Repressiyalarla hakimiyyəti əldə saxlamaq mümkün deyil - Gülalıyev

Bakı/02.08.18/Turan: Azərbaycan Avropada siyasi məhbusların sayına görə liderdir. Hazırda ölkədə 160-dan çox siyasi məhbus var. Bu barədə Turan agentliyinin "Çətin Sual" verilişinə müsahibəsində Siyasi Məhbusları Müdafiə Mərkəzinin əlaqələndirici Oqtay Gülalıyev bildirib.

Onun sözlərinə görə, bu problem daim beynəlxalq demokratik ictimaiyyətin diqqət mərkəzindədir və rəsmi Bakı təzyiqə məruz qalır.

Onun fikrincə, hakimiyyət bu məsələni kökündən həll etməyə məhkumdur. Yaxın gələcəkdə bu istiqamətdə qətiyyətli addımlar atılacağı haqqında məlumat həqiqətə bənzəyir.

Hakimiyyət dəfələrlə beynəlxalq qurumlara vədlər verib, amma sonuna qədər yerinə yetirməyib. İndi məsələ qırmızı xəttə yaxınlaşır, bu xəttin arxasında Bakının demokratik ictimaiyyətlə ciddi problemləri başlaya bilər.

Hüquq müdafiaəçisinin fikrincə, siyasi məhbuslar problemi hakimiyyətin avtoritar mahiyyəti ilə bağlıdır. İnsanlar siyasi baxışlarına, hökumətin tənqidinə, fərqli düşüncəyə görə təqib olunur, ölkədə azad mətbuat və televiziya yoxdur, ifadə və toplaşmaq azadlığı həddindən artıq məhdudlaşdırılıb, insanları yalan ittihamlarla həbsxanalara atırlar. Bütün bu repressiyaların kökündə hakim rejimin hakimiyyəti əlində saxlamaq instinkti durur.

"Mən düşünürəm ki, Azərbaycan hakimiyyəti də fərqindədir ki, son illər aparılan bu həbslər, repressiyalar heç bir effekt vermir. İnsanları həbsdə saxlamaqla hakimiyyəti əldə saxlamaq mümkün deyil. O baxımdan mən bu qənaətdəyəm ki, Azərbaycan hakimiyyəti siyasətinin dəyişmək məcburiyyətindədir. Dünya dəyişir, region dəyişir, insanlar dəyişir. Qabağa baxıb güzəştə getməlidirlər", deyə Gülalıyev bildirib.

Ölkədə fundamental hüquqlar bərpa edilməlidir. Onlara müstəqil məhkəmələr səviyyəsində təminat verilməlidir. Vətəndaş cəmiyyəti dirçəldilməlidir, siyasi islahatlar həyata keçirilməlidir, demokratik seçkilər keçirilməlidir, Qərb dünyasına real inteqrasiya həyata keçirilməlidir. -06D-