Təbii fəlakət zonasında dəymiş ziyan hesablanır (YENİLƏNİB)

Dünən axşam saatlarında ölkənin qərb və şimal-qərb rayonlarında güclü küləklə müşaiyət edilən dolu yağması nəticəsində vətəndaşlara və ictimai mülkiyyətə xeyli ziyan dəyib. Yüzlərlə tikili, avtomobillər, yollar, kənd təsərrüfatı fəlakətin təsirinə məruz qalıb.

Fövqəladə Hallar Nazirliyinin (FHN) mətbuat xidmətinin məlumatına görə, Gəncə şəhəri və Daşkəsən rayonunda iyunun 10-da gecə saatlarında başlamış güclü yağış və dolu düşməsinin yaratdığı fəsadların nəticələri aradan qaldırılır.

FHN-in canlı qüvvə və texnikalarının intensiv şəkildə həyata keçirdikləri tədbirlər nəticəsində təbii fəlakət bölgəsində infrastruktur, habelə elektrik enerjisi və təbii qaz verilişi tam bərpa olunub, Gəncə şəhəri və Daşkəsən rayonu Fövqəladə Hallar komissiyaları müvafiq strukturlarla birgə dəymiş ziyanı müəyyənləşdirir.

Öz növbəsində, Milli Məclisin deputatı Mübariz Qurbanlı Turan-a bildirib ki, hazırda təbii fəlakət zonasında komissiyalar, sığorta şirkətləri işləyir. Ziyanın əhatəsi və məbləği müəyyənləşdirilir. “Təbii fəlakət Goranboy, Göygöl, Şəmkir, Daşkəsən, Gədəbəy rayonlarını və Gəncə şəhərini əhatə edir. Ancaq ən çox ziyan Daşkəsən rayonuna dəyib”.

Deputatın sözlərinə görə, regionda vəziyyət hökumətin nəzarəti altındadır. “Təbii fəlakət zonasına çoxsaylı texnika və işçi qüvvəsi cəlb edilib. İlkin olaraq zəruri kommunikasiya qurğuları bərpa edilir. Mərkəzi icra hakimiyyəti qurumları yerlərə kömək edir. Ümid edirəm ki, dövlət büdcəsindən də regionda bərpa işlərinə vəsait ayrılacaq”, deyə o qeyd edib.

İlkin məlumata görə, Gəncə şəhərində 1000-dən artıq fərdi yaşayış evini su basıb, 100-ə yaxın yaşayış evinin dam örtükləri dağılıb.

Gəncə şəhər İcra Hakimiyyətinin başçısı Elmar Vəliyevin bildirdiyinə görə, Gəncənin elektrik, qaz, su, kanalizasiya və rabitə təsərrüfatının böyük hissəsinə ciddi ziyan dəyib. Külək nəticəsində 200-dən artıq iri gövdəli ağac aşaraq küçə və prospektlərdə avtomobillərin hərəkətini məhdudlaşdırıb, 50-yə qədər avtomobilə zərər dəyib.

Baş verən təbii fəlakətin fəsadlarının aradan qaldırılması üçün Gəncə şəhər İcra Hakimiyyətində fövqəladə komissiya yaradılıb. İlkin araşdırma zamanı şəhərin 27 qaz təsərrüfatının, 30-dan artıq yarımstansiyanın sıradan çıxdığı məlum olub.

Elmar Vəliyevin bildirdiyinə görə, qaz təsərrüfatında 27 yerdə böyük dağıntılar var. Şəhər ərazisinin təxminən 80%-də işıq yoxdur. Su-kanalizasiya sistemində problemlər aradan qaldırılır. Eyni zamanda, FHN-in aidiyyəti qurumları ərazilərdə xidmət aparır. Su basmış evlərin, dam örtükləri dağılmış binaların siyahısı tərtib olunur. Güclü külək nəticəsində 100 illik çinar ağacları aşıb. -03B-

*   *   *

2014 İyun 11 (Çərşənbə) 13:14:33

Ölkə ərazisində qeyri-sabit hava şəraiti iyunun 14-dək davam edəcək. Həmin günlərdə güclü külək əsəcək, leysan yağacaq, dolu düşəcək. Bu barədə sinoptiklər bildiriblər.

İyunun 13-də Bakıda və Abşeronda güclü külək əsəcək. Havanın temperaturu 22-26 dərəcə isti olacaq.16D-

*   *   *

2014 İyun 11 (Çərşənbə axşamı) 10:59:19

Dünən axşam saatlarında ölkənin qərb rayonlarında tufan olub, güclü dolu yağıb. Çoxsaylı evlərə, avtomobillərə, əkin sahələrinə, meşə zolaqlarına ziyan dəyib. Elektrik enerjisinin, qazın verilməsində fasilələr yaranıb. Güclü külək yüzlərlə ağacı kökündən çıxarıb. Elektrik dirəkləri açıb.

Yerli sakinlərin dediklərinə görə,  güclü yağan dolu evlərin damlarını uçurub, şiferlərini qırıb. Ağacları və bostan sahələrindəki bitkiləri məhv edib. “Fırtına birdən gəldi. Güclü dolu ilə müşayiət olunan tufan bir anda hər şeyi məhv etdi. Evimin çardağının şiferləri sanki bir neçə kiloqram ağırlığında daşlarla qırıq-qırıq edilib. Bütün şiferlər sınıb. Avtomobilimin qabaq şüşəsi sınıb, damı batıq-batıqdır. Bağ və bostanımda bitki qalmayıb. Mal-qaranı dolu necə döyübsə, qorxudan tövlədən çölə çıxmır”, - Göygöl rayonunun Çaykənd kəndinin sakini Gürzalı Orucov Turan-a bildirib.

Fövqəladə Hallar Nazirliyinin mətbuat xidmətinin qeyri-sabit hava şəraitinin yaratdığı fəsadlarla bağlı yaydığı ilkin məlumatda deyilir ki,  iyunun 10-da axşam saatlarında Gəncə, Göygöl, Tərtər, Bərdə, Yevlax, Oğuz, Ağdaş, Goranboy, Şəmkir rayonlarında intensiv leysan yağıb, şimşək çaxıb, güclü külək müşahidə olunub.

Göygöl, Daşkəsən, Gədəbəy və Tovuz rayonlarında güclü dolu düşüb, burulğanlı hava və güclü külək olub, intensiv şimşək çaxıb. Hava şəraitinin kəskin dəyişməsi nəticəsində göstərilən rayonların bir çoxunda yaşayış binalarına, inzibati binalar, fərdi yaşayış evlərinə, rabitə və elektrik xətlərinə, minik avtomobillərinə, kənd təsərrüfatına ciddi ziyan dəyib. Gəncə və Daşkəsən rayonlarında evləri, həyətyanı sahələri su basıb.

Hazırda qeyd olunan problemlərin həlli istiqamətində Fövqəladə Hallar Nazirliyinin müvafiq qurumları tərəfindən tədbirlər görülür. Müəyyən edilmiş ərazilərə şəxsi heyət və texnika cəlb edilib, aidiyyəti qurumlar məlumatlandırılıb.-03B-

Rəy yaz

Cəmiyyət

Значит ли ликвидация Исмаила Хании начало большой войны против Израиля? - беседа с Аркадием Дубновым




Bizi sosial şəbəkələrdə izləyin

Xəbər lenti