Müstəqillik haqqında Konstitusiya Aktının bütün məqsədlərinə çatmadıq - F. Ağayev

Bakı/16.10.19/Turan: Azərbaycan 1991-ci il oktyabrın 18-də qəbul edilmiş dövlət müstəqilliyi haqqında Konstitusiya Aktında göstərilən bütün məqsədlərə nail olmayıb. Bunu hüquqşünas, sözügedən sənədin müəlliflərindən biri Fuad Ağayev "Amerikanın səsi" radiosuna müsahibəsində deyib.

Hələ 1989-cu il sentyabrın 23-də Azərbaycan Ali Soveti "Azərbaycan SSR-nin suverenliyi haqqında Konstitusiya qanunu"nu qəbul etmişdi. 1991-ci il Konstitusiya Aktı isə həmin suverenlik qanununun davamı oldu. Halbuki, digər sovet respublikalarında yalnız müstəqillik haqqında bəyannamə qəbul edilmişdi.

1989-cu ildə qəbul edilmiş Konstitusiya qanununda Azərbaycan qanunlarının SSRİ qanunlarından üstünlüyü göstərilirdi. Eyni zamanda həmin Konstitusiya qanununda Azərbaycanın ərazi bütövlüyü əksini tapmışdı.

1991-ci il Konstitusiya Aktı müstəqil dövlət üçün suverenlik haqda qanunun inkişafı oldu. Bu sənəd Azərbaycan Xalq Cümhuriyyətinin (1918-20-ci illər) varisi elan etdi.

Bu gün sosial sahədə, siyasi və vətəndaş hüquqları sahəsində çoxlu problem var. Bu, siyasi məhbusların sayından bəlli olur, F.Ağayev deyib.

Çağdaş vəziyyəti 28 il öncəki durumla müqayisə edən F.Ağayev təhsil sahəsində tənəzzülü qeyd edib. Hazırda əhalinin orta savad səviyyəsi dəfələrlə aşağıdır. Əlbəttə, kimlərinsə imkanı var gedirlər xaricdə təhsil alırlar. Ancaq hamının belə imkanı yoxdur. Digər sahələri də müqayisə etsək, vəziyyət elə də qənaətbəxş deyil.

Hakimiyyətin müstəqillik uğrunda mübarizlərə münasibəti necədir? Bu sualın cavabında F.Ağayev deyib:

"Mən deməzdim ki, layiqincədir. Ən azı Məhəmməd Əmin Rəsulzadəyə göstərilən münasibət buna bariz nümunədir.

Dövlət universitetindən onun adının götürülməsi, abidəsinin olmaması, onun ideya irsinə hakimiyyətini münasibəti AXC banisinin xatirəsinə lazımi diqqətin olmadığını göstərir.

Hesab etmirəm ki, AXC-nin digər qurucularına, Azərbaycanın müstqilliyi uğrunda mübarizə aparmış insanlara münasibət onların xidmətlərinə uyğun münasibətdir", - F.Ağayev bildirib.

*1991-ci il oktyabrın 18-də Azərbaycan Ali Soveti dövlət müstəqilliyi haqqında Konstitusiya Aktını qəbul edib. Ali Sovetin 360 üzvündən 258-i onu dəstəkləyib. Qalanlar ya sessiyaya qatılmayıb, ya da əleyhinə səs verib.

1991-ci il dekabrın 29-da ümumxalq referendumunda Konstitusiya qanunu 95% səs ilə dəstəklənib.

2006-cı ilə qədər 18 oktyabr Dövlət Müstəqilliyi Günü kimi qeyri-iş günü idi. Sonradan iş günü oldu. 03B06-