Media-icmal 27.06.19

Fermerlərə birlik çağırışı, Bakı bulvarında çayın qiyməti, Zorge parkındakı vəziyyət və s. məsələlər bugünkü (27 iyun, 2019-cu il) medianın aparıcı mövzularındandır.

Fermerlərə birlik çağırışı- məhsuldarlıq və qazanc naminə

"Azərbaycan" qəzeti "Azərbaycan fermerləri, birləşin!" sərlövhəli məqalədə aqrar sahədə məhsuldarlığın inkişafı üçün fermerlərin aqrar kooperasiyalarda birləşmələrinin səbəb və əhəmiyyətini dəyərləndirir.

Müəllif bu birləşmənin fermerlərə hansı üstünlükər qazandıracağını dünyanın inkişaf ermiş ölkələrindəki fermer bilriklərinin təcrübəsilə əsaslandırır.

Müəllif deyir ki, aqrar sektorda yüksəksəviyyəli texnika və texnologiyalardan istifadəsinə XX əsrin ikinci yarısından üstünlük verilib, bunun sayəsində məhsuldarlıq hər il artır, su israfçılığının qarşısı alınır, torpaqların mühafizəsi gücləndirilir: "Məsələn, taxılçılıqda bu gün məhsuldarlıq Danimarka və Çexiyada 50-55, Almaniya və Fransada 60-65 sentnerdir. Müqayisə üçün bildirək ki, Azərbaycanda orta ümumi məhsuldarlıq 30 sentnerdir".

Müəllifin deməsinə görə, müasir texnika və texnologiyalardan istifadə edən Azərbaycanın bəzi iri fermer təsərrüfatlarında və aqroparklarda bu rəqəm 50 sentnerə çatıb, deməli, mütərəqqi texnologiyaların tətbiqi məhsuldarlığın artmasında başlıca şərtdir.

Yazı müəllifi deyir ki, bu texnologiyaların tətbiqi müsbət nəticəsini heyvandarlıqda da göstərir: "Latviya, Estoniya və Almaniyada hər inəkdən il ərzində 5000-7000 kiloqram süd sağıldığı halda, Azərbaycandakı fərdi təsərrüfatlarda 1000-1100 kiloqramdan çox olmur. Bir şərti mal-qara hesabı ilə Azərbaycanda illik ət istehsalı 50-52, Danimarkada 230, Baltikyanı ölkələrdə 150-160 kiloqramdır" deyə müəllif məhsuldarlqdakı fərqləri nəzərə çatdırır.

Müəllif inkişaf etmiş ölkələrdə fermerlərin kooperativləşməsinin kənd təsərrüfatının inkişafında ən güclü amil hesab olunduğunu, belə ittifaqlara dövlətlər tərəfindən maliyyə, texnika, gübrə dəstəyi verildiyini diqqətə çatdırır.

Yazı müəllifi deyir ki, inkişaf etmiş ölkələrdə fermer kooperativləri, əmtəə istehsalçıları bəzi hallarda bu inteqrasiyadan daha səmərəli istifadə etmək üçün tərkibində sənaye və ticarət müəssisəsi olan bir neçə iri kooperativ yenidən birləşərək güclü şəkildə bazara daxil olur.

Müəllif vurğulayır ki, bütün hallarda kooperasiya üzrə 150 illik dünya təcrübəsi sübut edib ki, birləşmək və birgə fəaliyyət göstərmək fermerlərin işini asanlaşdırır, gəlirlərin artmasını təmin edir,fermerləri kooperativlərdə yaxından iştirak etməyə vadar edən əsas səbəb gəlirlərini daha da artırmaq istəyidir.

Çayın qiyməti "ceyran belində"- bulvarda

"Modern.az"da isə "Bakı bulvarının soyğunçuları -onlardan turistlər də narazıdır!" sərlövhəli məqalə oxumaq olar.

Müəllif Bakı buvarında verilən çayın qiymətindəki bahalığı Azad İstehlakçılar Birliyinin (AİB) rəhbəri Eyyub Hüseynovla müzakirə edir.

Müəllif deyir ki, Bakı bulvarı gəzinti üçün ən ideal məkandır, istər sakinlər, istər qonaqlar burada gəzişir, dəniz sahilində çay içmək də istəyirlər, amma Milli parkda verilən çayın qiyməti buna mane olur.

"Belə ki, bulvarın pik saatlarında sadə çay tapmaq mümkünsüz məsələyə dönür. Restoran sahibləri "sadə çay" (yalnız çay və qənd verilməsi nəzərdə tutulur- red.) verməkdən imtina edərək çayın yanında mürəbbə və şokolad təklif edir ki, bunun da minimum qiyməti 7 manat olur. Bulvardakı bir çox yerlərdə isə sahibkarlar "sadə çay"a qadağa qoyaraq yalnız dəstgahla verirlər. Çay dəstgahının qiyməti isə minimum 20 manatdır".

Müəllif bunu məqam olaraq xüsusi vurğulayır ki, çay içmək bulvarda 20 manata başa gəlir, bu vəziyyət yerli sakinlərlə yanaşı, Bakıya gələn turistləri də narazı salır.

