Azərbaycan Xarici İşlər Nazirliyi: Fransanın Azərbaycan əleyhinə səyləri uğursuzluğa məhkumdur

Bakı/04.10.23/Turan:  Azərbaycan Xarici İşlər Nazirliyi oktyabrın 3-də Yerevanda mətbuat konfransı zamanı Fransanın Avropa və xarici işlər naziri Katrin Kolonanın Bakıya qarşı irəli sürdüyü əsassız ittihamları pisləyib və rədd edib.

Xarici İşlər Nazirliyinin şərhində xatırladılır ki,  30 ilə yaxın müddətdə azərbaycanlılar öz doğma torpaqlarından güc yolu ilə kütləvi şəkildə qovulsalar da,  bu, heç zaman Fransanın diqqət mərkəzində olmayıb.

İndi isə heç bir əsas olmadan və Birləşmiş Millətlər Təşkilatı, Beynəlxalq Qırmızı Xaç Komitəsi, Birləşmiş Millətlər Təşkilatı Qaçqınlar üzrə Ali Komissarlığının və digər beynəlxalq qurumların nümayəndələrinin bəyanatlarına zidd olaraq, regiondan könüllü gedən erməni sakinlərin guya zorla qovulduğunu iddia edərək beynəlxalq birliyi çaşdırmağa çalışır.

Fransanın Ermənistanı hər vəchlə silahlandırmağa çalışması, onu yenidən təcavüzə və hərbi avantüraya cəlb etməsi qəbuledilməzdir.

“Fransa başa düşməlidir ki,  bölgəmizə tarixən müdaxilə etmə cəhdləri kimi, bu səylər də uğursuzluğa düçar olacaq.

Fransanın Ermənistanı dəstəkləməsi, eləcə də Birləşmiş Millətlər Təşkilatı Təhlükəsizlik Şurasının iclaslarının təşəbbüskarı olması barədə  bəyanatları bir daha sübut edir ki, son 30 ilə yaxın müddətdə onun neytral vasitəçilik haqqında səsləndirdiyi fikirlər tamamən tutarsızdır", - sənəddə qeyd olunub.

Beynəlxalq təşkilatların və Ermənistanın baş nazirinin Azərbaycanın antiterror tədbirlərinin dinc erməni sakinlər üçün təhlükə yaratmadığını təsdiqləməsinə baxmayaraq, fransalı nazir Azərbaycanın öz suveren ərazilərində legitim addımını "cinayət" adlandırıb.

Azərbaycan Xarici işlər Nazirliyi hesab edir ki, Fransanın regiondakı səriştəsiz siyasəti onu regionda iflasa doğru aparır. 06В