İstanbulda "3+3" regional məşvərət platformasının üçüncü iclası
'3+3' formatı ilə bağlı: 'Avropa İttifaqı və ABŞ-ni əngəlləmək istəyirlər'
Oktyabrın 18-də İstanbulda Türkiyə, Azərbaycan, Ermənistan, Rusiya və İran xarici işlər nazirlərinin iştirakı ilə "3+3" formatında üçüncü görüş keçirilir.
"3+3" formatına Gürcüstan da daxil edilsə də, bu ölkə əvvəlki görüşlər kimi, bu görüşdə də iştirak etməyəcəyini açıqlayıb.
"TRT Haber" kanalının məlumatına görə, görüşdə rəsmi Ankaranın Azərbaycan və Ermənistan arasında sülh razılaşmasının imzalanması, habelə buna paralel olaraq Ermənistan-Türkiyə münasibətlərinin normallaşmasına dəstəyi ifadə olunacaq.
Milli Məclisin Beynəlxalq münasibətlər və parlamentlərarası əlaqələr komitəsinin üzvü Rasim Musabəyov "Turan"a bildirib ki, hər bir halda bu, bir dialoqdur: "Orada hər hansı müqavilələrin imzalanması və ya bəyanatların verilməsi nəzərdə tutulmayıb. Amma bir dialoq platforması kimi faydalıdır".
Deputat qeyd edib ki, platforma görüşü çərçivəsində qısa da olsa, Azərbaycan-İran, Türkiyə-Ermənistan, Azərbaycan-Ermənistan danışıqları aparıla bilər: "Hər bir halda həm ikitərəfli, həm çoxtərəfli dialoq faydalıdır. Ancaq hər hansı nəticəni gözləməyə dəyməz".
Siyasi şərhçi Nəsimi Məmmədli isə AzadlıqRadiosuna bildirib ki, "3+3" formatı formalaşdırılan zaman onun əsas məqsədi açıq şəkildə elan edildi: "Regionun üç böyük dövləti və Cənubi Qafqazın üç dövləti arasında əməkdaşlıq kontekstində bir müzakirə müstəvisi yaradılsın. Burada məqsəd regiondankənar dövlətlərin hərbi-siyasi mövcudluğunu məhdudlaşdırmaqdır. Xüsusilə burada Avropa İttifaqı və ABŞ nəzərdə tutulur ki, onların regionda aktiv iştirakını bu format vasitəsilə mümkün qədər əngəlləmək istəyirlər".
Ekspertin sözlərinə görə, ikinci məqsəd ondan ibarət idi ki, mövcud olan münaqişələri, ziddiyyətləri bu format daxilində müzakirə edərək yoluna qoysunlar. Onun fikrincə, məqsədləri odur ki, bununla regionda baş verə biləcək lokal münaqişələr zamanı kənar dövlətlərin bura daxil olması imkanını ardan qaldırsınlar.
N.Məmmədli vurğulayır ki, "3+3" formatından xüsusi bir gözləntisi yoxdur: "Bu, elə bir format deyil ki, hansısa qarşılıqlı öhdəliklər olsun. Bu, sadəcə bir müzakirə müstəvisidir".
Bu formatda ilk görüş üç il əvvəl, dekabrın 10-da Moskvada keçirilib.
Bundan əvvəlki iclaslarda çoxşaxəli regional əməkdaşlığın inkişaf perspektivləri müzakirə edilib.
Gürcüstanda bu formatda iştirak etməmələrini Rusiya ilə münasibətlərinin yaxşı olmaması ilə izah edirlər.
Cəmiyyət
-
Şəkidə vətəndaşın polis şöbəsində təzyiqə məruz qaldığı və səbəbsiz həbs olunduğu deyilir.
-
Oktyabrın 19-da paytaxtda qısamüddətli yağıntı davam edəcək. Şimal-qərb küləyi əsəcək.
-
Şamaxı rayonunun Kərkənc kəndində sakinlər bir maşın suya 35 manat ödədiklərini bildirirlər. (kəndə ayda beş-altı dəfə belə su maşınları gəlir) Susuzluq, onların sözlərinə görə, imkanlarını, səliqə-sahmanlarını və təsərrüfatlarını sınağa çəkir.
-
Qəbələ rayonunda 2 nəfərin ölümü, 1 nəfərin xəsarət alması ilə nəticələnən silahlı insident baş verib. Qəbələ Rayon Prokurorluğu bildirib ki, oktyabrın 17-də rayonun Laza kənd sakini Əlibaba Gəncimov Zərgərli kənd sakini Akif Məmmədliyə məxsus fərdi yaşayış evinə silahla hücum edərək həmin evdə yaşayan Gülsadə Məmmədliyevaya atəş açaraq onu öldürüb. Sonra onun nəvəsi Nurlan Məmmədliyevə (2001-ci ildə anadan olub) xəsarət yetirib. Nurlan Məmmədliyev isə odlu silahdan atəş açaraq Əlibaba Gəncimovu öldürüb.
Rəy yaz