Bakının köhnə mənzil fondunun böyük hissəsi qəzalı vəziyyətdədir

Bakı/19.05.22/Turan: Mayın 8-də Bakının Xətai rayonunun Araz Novruzov 34 ünvanında yerləşən binanın bir hissəsi uçub. 1933-cü ildə tikilən bu binanın qəzalı vəziyyətdə olduğu bildirilir.

Digər qəzalı bina Nəsimi rayonunun Mirəli Qaşqay 72 ünvanında yerləşir. Bina sakinləri deyir ki, 120 yaşı olan bu bina dağılmaq üzrədir.

Mütəxəssislər isə deyirlər ki, bu tipli binalar Bakının hər rayonunda var.

Aprel ayında Bakı şəhərində qəzalı vəziyyətdə olan, öz resursunu başa vurmuş çoxmənzilli yaşayış binalarının inventarizasiyası və bu binalarda yaşayan sakinlərin təhlükəsizliyinin təmin edilməsi ilə bağlı zəruri tədbirlərin görülməsi məqsədilə müvafiq komissiya yaradılıb.

Komissiya yaradılıbsa vəziyyət niyə bu yerə gəlib çıxıb? Qəzalı binalarla bağlı vəziyyət nə yerdədir? Ümumiyyətlə, Bakıda hazırda yaşayış olan nə qədər qəzalı bina var?

Araz Novruzov 34 ünvanında yaşayan sakinlər Turan-a bildiriblər ki, onların yaşadıqları şəraitdə yaşamaq mümkün deyil. "Su başımıza tökülür, döşəmə tam çürüyüb, yerə ağır bir şey belə qoymaq olmur. Elektrik naqilləri özü-özünə tez-tez alışır».

Bəzi sakinlər deyirlər ki, bu şəraitsizlikdən evdən çıxıb kirayədə qalırlar.

Məsələ ilə bağlı Xətai Rayon İcra Hakimiyyətindən Turan-a bildirilib ki, həmin ünvan daxil olmaqla, qəzalı binaların inventarizasiyası keçirilib və yaxın zamanlarda qəzalı və kəskin qəzalı binalarla bağlı qərar veriləcək. "Qəzalı vəziyyətdə olan binalar tərəfimizdən nəzarətdə saxlanılır".

Bakı Şəhər İcra Hakimiyyətindən isə Turan-a bildirilib ki, qurumun başçısının müvafiq Sərəncamına əsasən yaradılan komissiyanın tərkibinə şəhər və paytaxt rayonlarının İcra Hakimiyyətlərinin məsul nümayəndələri daxildir. "Qəzalı binalarda yaşayan sakinlərin təhlükəsizliyinə görə Rayon İcra Hakimiyyəti başçıları şəxsən məsuliyyət daşıyır".

Qeyd olunub ki, Bakının bütün rayonlarında komissiya üzvləri inventarizasiya işlərini həyata keçirirlər. "Məlumatları təhlil edərkən məlum olur ki, qəzalı binaların sayı çoxdur. İlk növbədə bu, SSRİ dövründən qalan binalardır. Amma son 4 il ərzində cənab Prezidentin siyasəti nəticəsində bu cür binaların sayı 30 faiz azalıb".

Qurumdan vurğulanıb ki, proses davam edir. "İnventarizasiya gedir, məlumat bazası yaradılır. Məlumatlar tam təqdim olunandan sonra bu binalar kateqoriyalara bölünəcək və lazım olan tədbirlər görüləcək".

BŞİH-dən bildirilib ki, hazırda qəzalı vəziyyətdə olan binaların sayı 1000-ə yaxınlaşır.

Əmlak məsələləri üzrə ekspert Ramil Osmanlı isə bildirib ki, bu proses əslində çoxdan başlayıb. "3 il əvvəl Bakının 12 rayonunda təqribən 1500-dən yuxarı binaların söküntüsü ilə bağlı Nazirlər Kabineti qərar qəbul etmişdi. Bura daha çox qəzalı, eyni zamanda köhnə yaşayış fonduna aid olan çoxmənzilli binalar daxil idi. Həmin prosesdə Fövqəladə Hallar Nazirliyi tərəfindən də paytaxtda qəzalı binalarlın sayını əks etdirən hesabat təqdim olunmuşdu, amma sonuncu rəqəm barədə dəqiq məlumat yoxdur".

Ekspert hesab edir ki, bu gün paytaxtda köhnə yaşayış fondunun yarısı qəzalı olmasa da, istismar müddəti başa çatmış binalardan ibarətdir. "Yəni, təqribən ötən əsrin ortalarında inşa olunmuş binaların daha çox beton konstruksiyalardan ibarət olduğunu nəzərə alsaq, hesab edirəm ki, artıq o binalarda yaşamaq təhlükəlidir".

O qeyd edib ki, aidiyyatlı orqanlar məsələ ilə bağlı monitorinq aparıb konkret nəticə ortaya qoymayıb. "Bakı Şəhər İcra Hakimiyyətinin yanında Mənzil-Kommunal Təsərrüfatı Departamenti, hansı ki, paytaxtdakı bütün binalar həmin qurumun balansındadır, köhnə mənzil fonduna aid olan binaların neçəsinin qəzalı olması ilə bağlı dəqiq məlumat verə bilər. Amma bu, yoxdur".

Osmanlının sözlərinə görə, bir neçə il əvvəl ümid var idi ki, yaxın zamanlarda Bakıda demək olar köhnə yaşayış fonduna aid olan binalardan yalnız "Leninqrad", "Kiyev" və "Eksperimental" layihəli binalar qalacaq. "Qalanlar hamısı söküləcək və onların yerində yeni binalar tikiləcək. Amma bu, olmadı". -0-