Media-icmal 23.11.20

Azərbaycanın işğaldan azad edilmiş ərazilərində yol infrastrukturu quruculuğuna başlanması, Türkiyə sülhmərmalılarının Azərbaycana gözlənilən gəlişi, akademik Rafiq Əliyevin İkinci Qarabağ Müharibəsini dəyərləndirməsi, Rusiya xarici işlər və Müdafiə nazirlərinin Ermənistana səfərlərinin səbəbləri, avtomobil bazarında qiymətlər və s. məsələlər medianın aparıcı mövzuları sırasındadır...

"Azərbaycan" qəzeti  "Yurd həsrətlilər doğma yerlərə rahat yollarla dönəcəklər" sərlövhəli məqalədə işğaldan azad edilmiş ərazilərdə infrastruktur quruculuğunu dəyərləndirir. 

Müəllif deyir ki, Azərbaycanda yeni yolların çəkilməsinə də xüsusi diqqət verilir, söhbət həm də geniş mənada yollardan gedir: "Son illər Azərbaycanda təkcə kəndlər, rayonlar və şəhərlər arasında deyil, eləcə də ölkəmizi qonşu dövlətlərin ərazisi ilə birləşdirən yeni rahat yollar çəkilib. Azərbaycan həmçinin Şərq-Qərb, Şimal-Cənub marşrutlarının qovşağına çevrilib. Qaradağ rayonunun Ələt qəsəbəsində tikilmiş yeni Bakı Beynəlxalq Dəniz Ticarət Limanı Azərbaycanda avtomobil, su və dəmir yollarının bir-birinə qovuşmasına imkan verir", deyə müəllif bildirir.

Müəllif əlavə edir ki, indi erməni işğalından azad olan ərazilərə yeni və müasir yollar çəkilməlidir. 

O vurğulayır ki, bu işlərə Tərtər rayonunun Suqovuşan və Talış kəndlərinə gedən avtomobil yollarının bərpasından başlanıb, Füzuli rayonundan Şuşa şəhərinə yol çəkilişi ilə bağlı da göstəriş verilib, artıq bu yolun tikintisi gedir.

Bu layihə işğaldan azad edilmiş torpaqlarda icra edilən birinci layihədir.

Müəllifə görə, yeni yol çox rahat, geniş olacaq və Şuşaya rahat gediş-gəlişə imkan verəcək.

Yurd həsrətli insanlarımız və işğaldan azad edilmiş torpaqlara qurub-yaratmaq missiyası ilə qədəm qoyan strukturların nümayəndələri o yerlərə yeni çəkilmiş rahat yollarla gedəcəklər.

"Yenisabah.az" saytı "Türkiyə Ordusunun Qarabağa gəlməsi nəyi dəyişəcək? - Hər hansı təxribat baş verərsə…" sərlövhəli məqalədə Türkiyə sülhməramlı qüvvələrinin Azərbaycana mümkün gəlişini xarakterizə edir.

Müəllif deyir ki, Türkiyə Silahlı Qüvvələrinə məxsus A-400M hərbi təyyarəsi bu günlərdə Lənkəran hava limanına enib, bu isə Türk Ordusunun Azərbaycanda olmasından və Rusiya ilə birgə monitorinq qrupunda yer alacağından xəbər verir.

Həmçinin, Türkiyənin Milli müdafiə naziri Hulusi Akar mətbuata açıqlamasında quru qoşunlarının Azərbaycana göndərilməsi üçün bütün işlərin tamamlandığını, ən tez zamanda Dağlıq Qarabağa əsgər göndəriləcəyini vurğulayıb.

Müəllif əlavə edir ki, 45 gün davam etmiş İkinci Qarabağ müharibəsində Tütkiyə kimi güclü dövlətin Azərbaycanın arxasında olması bəzi risklərdən qorunmağa imkan verib. Bununla Türkiyənin milli təhlükəsizlik məsələsində daim Azərbaycanın yanında olduğu qeyd edilir. 

Müəllif bunu da əlavə edir ki, 2010-cu ildə Türkiyə ilə Azərbaycan arasında "Strateji tərəfdaşlıq və qarşılıqlı yardım haqqında" saziş imzalanıb, bu sazişdə əsas yeri hərbi məsələlər tutur.

"...Türkiyənin monitorinq qrupunda yer alması ola biləcək hansısa təxribatın beynəlxalq səviyyədə də qarşısının alınmasında mühüm rol oynayır. Bu, lazımi addımdır", deyə məqalədə vurğulanır. 

Moderator.az saytı "Vətən Müharibəsini elmi baxımdan "zəka müharibəsi" kimi xarakterizə etmək olar" sərlövhəli məqalədə müəllif 44 gün davam etmiş İkinci Qarabağ Müharibəsinin mahiyyətini akademik Rafiq Əliyevlə dəyərləndirir.

