Azərbaycanda siyasi fəaliyyət üçün şərait əlverişsizdir
Seçkilərin Monitorinqi və Demokratiyanın Tədrisi Mərkəzi (SMDTM) hazırladığı iki sənədin təqdimatı üzrə cümə axşamı RATİ-də mətbuat konfransı keçirib.
Qurumun hazırladığı “Siyasi iştirak üzrə fəaliyyət imkanları” və “Şərq Tərəfdaşlığı ölkələrində siyasi iştiraka (birləşmək və sərbəst toplaşmaq azadlıqları) dair qanunların müqayisəli təhlili” sənədləri Avropa Birliyinin Şərq Tərəfdaşlığı Proqramında iştirakçı olan 6 dövlətin (Azərbaycan, Belarus, Gürcüstan, Ermənistan, Moldova və Ukrayna) qanunvericiliyi ilə müqayisəli hazırlanıb.
Hazırlanan sənədlərdə Azərbaycanda vətəndşaların sərbəst, siyasi partiyalarda və ictimai qurumlarda birləşmək hüquqlarının təmin olunması səviyyəsi araşdırılıb.
Sərbəst toplaşmaq azadlığının təmin olunması vəziyyətini öyrənmək üçün 58 yerli icra hakimiyyətinə sərbəst toplaşmaq üçün rayonlarda ayrılan açıq və qapalı məkanlara dair sorğu göndərilib. Sorğu göndərilən icra qurumlarının əksəriyyəti cavabdan yayınıb, bu məkanlar haqda informasiya verməyib. Bir qisim icra hakimiyyətləri sorğuların quruma çatmadığını iddia edərək, sorğunu cavablandırmayıb. “Azərpoçt” bütün sorğuların icra qurumlaına çatdırıldığını təsdiqləyib və icra hakimiyyətlərini yalan danışmaqda ittiham edib.
Sərbəst toplaşmaq azadlığının təmin olunmasına gəlincə, Azərbaycan qanunvericiliyində bu hüququn təmin olunmasından çox təmin olunmamasına yönəlik xeyli maddələr olduğu vurğulanıb. Qanun icra hakimiyyətlərinə bu fundamental hüququ pozmağa xeyli hüquqi əsas verib. Müqayisəli təhlildə sərbəst toplaşmaq azadlığına münasibətdə Azərbaycan və Belarus qanunvericiliyi mürtəce, qalan 4 ölkə qanunvericiliyi mütərəqqi sayılıb. Qanunda sərbəst toplaşmaq azadlığına münasibətdə “dinc” və “qeyri-dinc”, “xəbərdar etmək” ifadələrinin çıxarılması təklif edilib.
Azərbaycanda ölkə vətəndaşlarının siyasi partiyalar və ictimai qurumlarda birləşməsi və fəaliyyəti qanunvericiliyi də mütərəqqi sayılmayıb. Belə ki, partiya yaradılması tələb edilən 1000 nəfərin 300 nəfərə endirilməsi təklif olunub. Partiyaların telekanallara çıxışlarının təmin olunması təklifi səslənib. Ölkədə partiyaların maliyyələşdirilməsində ədalət prinsipinin pozulmasına diqqət çəkilib.
QHT-lərdə birləşmək fəaliyyəinə gəlincə, burada da vəziyyət ağırdır. Belə ki, iqtidara əlverişli olmayan QHT-ləri ləğv etmək üçün Ədliyyə Nazirliyinin iki xəbərdarlığının yetərli olduğu deyilib. Əslində isə bu məsələ məhkəmə vasitəsilə həll olunmalıdır.
Bütün bu açqılamalardan sonra ölkədə siyasi fəaliyyət imkanlarının təmin olunması üçün qanunvericiliyin ciddi şəkildə təkmilləşdirilməsinə ehtiyac olduğu qeyd edilib. -05C-
Rəy yaz