Media-icmal 06.04.21

Azərbaycanda ticarət sahəsindəki durum, mövsümi meyvələrin qiymətlərinin bahalığının səbəbləri, uşaq bağçalarının işləməsilə bağlı qərardakı ziddiyyət, Rusiya sülhməramlılarının səlahiyyət hədlərini aşmaları və s. məsələlər medianın aparıcı mövzuları sırasındadır...

“Müsavat.com” saytı “Nə alsan 1 manata olsa da…  Binə bazarında son durum” sərlövhəli məqalədə “Binə” ticarət mərkəzində ticarətin vəziyyətini dəyərləndirir.

Müəllif deyir ki, pandemiya səbəbilə ticarət mərkəzində alver çox seyrəlib, elə satıcılardan birinin  müştərilərilərə “nə alsan 1 manat, nə alsan 1 manat...Gəlin, aparın, heç yerdə görməzsiniz” çağırışı da bunun göstəricisidir .

Müəllif də təsdiq edir ki, dükanda həqiqətən bütün geyimlərin qiyməti cəmi 1 manatdır, burada qadınlar və uşaqlar üçün istənilən çeşiddə geyim tapmaq mümkündür.

Müəllifin sözlərinə görə, seyrək də olsa, istər satıcı, istər müştəri pandemiya qaydalarına əməl etməklə alver edirlər, bazar günü olsa da, müştəri “yox” dərəcəsindədir. 

“Bu durğunluğun bir səbəbi karantin rejiminin tətbiqidirsə, digər bir səbəbi insanların kütləvi toplanma yerlərinə getməməyə çalışmasıdır”, deyə müəllif ticarət mərkəzindəki durğunluğun səbəbini izah edir.

Ticarətçilərə görə, pandemiya üzündən ucdantutma bütün obyektlər ziyan ediblər, elə ən böyük zərbə də ticarət sektoruna dəyib.

Satıcılar hesab edirlər ki, karantini sərtləşdirmək istəyənlər insanların necə dolanacaqlarını düşünmürlər, odur ki, sərt karantinə gedilməməlidir. Ticarətçilər fikirlərini onunla əsaslandırırlar ki, bundan öncə də sərt tədbirlər tətbiq olundu, amma  gözlənilən nəticəni vermədi. 

“Sfera.az” saytında isə “175 manata satılan alça... - Azərbaycanda meyvə qiymətləri niyə “od tutub yanır?” sərlövhəli məqalədə mövsümi meyvələrin baha olmasının səbəbləri müzakirə edilir.

Müəllif deyir ki, bir neçə ildir ki, mart-aprel aylarında mövsümi meyvələr olan alça və gilasın qiymətləri göz qamaşdırır. Bir neçə gün öncə sosial şəbəkələrdə deyilirdi ki, alçanın kiloqramı 175 manata təklif edilir.  

Müəllif əlavə edir ki, hətta aprelin sonu, mayın əvvəlində də bəzən mövsümi meyvələrə  “əl uzatmaq” olmur, necə deyərlər qiymətlər “od tutub yanır”.

Müəllif bu il mövsümi meyvələrin qiymətlərinin hamı üçün əlçatan olub-olmayacağını isə kənd təsərrüfatı mütəxəssisi Vahid Məhərrəmovla müzakirə edir.  

Məhərrəmova görə, qiymətlərin dəyişkənliyinin səbəbi məhsuldarlıqdan asılıdırsa, məhsuldarlığa da təsir edən qlobal iqlim dəyişikliyidir. Onun fikrincə, mövsümi meyvələrin bahalığı da buradan irəli gəlir.

Ekspertə görə, məhsuldarlığın aşağı olmasında bağbanların da günahı var. Belə ki, bu istiqamətdə lazımi səviyyədə maarifləndirmə işi aparılmır. 

Məhərrəmova görə, indi ümid havaların necə keçəcəyinə qalıb, belə ki, hava kəskin dəyişsə məhsuldarlıq aşağı, qiymətlər isə baha olacaq.

