Media-icmal 14.04.20

Koronavirus pandemiyasının yayılmasına qarşı tətbiq edilən məhdudiyyətlərin dünya ölkələrinin və eləcə də Azərbaycanın iqtisadi, sosial və maliyyə həyatına təsirləri ölkə mediasının aparıcı mövzusu olaraq qalmaqda davam edir...

“Azərbaycan” qəzetində dərc olunan “Neft hasilatının azaldılması qərarı postkoronavirus dövründə bazardakı qiymətə təsir göstərəcək” sərlövhəli məqalədə müəllif mövzu ilə bağlı deputat Vüqar Bayramovla söhbətləşir.

Deputat OPEC+ formatında 2020-ci il aperlin 10-da neft hasilatının 9,7 milyon barel azaldılması haqda qərarını, perspektivdəki ehtimal olunan nəticələrini dəyərləndirir.

V.Bayramov hesab edir ki, bu qərar iki aspektdən tarixi əhəmiyyətə malikdir, əvvəla, OPEC+ heç zaman hasilatın bu həcmdə azaldılmasına getməmişdi, ikincisi, bu qərarla dünya bazarında nefti ucuzlaşdıran Səudiyyə Ərəbistanı ilə Rusiya arasındakı “neft müharibəsi”nə son qoyuldu. 

“Bütün bunlarla yanaşı, “OPEC+” formatında qəbul edilən bu qərar hələlik neftin qiymətinin kəskin artmasına gətirib çıxarmayacaq. Hələlik anlaşmanın bazara təsirləri də ciddi deyil, cüzidir. OPEC bununla qiymətin stabilləşdirilməsinə nail olmağa çalışır”, deyə V.Bayramov bu qərarın indilikdə bazara təsirinə dair şərh verir.

Deputat əlavə edir ki, koronavirus pandemiyasının aktiv dövründə neftin qiymətində kəskin artımlar proqnozlaşdırılmır, səbəb kimi də bazarda təklifin tələbi 20 milyon barelə kimi üstələməsini göstərir.

V.Bayramov hesab edir ki, OPEC qiymətləri stabil saxlamağa, neftin qiymətindəki kəskin ucuzlaşmanın qarşısını müəyyən qədər almağa çalışır, bu isə pandemiyanın təsirlərinin nə zaman azaldılmasından asılı olacaq.

Onun fikrincə, yaxın aylarda pandemiyanın təsirlərini azaltmaq mümkün olarsa, ölkələr arasında nəqliyyat əlaqələri bərpa olunsa, neftə tələbatın yenidən artması “OPEC+” formatının qiymətə təsirinə səbəb ola bilər.

Deputata görə, hasilatın azaldılması ilə bağlı qərar daha çox postkoronavirus dövründə bazardakı qiymətə təsir göstərəcək, hələlik neftin qiymətində ciddi dəyişiklik olmayacaq.

“Azpolitika.info”da  yer alan “Mayın əvvəllərinə qədər karantin rejimi qalmalıdır” sərlövhəli məqalədə isə müəllif koronavirus pandemiyası ilə bağlı tətbiq edilmiş xüsusi karantin rejiminin nə zamana kimi davam etməsi barədə deputat Musa Quliyevlə danışır.

Müəllif son günlərdə koronavirus infreksiyasına yoluxanların azalması, sağalanların artması barədə rəsmi statistik göstəriciləri əsas gətirərək xüsusi karantin rejiminin ləğv oluna bilməsi ehtimalını müzakirəyə gətirir.

Deputat M.Quliyev isə cavab olaraq deyir ki, bu qərarı hökumət verəcək: “Karantin rejimi elədir ki, onun haqqında hər kəsin subyektiv fikir söyləməsi doğru deyil. Operativ Qərargah (Azərbaycan Nazrilər Kabineti yanında yaradılmış Operativ Qərargah nəzərdə tutulur - red.) dünyada gedən prosesləri və Azərbaycanda meylləri müəyən edərək qərar verəcək”, deyə deputat bildirir.

