Azərbaycan XİN-in bəyanatında unudulmuş altı tezis

Azərbaycan XİN Ermənistanın baş nazir səlahiyyətlərini icra edən Nikol Paşinyanın Parisdəki çıxışına cavab bəyanatı yayıb. Keçmiş xarici işlər naziri Tofiq Zülfüqarov Azərbaycan XİN-in bəyanatını bitkin saymır.

İki bəyanat: N.Paşinyanın və Azərbaycan XİN-in cavabı 2018-ci il noyabrın 12-də Turan İnformasiya Agentliyinin "Azərbaycan XİN Paşinyana beynəlxalq hüququn müddəalarını xatırladır" başlıqlı məlumatında dərc edilib:

http://www.contact.az/ext/news/2018/11/free/politics%20news/ru/76577.htm

T.Zülfüqarov hesab edir ki, əgər Ermənistan-Azərbaycan münaqişəsinə erməni azlığı ilə mərkəzi hakimiyyət arasındakı münaqişə kimi baxsaq və onu separatçı kimi xarakterizə etsək, bu məntiqlə XİN-in cavabını adekvat saymaq olar.

"Əslində, Paşinyan öz çıxışı ilə münaqişənin belə təsnifatını təbliğ edir. Ancaq bu gün, Ermənistan və Azərbaycan prezidentlərinin 20 ildir ki, birbaşa danışıqlar aparmasından sonra mahiyyətcə həmin formatla nümayiş etdirir ki, münaqişə dövlətlərarasıdır, Ermənistanın Azərbaycana qarşı ərazi iddiaları əsasında baş verir və Azərbaycan XİN-in cavabı da bu məntiqlə olmalıydı", - T.Zülfüqarov XİN-in bəyanatını Turan-a şərh edib.

XİN-in bəyanatındakı çatışmazlıqların qeyd olunması xahişinə cavab olaraq keçmiş nazir diqqəti mühüm siyasi məqamlara yönəldib ki, XİN bəyanatda bunlardan istifadə etməliydi.

1-ci buraxılmış tezis: Rəsmi sənəddə bəyanatla tədbir arasında bağlılıq olmalıdır. Paşinyan Azərbaycan əleyhinə bəyanatla Parisdə Birinci Dünya Müharibəsinin başa çatmasının 100 illiyinə həsr olunmuş forumda çıxış edib. Ardıcıl olaraq, xatırlatmaq lazım idi ki, Avropada müharibələrin səbəbi sərhədlərin güc yolu ilə yenidən çəkilməsi cəhdləri idi;

2-ci buraxılmış tezis: Bu gün Ermənistan Azərbaycan ərazilərinin bir hissəsinin güc yolu ilə anneksiyasına cəhd edir;

3-cü buraxılmış tezis: Azərbaycan ərazilərinin 20%-i işğal edilib, bu ərazilərdə azərbaycanlı əhalinin total etnik təmizlənməsi həyata keçirilib;

4-cü buraxılmış tezis: "Yeni erməni demokratlar", yəni Paşinyanın demokratik hakimiyyəti Azərbaycan ərazilərinin anneksiyası siyasətini yürütməkdə davam edir, ATƏT-in Minsk Qrupunun vasitəçiliyilə dinc danışıqlar prosesini hər vəchlə pozmağa çalışır;

5-ci tezis: Bəyanatda aşağıdakılar işıqlandırılmalı idi: Qarabağ münaqişəsi postsovet məkanında ilk münaqişədir. Qarabağ münaqişəsi dünyanın bir çox ölkələrində separatçı silahlı ssenarinin təkrarlanmasına, yayılmasına səbəb olub;

6-cı tezis: Azərbaycan XİN-in bəyanatında göstərmək lazım idi ki, baş verənlərin səbəbləri dünya birliyinin fəaliyyətsizliyində və erməni işğalçılara qarşı sanksiyaların olmamasındadır, T.Zülfüqarov açıqlama verib.

Paris forumunda Paşinyan bildirib ki, Dağlıq Qarabağ xalqının öz taleyini müəyyən etmək hüququ uğrunda çoxuillik mübarizəsi hələ lazımi hüquqi həllini tapmayıb. "XXI əsrdə xalqın özünütəyin hüququnu tətbiq etmək istəyinin bioloji mövcudluğa təhlükəyə çevrilməsi tamamilə qəbuledilməzdir. Heç bir dövlət öz uğurunu başqalarının miskinliyi üzərində qura bilməz, heç kim azadlığı başqalarının köləliyi hesabına əldə edə bilməz"(соntact.az).

Azərbaycan XİN-in 12 noyabr tarixli cavabı: Ermənistanın baş naziri səlahiyyətlərini icra edən Nikol Paşinyanın noyabrın 11-də Paris Sülh Forumundakı bəyanatı Ermənistanın siyasəti ilə tamamilə ziddiyyət təşkil edir. Məhz Ermənistan beynəlxalq hüququn fundamental prinsiplərini, xüsusilə də güc tətbiq etməmək prinsipini pozaraq Azərbaycan ərazilərini işğal edib və tarixən Dağlıq Qarabağda yaşayan yüz minlərlə azərbaycanlını fundamental hüququndan - öz evlərində yaşamaq hüququndan məhrum edib.

Özünü təyinetmə hüququ eyni bölgədə yaşayan digər etnik qruplara qarşı etnik təmizləmənin həyata keçirilməsi demək deyil, beynəlxalq hüququn aliliyi isə ərazilərin hərbi yolla işğalını və zor gücünə işğalın nəticələrini həll yolu kimi qəbul etdirməyi nəzərdə tutmur.

Bizim bölgənin, eləcə də Ermənistanın özünün yaxşı gələcəyi Ermənistan silahlı qüvvələri tərəfindən Azərbaycan ərazilərinin işğalına son qoyulması və məcburi köçkünlərin öz doğma torpaqlarına qayıtması ilə sıx bağlıdır, şərhdə qeyd olunur.

Azərbaycan XİN rəhbəri Elmar Məmmədyarov həmin Paris forumunda çıxış edərək deyib ki, Ermənistan silahlı qüvvələrinin işğalçı əməlləri nəticəsində Azərbaycanda baş verdiyi kimi, hələ də dünyada adamlar zorla etnik təmizləməyə məruz qalır, öz tarixi yaşayış yerlərindən qovulur.