Akademikə görə, bu müharibədə qələbəni şərtləndirən əsas amil "xalq+dövlət+ordu" birliyi oldu və əgər bunların biri olmasaydı, uğur qazanmaq mümkün olmazdı.

Bu müharibəyə elmi baxımdan yanaşma sərgiləyən akademik hesab edir ki, bu müharibənin adını "zəka müharibəsi", "intellekt müharibəsi" qoymaq lazımdır.

"Mən yenə də əvvəlki yazılarımıza istinad etmək istəyirəm. Biz həmişə demişik ki, müharibəni öncə masa, sonra isə döyüş meydanında udmaq lazımdır. Masa arxasında udmaq üçün böyük güc mərkəzlərinin fəzasında optimal bir nöqtə və vaxt seçmək lazım idi. Biz bunu edə bildik. 

Onun fikrincə, zəka özünü ordunun düşmənə qarşı tətbiq etdiyi müasir silah-sursat və texnika amilində də göstərdi: "Biz efirə verilən materiallardan ordumuzun düşməni müasir silahlarla necə məhv etdiyini gördük. Hansı ki, bu müasir texnologiyanın da arxasında süni intellekt amili dayanırdı. Bu baxımdan hesab edirəm ki, Vətən Müharibəsini "zəka müharibəsi" adlandırmaq olar", deyə akademik bildirir.

"Mətbuat.az" saytında "Şoyqu və Lavrov nə üçün Ermənistana getdi? Maraqlı detallar, açıqlama" sərlövhəli məqalədə müəllif haqqında bəhs edilən səfərin mahiyyətini politoloq Məhəmməd Əsədullazadə ilə qiymətləndirir.

Politoloqa görə, Rusiya xarici işlər naziri Sergey Lavrovun və müdafiə naziri Sergey Şoyqunun rəhbərlik etdiyi nümayəndə heyətinin Ermənistana bu günlərdəki səfərinin əsas məqsədi bu ölkədə daxili hakimiyyət dəyişməsinin qarşısını almaq olub.

Politoloq deyir ki, mövcud hakimiyyətin dəyişməsi Qarabağla bağlı durumu və razılaşmanı poza bilər: "Moskva bu məsələdən narahatdir. Ona görə də Putin dünənki açıqlamada Ermənistana ciddi mesajlar verdi. Ölkə daxilində siyasi qüvvələri nəzarətdə saxlamaq və Paşinyanın Qarabağla bağlı üzərinə götürdüyü öhdəlikləri yerinə yetirməsi üçün Sergey Şoyqu və Lavrov Ermənistan siyasi-hərbi rəhbərliyi ilə görüşlər keçirərək mövcud durumun stabilləşməsi üçün tapşırıqlar verəcək.

Siyasi şərhçilər hesab edirlər ki, Ermənistanda yeni siyasi böhranın Qərbin burada güclənməsini diqtə etdiyindən Moskva çalışır ki, indiki vəziyyəti nəzarətdə saxlasın.

Bizimyol.info.az  saytı "Avtomobil bazarında son vəziyyət: Qiymətlər əl yandırır" sərlövhəli məqalədə müəllif ölkənin avtomobil bazarındakı panoramını təqdim edir.

Müəllif vurğulayır ki, Azərbaycanda COVID-19 pandemiyası ilə əlaqədar xüsusi karantin rejiminin müddəti dekabrın 28-nə qədər uzadılıb.

Müəllifin sözlərinə görə, bu qadağanın bazara mümkün təsirləri, oktyabr-noyabr aylarında ilkin və təkrar avtomobil bazarındakı vəziyyət araşdırılıb.

İkinci əl avtomobillərin satışı ilə məşğul olanlara görə, təkrar avtomobil bazarında vəziyyət acınacaqlıdır, bazara gələn çox olsa da maşın alan yoxdur. Alınanlar ancaq köhnə maşınlar və az halda "Mercedes C-class" modelləridir.

1992-1993-cü illərin "VAZ 2106", "VAZ 2199" modellərinə nisbətən tələbat var.

Müəllifə görə, "inamarkalarla" isə maraqlanan yoxdur, qiymətlər də əl yandırır, Məsələn, 1998-ci ilin mühərrik həcmi 1800 kub santimetr olan "Mercedes C-class" avtomobili 12 min manatadır. Qiymətlər hər ay az da olsa qalxmaqda davam edir, ABŞ-dan gətirilmiş avtomobillərin də satışı durğun vəziyyətdədir, alqı-satqı saytlarında da durum bazarda olduğu kimidir.