Deputat hesab edir ki, bu həftə ərzində enmələr davam edərsə, yaxın zamanda karantin rejiminin daha yüngülləşdirilmiş formasına keçmək olar, amma karantin rejimindən birdən birə imtina etmək olmaz.

M.Quliyev vurğulayır ki, koronavirus pandemiyasının bir həftə ərzində azalma, növbəti həftədə yüksəlmə kimi dalğalanması var, buna görə də 14 günlük deyil, 28 günlük müddəti gözləmək lazımdır, çünki yoluxan elə insanlar var ki, virusun inkubasiya dövrü ləng gedərək daha sonrakı mərhələdə aşkarlana bilər.

Deputata görə, xüsusi karantin rejimi mayın əvvəlinə kimi davam etdirilməlidir.

“Modern.az”da “OPEK+ razılaşması kömək etmədi - Azərbaycan nefti bahalaşmır” sərlövhəli məqalədə də OPEC + formatında qəbul edilmiş qərarın bazardakı qiymətlərə təsiri barədə danışılır.

Müəllifin sözlərinə görə OPEC+ formatında qəbul edilən məlum qərardan sonra neftin qiyməti cəmi 1 dollar bahalaşıb və bunun da səbəbi kimi neft bazarında hələ də təklifin tələbi iki dəfəyə yaxın üstələməsidir.

Müəllifin sözlərinə görə, OPEK+ ölkələrinin razılaşması bazar iştirakçılarını təəccübləndirmədi, çünki bu razılaşma təklifin tələbi üstələməsinə nail olmadı.

Müəllif əlavə edir ki, bəzi beynəlxalq mənbələr ciddi bahalaşma olmamasını koronavirusla bağlı hərəkət məhdudiyyətlərinin neftə ehtiyacı sutkada 30 milyon barelə qədər azaltması ilə əlaqələndirirlər.

“Neft qiymətlərinin bütün hasilatçılar üçün komfortlu 55-60 dollar səviyyəsinə çatması üçün hasilatın azı 30 milyon barrel azaldılması tələb olunacaq”, deyə müəllif beynəlxalq ekspertlərə istinadən bildirir.

“Mətbuat.az”da dərc olunan “Millət vəkili: Hökumət uşaqpulunu zamanında bərpa etsəydi...” sərlövhəli məqalədə deputat Əli Məsimlinin hökumətin uşaqpulunun verilməsini bərpa etməməsi barədə düşüncələrinə yer verilib.

Deputat hesab edir ki, hökumət uşaqpulunu zamanında bərpa etsəydi, 18 yaşadək uşaqlarla bağlı indiki kimi ağır durum yaranmazdı.

Ə.Məsimli deyir ki, elə ailələr var ki, bir nəfər işləyir və həmin ailənin 190 manatlıq dəstək paketi almayacağı barədə rəsmi açıqlamalar cəmiyyətdə narazılıq yaradıb.

“Təbbi ki, uşaqpulu kimi maliyyə tutumlu bir məsələni indi operativ həll etmək çətindir, amma bu üsul daha faydalı olduğundan, post-pandemiya mərhələsində həlli vacib olan problemlər sırasında öndə getməlidır”, deyə deputat şərh edir.

Ə.Məsimli hesab edir ki, uşaqpulunun bərpası proqramı işə düşənə qədər isə bir sıra ailələrdə yaranmış hazırki gərginlikləri azatmaqdan ötrü beynəlxalq praktikada da tətbiq olunan “uşaqların yeməyini təmin edək” üsulunun tətbiqinə başlanılması, həm də hökumətin valideynləri işləməyən ailələrdəki uşaqlara 3 aylıq müavinət verilməsi zəruridir.

Deputat həm Bakıda, həm regionlarda buna bənzər yardım işlərinin başlanmasını yüksək qiymətləndirir və daha çox qurumların və imkanlı insanların bu xeyirxah əmələ qosulmasını çox zəruri, milli-dini dəyərlər baxımından çox savab iş hesab etdiyini diqqətə çatdırır.