Sənədsiz evlərə kommunal resursların verilməsi çətinləşib

Bakı/08.02.18/Turan: 2016-cı ildən kommunal xidmətlərin göstərilməsi funksiyasının ASAN Kommunal mərkəzlərinə həvalə edilməsi sənədi olmayan evlərə su, qaz və elektrik enerjisinin verilməsini çətinləşdirib. Bu yaxınlarda "Azərişıq" ASC və Əmlak Məsələləri Dövlət Komitəsi belə abonentlərə elektrik sayğaclarının quraşdırılması məsələsini müzakirə ediblər. Bu məsələyə "Azərişıq"ın nümayəndəsi Elsevər Rüstəmov diqqət yetirib.

Turan-a müsahibə verən şəxslər Bakıda və paytaxt ətrafında qanunsuz tikililərin miqyasını nəzərə alaraq, problemin aktuallığını qeyd ediblər. Evinin sənədi olmayan vətəndaşların sayı məlum deyil, bu səbəbdən problemin miqyasını göstərməkdə çətinlik yaranır. "Bundan əlavə, kommunal xidmətlər təkcə elektrik sayğacları ilə məhdudlaşmır, qanunsuz evlər həm də qaz, su, kanalizaziyaya qoşulmaq imkanlarından məhrumdur", - Azərbaycan Energetika Mütəxəssisləri Assosiasiyasının direktoru Rəsul Süleymanov Turan-a bildirib. "Bu məsələ dövlət səviyyəsində həll olunmalıdır".

Məsələ bundadır ki, ev tikintisi, onun qeydiyyatı və sənədləşdirilməsi zamanı fərdi inşaatçılar adəti üzrə qanunvericiliyi pozurlar. Çünki ev tikmək üçün ilk növbədə müvafiq sənəd təqdim etmək lazımdır, torpaq sahəsinin ayrılması ilə bağlı yerli icra hakimiyyətlərinin icazəsi olmalıdır, su-kanalizasiya, qaz, elektrik xidmətlərinə qoşulmaq üçün müqavilələr tələb olunmalıdır. Bizdə isə bu məsələləri tikintidən sonra, artıq sakinlər evə yerləşdikdən sonra həll etməyə başlayırlar.

Ancaq belə tikinti prosesi nəzarətsiz deyil, çünki yerli icra hakimiyyəti və hüquq-mühafizə orqanları bundan xəbərdar olur. Əgər vətəndaşa ev tikməyə icazə verilirsə, sakinin kommunal xidmətlərə qoşulmasına icazə vermək məntiqli görünür.

"Ardıcıllığa varsaq, evi ya məhkəmə qərarı ilə sökmək, ya da kommunikasiyaya qoşulmasına icazə vermək lazımdır. Burada qaçqınlar və məcburi köçkünlərlə bağlı bir məqam da var. Çünki Qarabağ münaqişəsi həll olunmayana, onlar öz yurdlarına qayıtmayana qədər onların evləri toxunulmaz qalır. Bunu və digər vəziyyəti nəzərə alsaq, hökumətin qarşısında çətin məsələ durur", - R.Süleymanov bildirib.

"Azərişıq", "Azərsu" və "Azəriqaz" ilə bağlı xidmətlər ASAN Kommunal Mərkəzinə verilməzdən öncə kommunikasiyaya qoşulmaq və sayğacların quraşdırılması məsələsi sadə şəkildə, ərizə əsasında həll olunurdu.

Kommunal xidmət tədarükçüsü yaşayış yeri üzrə qeydiyyatı olmayan şəxslərə də sayğac quraşdırırdı. "Vətəndaşdan ancaq xidmət haqqını ödəmək tələb olunurdu. Əks halda işıq, su, qaz kəsilirdi. Hazırda bu, ASAN mərkəzləri tərəfindən edilir ki, bunlar da qanunsuz tikililəri qeydiyyata ala bilmir, çünki bundan ötrü səlahiyyətləri yoxdur. Ona görə də qeydiyyatı olmayan ev kommunikasiyaya qoşula bilməz. Əks halda ev sahibi məhkəmədə sübut etmək, mülk kağızı tələb etmək s. hüququ əldə etmiş olur", - R.Süleymanov bildirib. O qeyd edib ki, bir evdə iki və daha çox sayğacın quraşdırılmasına icazə var. Ancaq bundan ötrü əsaslandırma olmalıdır: "Ərizəçi ikinci sayğac onun nəyinə lazımdır" sualına cavab verməlidir.

Tarif sisteminin differensiallaşdırılmasına keçid ilə sahibkarlar "əhali" qrupuna daxil olan istifadəçilər üçün nəzərdə tutulan imtiyazlara malik deyil. Əgər sayğac istehsalat fəaliyyəti ilə bağlı elektrik enerjisinin istehlakını nəzərə alırsa, belə olan halda güzəştli limit nəzərdə tutulmur, abonentə lazımi gücdə olan sayğac quraşdırılır. Əgər söhbət ailənin bölünməsindən gedirsə, boşanma və s. haqda məhkəmə qərarı tələb olunur. ASAN mərkəzlərə gəlincə, burada vətəndaşlardan ərizələr qəbul edilir və müvafiq instansiyalara göndərilir. Çünki ASAN Kommunal "Azərişıq", "Azərsu" və "Azəriqaz" ilə birlikdə təşkil edilib.

Azərbaycan Rieltorlar Assosiasiyasının direktoru (ARA) Elnur Azadov Turan-a bildirib ki, sayğacların quraşdırılmasına görə xərclərin sakinlərin öz üzərinə düşməsilə bağlı qanunvericilikdə bənd var. Yəni, yeni salınmış yerlərdə, əsasən fərdi evlərdə dövlət ancaq xətləri çəkir, kommunikasiyanın çəkilişinə görə xərclər isə ev sahiblərinin üzərinə düşür. Ekspertin fikrincə, bürokratik əngəllərin aradan qaldırılması və müvafiq prosedurların sadələşdirilməsi üçün "Daşınmaz əmlakın dövlət reyestri haqqında" qanun qüvvəyə minməzdən öncə alınmış daşınmaz əmlakın sənədlərinin müvafiq siyahısı çərçivəsində evlərin qeydiyyatı prosesinin sürətləndirilməsi tələb olunur. Bununla belə, paytaxt ətrafında hətta icazə üçün ilkin sənədi olmayan evlərin inşası davam edir.--0--