Müəllifin deməsinə görə, AİB sədri bulvarda verilən çayın qiymətinin bahalığı ilə bağlı quruma şikayətlər daxil olduğunu bildirərək bunu soyunçuluq adlandırır: "Bu, soyğunçuluğun başqa bir formasıdır. Bununla bağlı 3 il əvvəl Dənizkənarı Bulvar İdarəsinə rəsmi məktub göndərmişdik. Həmin məktubdan sonra bir müddət qiymətlərə nəzarət olundu, şikayətlər azaldı", birlik sədri bunu bildirir.

E.Hüseynov deyir ki, son zamanlar şikayətlər artıb, bununla bağlı Dənizkənarı Bulvar İdarəsinə yeni rəsmi məktubla müraciət etməyi düşünürlər.

E.Hüseynovun sözlərinə görə, bu məsələ ilə bağlı sahibkarlara müraciət etdikdə yüzlərlə bəhanə gətirirlər: "Amma onların aqrumentləri əsassızdır, bununla turizmə də ciddi ziyan vururlar. Bu məsələ ilə İqtisadiyyat Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidməti hansısa addım atmalıdır, monitorinq keçirməlidir.Təəssüf ki, heç bir ciddi iş görülmür. Bulvarda başladılan bu "soyğunçuluq" ənənəsi xərcəng xəstəliyi kimi şəhərin bir çox yerinə də yayılıb".

Müəllifin deməsinə görə, qiymət bahalığı ilə bağlı məsələyə münasibət bildirən Dənizkənarı Bulvar İdarəsindən deyiblər ki, Milli Parkdakı kafe və çayxanaların heç biri Dənizkənarı Bulvar İdarəsinə aid deyil, onlar, sadəcə, burada ərazidən istifadə edirlər: "Oradakı qiymətləri də restoranları işlədənlər müəyyən edirlər. Qiymətləri onlar tənzimləyir, ona görə də Dənizkənarı Bulvar İdarəsi hər hansı qiyməti müəyyən etmək səlahiyyətinə malik deyil".

"Bura İraq və ya Suriya yox, Bakının Zorge parkıdır..."

"Moderator.az"da isə "Bu kadrlar nə İraqın Kərkük, nə də Suriyanın Hələb şəhərində lentə alınıb..- foto+ video" sərlövhəli məqalə diqqəti çəkir.

Müəllif iyun ayına xas olmayan istilərin paytaxt Bakının sakinlərində narahatlıq yaratdığını və bundan irəli gələrək paytaxtdakı bütün parkların əhalinin kölgələnməsi üçün yararlı hala salınmalı olmasını gündəmin müzakirəsinə daşıyır.

Müəllifin deməsinə görə, Bakıda park və xiyabanların ərazisi xeyli məhdudlaşıb, istirahət zonaları sakinlərin günəşdən, əlverişsiz havalardan daldalanmaları üçün yetərli deyil.

Elə bundan da irəli gələrək müəllif hesab edir ki, o zaman paytaxtdakı mövcud parkların ərazisinin maksimum abadlaşdırılaraq insanların ixtiyarına verilməsi həyati önəm kəsb edir.

Müəllifə görə, amma məsələ heç də nəzərdə tutulan kimi ürək açan deyil və buna nümunə olaraq Bakıdakı Zorge parkındakı mövcud vəziyyəti (Vaqif və Səməd Vurğun küçələrinin kəsişməsindəki park-red) foto-videolarla nümayiş etdirir.

"Amma indi oxuculara təqdim edəcəyimiz acınacaqlı mənzərə təkcə məmur səriştəsizliyinin deyil, həm də vətəndaş məmnunluğu üçün boynu qıldan nazik olan səlahiyyət sahiblərinin yarıtmaz idarəçiliyinin bariz nümunəsidir", müəllif adı çəkilən parkda mövcud olan vəziyyətin səbəbini belə bildirir.

Müəllif təqdim etdiyi fotolarla parkın istirahət və istidən kölgələnmək baxımından yararsız olduğunu bildirir, həmin fotolarda yarımçıq qalmış işlər, çala-çuxurlar və s. əksini tapır və yazır: "Gördüyünüz bu kadrlar nə İraqın Kərkük, nə də Suriyanın Hələb şəhərində lentə alınıb. Nəsimi Rayon İcra Hakimiyyətinin inzibati binasının 20-30 metrliyində, Vaqif küçəsində məşhur Zorge parkı deyilən ərazinin acınacaqlı görüntüləridir" deyə bildirir.

Müəllif bir mətbuat nümayəndəsi olaraq parkdakı mövcud vəziyyəti yazıb-göstərməklə vəzifəsini bitmiş sayır.

Amma müəllif hesab edir ki, parkın bu cür acınacaqlı görkəmi üçün cavabdeh olan qurumların və şəxslərin sorğu-suala çəkilmələri isə müvafiq strukturların vəzifə borcudur.

Yazı müəlifinə görə, kimsə vəsait çatışmazlığı və digər bəhanələrlə insanların gözünə kül üfürməyə cəhd etməsin, hər şey gün kimi ortadadır, təkcə cəzalanan yoxdur. Hələ ki...