Yaxt-klub satışa hazırlanır

Bakı/27.09.17/Turan: Dövlət Əmlak Məsələləri Komitəsi (DƏMK) əvvəllər Azərbaycan Xəzər Dəniz Gəmiçiliyinin strukturuna daxil olan üç profilsiz müəssisənin qiymətləndirilməsini və ayrıca hüquqi şəxsə çevrilməsini yekunlaşdırıb.

Bu gün, sentyabrın 27-də Vergilər Nazirliyinin verdiyi məlumata görə, dənizkənarı "Yaxt-klub", Mərkəzi Dənizçilər Xəstəxanası və Dənizçilər Poliklinikasının bazasında məhdud məsuliyyətli cəmiyyətlərin yaradılması məsələsi bu il iynun 23-də həll olunub. "Yaxt-klub" MMC-nin nizamnamə kapitalı 3 269,6 min manat, "Mərkəzi Dənizçilər Xəstəxanası" MMC-nin nizamnamə kapitalı 1832,2 min manat və "Dənizçilər Poliklinikası" MMC-nin nizamnamə kapitalı 1 mln. 22,4 min manat ölçüsündə müəyyən edilib.

Bu müəssisələrin nə vaxt özəlləşdirməyə çıxararılacağının planlaşdırıldığı hələlik açıqlanmır. Bir müddət əvvəl DƏMK bu müəssisələrdən yalnız birinin satış metodu haqqında məlumat verib: Mərkəzi Dənizçilər Xəstəxanası (MDX) səhmləşdirmə və investisiya müsabiqəsi yolu ilə özəlləşdiriləcəkdi. Amma, məlum oldu ki, xəstəxana ASC-yə deyil, MMC-yə çevrilib. DƏMK-nin özəlləşdirmə portalının məlumatına görə, 1964-cü ildən fəaliyyət göstərən MDX-də 211 nəfər, o cümlədən 70 həkim işləyir. 08B