Elmar Məmmədyarov ATƏT-in baş katibi ilə görüşüb

Bakı/12.09.18/Turan: Azərbaycanın xarici işlər naziri Elmar Məmmədyarov Bakıda səfərdə olan ATƏT-in Baş katibi Tomas Gremingeri ilə görüşüb.

Nazir Məmmədyarov Azərbaycanın regional təşkilat olaraq ATƏT ilə əməkdaşlığa mühüm əhəmiyyət verdiyini bildirib.

ATƏT çərçivəsində təhlükəsizliyin bölünməzliyinin fundamental prinsip olduğunu deyən Elmar Məmmədyarov bütün üzv dövlətlərin Helsinki Yekun Aktı üzrə öhdəliklərinə sadiq olmasının vacibliyini bildirib.

"Ermənistan Respublikası ATƏT-ə üzv dövlət qismində Helsinki Yekun Aktı ilə üzərinə götürdüyü öhdəliklərini kobud şəkildə pozaraq, gücdən istifadə etməklə Azərbaycanın Dağlıq Qarabağ və ətraf regionlarının işğalını davam etdirir. ATƏT Ermənistan-Azərbaycan münaqişəsinin həlli ilə məşğul olan qurum kimi işğala əsaslanan status-kvonun dəyişdirilməsi və Ermənistan qoşunlarının Azərbaycanın işğal olunmuş ərazilərindən çıxarılması üçün səylərinin artırmalıdır", deyə nazir qeyd edib.

Elmar Məmmədyarov əlavə edib ki, Ermənistan silahlı qüvvələrinin Azərbaycanın işğal olunmuş ərazilərində qanunsuz mövcudluğu regional sülh və təhlükəsizlik üçün başlıca təhdid olaraq qalmaqdadır.

Nazir ATƏT-in Minsk Qrupunun həmsədrlərinin mandatını BMT Təhlükəsizlik Şurasının qətnamələri, Helsinki Yekun Aktı təşkil etdiyini xatırladıb və Azərbaycanın münaqişənin həllində irəliləyişə nail olmaq və regionda davamlı, ədalətli sülhü təmin etmək üçün substantiv və intensiv danışıqlara hazır olduğunu bildirib.

Görüşdə həmçinin Azərbaycandan keçən nəqliyyat marşrutlarına, iqtisadi əlaqələrə də toxunulub.

Görüşdə Azərbaycan və ATƏT arasında əməkdaşlıq proqramları nəzərdən keçirilib. -03D-