“Redaktor.az” saytı “Bakıda uşaq bağçaları işləyir, yoxsa işləmir? – müəmmalı qərar” sərlövhəli məqalədə iki gün öncə Bakı, Abşeron, Sumqayıt, Gəncə, Şəkidə uşaq bağçalarının bağlanmayacağı ilə bağlı Təhsil Nazirliyinin verdiyi qərarın ziddiyyət yaratdığını bildirir.

Müəllif deyir ki, təhsil naziri Emin Əmrullayev bu günlərdə "Facebook" səhifəsində, pandemiya dövründə bağçaların bağlanmayacağını demişdi. 

Amma dünən, yəni aprelin 5-də uşaqlarını aparan valideynlər bağçaların işləmədəyini görüblər və buna səbəb kimi peyvəndlənmə prosesi göstərilib.  

Təhsil ekpserti Kamran Əsədov isə deyir ki, bağçaların bağlanmayacağı ilə bağlı ötən həftə Təhsil Nazirliyi tərəfindən elan olunan məsələ nazirliyin səlahiyyətindən kənardır.

Əsədov deyir ki, 2011-ci ildən bağçalar və körpələr evi Təhsil Nazirliyindən alınaraq müvafiq icra hakimiyyətlərinin tabeliyinə verilmişdir. Odur ki, həftənin şənbə günü təhsil naziri Emin Əmrullayev uşaq bağçalarının bağlanmayacağını qeyd etdi, əslində isə hazırda uşaq bağçaları fəaliyyət göstərmir.

“Biz Təhsil Nazirliyinə tabe deyilik, icra hakimiyyətinin qərarına əsasən, fəaliyyətimizi dayandırmışıq”, deyə uşaq bağçalarından bildiriblər.

“Modern.az” saytında “Rusiya “Dağlıq Qarabağ” ifadəsi ilə nə demək istəyir? - şərh” sərlövhəli məqalədə Rusiyanın Qarabağdakı sülhməramlı fəaliyyəti qiymətləndirilir. 

Müəllif diqqəti Ruiya tərəfin Qarabağ məsələsilə bağlı danışdıqda heç də “Qarabağ” yox, “Dağlıq Qarabağ” ifadəsi işlətməsinə çəkir və hesab edir ki, bu, coğrafi ad çəkilməsi deyil, bunun daha çox siyasi anlamı var.  

Politoloqlar da şərhlərində izah edirlər ki, Rusiya 2020-ci il noyabrın 10-da Moskvada imzalanmış üçtərəfli bəyənatn tələblərinə uyğun gəlməyən addımlar atır və Qarabağda sülhməramlı qüvvələrin nəzarət etdiyi əraziləri tədricən genişləndirmək kimi məqsədi var.

Şərhçilər iddia edirlər ki, Azərbaycan ərazisində erməni qoşunundan olan 10000-ə qədər əsgər var və bunun yekunu kimi Azərbaycan ərazi bütövlüyünü təmin etmək üçün yeni müharibəyə, anti-terror əməliyyatlarına da hazırlaşa bilər.

Politoloqlar həm də hesab edirlər ki, Rusiya tərəfi “Dağlıq Qarabağ” ifadəsini işlətməklə bu ərazidə yaşayan ermənilərin status məsələsini qaldırmağa, bunu müzakirə obyektinə çevirməyə işarə edirlər.

Politoloqlar deyirlər ki, qondarma “Dağlıq Qarabağ” ifadəsi sovet dövründə yaradılıb, bu adla Azərbaycan ərazisinin bir hissəsi ermənilərə verilmişdir, indi Azərbaycan öz gücünə tarixi ədalətsilziyi aradan qaldırıb. 

Politoloqalr hesab edirlər ki, ruslar proseslərin normal gedişinə maneçilik törədir və bunun həlli yolu tapılmalıdır.