yoxdur. Ölkədə müstəqil mətbuat olduğu zaman  müəyyən tənzimləmə var idi, cərimələmə, məsuliyyət, müəyyən dərəcədə etik özünüsenzura var idi. Nəticədə, ölkənin içindəki tənqidi media xaricə getməklə media məhv olmadı, daha radikallaşdı", deyə Kərimli bildirib.

Bununla əlaqədar jurnalist Əliyev qeyd edib ki, 1-2 vəzifəli şəxs vəzifədən azad edildikdən sonra siyasi mühacir medialarında, sosial platformalarda söyüş, təhqir səngidi, amma yox olmadı. Onların bəziləri özlərini Kərimlinin tərəfdarı kimi təqdim edirlər.

Kərimli özü deyib ki, onların onunla heç bir əlaqəsi yoxdur.

"Bunun mənə qətiyyən aidiyyəti yoxdur. Mənim "Vatsap"ım da, "Teleqramm"ım da, "Siqnal"ım da hakimiyyətin əlindədir. Mənimlə xaricdə hakimiyyətin ünvanına söyüşlərdən istifadə edən heç bir şəxlə əlaqəm yoxdur, belə bir əlaqə aşkar edilsəydi indi bar-bar bağırardılar. Biz partiyamızda qeyri-etik ifadələrin, xüsusilə də söyüşün yolverilməz olduğu barədə qərar qəbul etmişik. Mən öz tərəfdarlarıma dəfələrlə demişəm ki, öz ailənizin yanında işlətməyi uyğun bilmədiyiniz sözü başqalarının ailəsinin eşitməsini də uyğun bilməməlisiniz. Kimsə belə bir şeyə yol verərsə, birinci mərhələdə partiya tərəfindən cəzalandırılır. Bunu ikinci dəfə etsə, təşkilatdan çıxarılır", deyə Kərimli bildirib.

Hakimiyyətin öz rəqiblərinə qarşı siyasətinə toxunan Kərimli qeyd edib ki, "təsir əks-təsir yaradır". 

"Ölkədə milli mətbuatı çökdürür, xaricdən idarə olunan daha radikal mətbuat qazanır. Real müxalifəti sıradan çıxarmağa çalışırlar, radikal xalq qazanacaqlar", deyə Kərimli bildirib.

Hakimiyyət və Kərimlinin təmsil etdiyi müxalifət arasında dialoq imkanı görürsünüz, yoxsa körpülər yandırılıb?

"Biz dialoqdan imtina etməmişik", deyən Kərimli qeyd edib ki, AXCP-ni və Demokratik Qüvvələrin Milli Şurasını nəzərdə tutur.

Onun sözlərinə görə, Prezident Administrasiyasının şöbə müdiri Ədalət Vəliyev AXCP-ni görüşə dəvət etdikdə Kərimli öz müavini Seymur Həziyə danışıqlar üçün səlahiyyət verib.
"Amma biz hesab edirik ki, dialoq predmetli olmalıdır. Ötən illərdə nə qədər dialoq imitasiyaları görmüşük? Bütün bunlar "alqı-satqı", müxalifətçilərin "konstruktivləşməsi" ilə nəticələnib", deyə Kərimli qeyd edib. 

O qeyd edib ki, AXCP dialoq üçün 4 mövzü müəyyən edib:

- seçki islahatlarının müzakirəsi;

- siyasi məhbusların azad edilməsi;

- Qarabağ münaqişəsinin həlli və ölkə təhlükəsizliyinin təmin edilməsi;

- sərbəst toplaşmaq azadlığının təmin edilməsi.

"Amma dialoqa müxalifəti susdurmaq, satın almaq vasitəsi kimi baxılmamalıdır", deyə Kərimli bildirib.

O, qeyd edib ki, realistdir və başa düşür ki, sadalanan məsələlərlə bağlı birdən-birə razılıq əldə etmək mümkün deyil. 

"Biz demirik ki, hər şeyi birdən həll edəcəyik. Amma qoy hakimiyyət yol xəritəsi elan etsin, göstərsin ki, insan hüquq və azadlıqları, qanunun aliliyi nə vaxt tamamilə təmin ediləcək, bunun üçün zəruri məhkəmə islahatları nə vaxt aparılacaq", deyə Kərimli qeyd edib.

O bildirib ki, hakimiyyətin çox böyük səlahiyyətləri və resursları olsa da, amma o özü müxalifət təyin edə bilməz.

"Müxalifəti hakimiyyətdən narazı olan xalq seçir", deyə Kərimli bildirib. 

Onun fikrincə, müxalifətlə hədə-qorxu dili ilə danışmaq vəziyyətdən çıxış yolu deyil.

Onun sözlərinə görə, AXCP dinc, konstitusiyaya uyğun siyasi mübarizə vasitələrinin tərəfdarıdır və əsas məqsədi azadlıq və xalqın rifahıdır. 

Bizim hamımızı milli ideya, hər kəsin hüquqlarını və rifahını təmin edən dövlət yaratmaq ideyası birləşdirməlidir", deyə Kərimli qeyd edib. -06D-