Laçın qaçqını həkimlərdən şikayət edir

Laçın rayonundan məcburi köçkün, İmişlidə yaşayan birinci qrup əlil Vahid Cəfərov prezident İlham Əliyevə açıq məktubla müraciət edib.

Məktubun surətləri həmçinin Heydər Əliyev Fondunun prezidenti Mehriban Əliyevaya, baş prokuror Zakir Qaralova, səhiyyə naziri Oqtay Şirəliyevə və ombudsman Elmira Süleymanovaya göndərilib.

Cəfərov yazır ki, 15 iyul 2012-ci ildə o, qadın sürücünün təqsiri ucbatından baş vermiş YNH-ə düşüb. Nəticədə Cəfərov bir böyrəyini itirib, digər böyrəyi isə funksiyasını itirib və dializlə dəstəklənir.

Onun sözlərinə görə, Fizuli rayon xəstəxanasının Anar adlı həkimi 6000 manat müqabilində Bakıda Neftçilər Xəstəxanasında Heydər Əliyev Fondunun xeyriyyə aksiyası çərçivəsində böyrək köçürülməsi əməliyyatı təşkil etməyi təklif edib.

Cəfərovun sözlərinə görə, o, rəsmi olaraq xəstəxanaya 3000 manat köçürüb. Lakin 7 xəstənin əməliyyatı ilə bağlı söz verilmiş xeyriyyə aksiyası baş tutmayıb. Bu zaman nə xəstəxana, nə də həkim Cəfərovun pulunu qaytarmır. 

Cəfərov pulunun qaytarılmasına və müalicəsinə köməklik göstərilməsini xahiş edir.

YNH-nin araşdırılmasına gəlincə, təhqiqatı İmişli rayon polisi aparır. 

“Əvvəlcə müstəntiq təqsiri mənim üstümə atmaq istədi, amma DİN-ə şikayətlərimdən sonra yeni təhqiqat başladı və iş başqa müstəntiqə verildi. İndi mən zərərçəkmiş kimi qəbul edilmişəm. Məni yolda atıb gedən YNH təqsirkarı və onun qohumları bir dəfə belə səhhətimlə maraqlanmayıblar”, deyə Cəfərov Turan-ın müxbiri ilə söhbətində bildirib.

Yaxın günlərdə o, Bakıda mətbuat konfransı keçirmək və müsibətləri haqqında ətraflı danışmaq niyyətindədir.

Öz növbəsində, Neftçilər Xəstəxanasında Cəfərovun şikayətini şərh edərkən xəstədən xidmət göstərilmədən pul alınması mümkünlüyünü istisna ediblər.

Belə ki, Neftçilər Xəstəxanası direktorunun birinci müavini Həbib Yüzbaşıyev Turan-a bildirib ki, bu müalicə müəssisəsində son vaxtlar pulsuz böyrək nəqli aksiyaları elan edilməyib və ən azından ilin sonuna qədər belə əməliyyatlar keçirilməsi nəzərdə tutulmayıb.

Bundan başqa, əməliyyat keçirilməzdən əvvəl xəstə və donor müayinədən keçməlidir, qan nümunələri təhlil üçün Türkiyəyə göndərilir, belə ki, Azərbaycanda hələlik belə araşdırmaların keçirilməsi üçün imkan yoxdur.

Bu xidmətlər bahalıdır və bir neçə min manata başa gələ bilər. Əməliyyat özü isə 12 min manata başa gəlir, deyə Yüzbaşıyev bildirib. -06D-