Vəkillərdən hansı halda şikayət verilməsi qanunvericiliklə dəqiqləşməlidir

Bakı/05.03.18/Turan: "Sərəncamda nəzərdə tutulmuş tədbirlərin icrasının gedişatı barədə mətbuatda hələ ki, məlumat yayımlanmayıb, bu tədbirlərin icrası maliyyə sərfi, bir sıra təşkilati və texniki işlərin görülməsini tələb edir və onların icrasına müəyyən vaxt tələb olunur". Vəkil Əsabəli Mustafayev bunu bu il fevralın 22-də Prezident İlham Əliyevin "Azərbaycanda vəkilliyin inkişafı ilə bağlı əlavə tədbirlər haqqında" sərəncamından keçən müddət ərzində görülən işlərlə bağlı şərhində bildirib.

Vəkil həm də bu sahənin təkmilləşdirilməsi ilə bağlı bəzi mətbuat oqranlarında səsləndirdiyi təkliflərin hüquqi müstəvidə dəqiqləşdirilməsinə zərurət olduğunu deyib.

"Vəkillərin fəaliyyətindən şikayət hüquq-mühafizə orqanlarının rəhbərləri, hakimlərlə yanaşı, daha çox vəkillərin müştəriləri tərəfindən də verilir. Birinci halda verilən şikayətlər, onlar üzrə qəbul olunan qərarlar mətbuatda geniş yayılır və bu səbəbdən içtimai rezonas yaradır, yaddaşlarda qalır", deyə vəkil qeyd edir.

Ə.Mustafayev deyir ki, vəkillərin müştəriləri tərəfindən verilmiş şikayətlərə isə əsas etibarilə Vəkillər Kollegiyasının Rəyasət Heyətində baxılır və belə şikayətlərin araşdırılması, onlar üzrə qərarların qəbulu qapalı aparılır.

Vəkil deyir ki, belə olduqda bu şikayətlər, onlar üzrə qəbul olunmuş qərarlar haqda içtimaiyyətin, o cümlədən digər vəkillərin də məlumatları olmur və bu vəkilin fəaliyyətinin məxfiliyi ilə bağlıdır: "Amma, hesab edirəm ki, belə şikayət tərəflərinin adları açıqlanmadan, şikayətin məzmunu, qəbul edilmiş qərarın mahiyyəti üzrə heç olmasa vəkillərin məlumatlandırılması həm maarifləndirici, həm də profilaktik rol oynaya bilər".

Ə.Mustafayev vurğulayır ki, istintaq və məhkəmə orqanlarının vəkilin fəaliyyətindən şikayət vermək hüququnun hansı hallarda olması qanunvericilikdə dəqiq müəyyən olunmalıdır.

Ə.Mustafayev deyir ki, şikayətçinin işgüzar nüfuzuna zərər vurulması və buna oxşar digər şikayətlərə mülki və ya digər icraat qaydasında baxılması da normalarda öz əksini tapmalıdır.

Qanunvericilikdə hakimlər barədə intizam icraatının başlanması əsaslarının, muzdlu işçilərin işəgötürənin təşəbbüsü ilə işdən azad edilməsinə imkan verən halların qanunvericilikdə dəqiq göstərildiyini deyən vəkil bildirir ki, vəkillər haqqında da belə normaların olması onların fəaliyyətinin hüquqi təminatı ola bilər.

Xatırladaq ki, bu il fevralın 22-də Prezident İlham Əliyev Azərbaycanda vəkilliyin inkişafı ilə bağlı əlavə tədbirlər haqqında sərəncam imzalayıb. Sərəncamda məhkəmə-hüquq sisteminin təkmilləşdirilməsi və müasirləşdirilməsi sahəsində görülən işlər çərçivəsində vəkilliyin inkişafına dəstək verməsi məqsədilə bir sıra tədbirlərin həyata keçirilməsi nəzərdə tutulur. -05B-