Hərbi yarışmada Rusiya 1-ci, Azərbaycan 2-ci olub

Bakı/05.08.17/Turan:Bakının ev sahibliyi etdiyi "Dəniz kuboku - 2017" müsabiqəsində avqustun 5-də "Üzən minaya artilleriya atışı" üzrə yarışlar davam etdirilib. Bu haqda Müdafiə Nazirliyi xəbər verir.

Xəbərdə bildirilir ki, yarışlarda Rusiyalı hərbçilər üstünlük qazanıblar.

"Beynəlxalq hakimlər briqadasının qərarına görə bu epizodun yerinə yetirilməsinin nəticələrinə əsasən, birinci yerə 50 xalla Rusiyanın "Qrad Sviyajsk" kiçik raket gəmisinin ekipajı layiq görülüb. İkinci yerə isə 48 xalla Azərbaycanın "G-124" gözətçi gəmisinin ekipajı çıxıb", nazirlik bildirir.

Yarışmanın qeyd olunan kateqoriyası üzrə üçüncüsü 46 xalla Qazaxıstanın "Sarıarka" raket artilleriya gəmisinin ekipajı olub.

Dördüncü pilləyə 44 xalla İranın "Cövşən" raket katerinin ekipajı layiq görülüb.

Bakının ev sahibliyi etdiyi "Dəniz kuboku - 2017" müsabiqəsi avqustun 1-də başlayıb. Hərbi yarışma ayın 11-dək sürəcək.

İyulun 23-ü Rusiya Hərbi Dəniz Donanmasının Xəzər flotiliyasının "Qrad Sviyajsk" kiçik raket və "SB-45" xilasetmə yedək gəmisi yarışda iştirak etmək məqsədilə Bakıya gəlib.

İran Hərbi Dəniz Qüvvələrinin "Peykan", "Cövşən" raket katerləri və Qazaxıstan Hərbi Dəniz Qüvvələrinin "Qazaxıstan", "Sarıarka" raket-artilleriya, "Jayık" hidroqrafiya gəmiləri də yarışmada iştirak etmək üçün Bakıdadır.

Yarışlarda Azərbaycan, Rusiya, İran və Qazaxıstanın hərbi gəmiləri iştirak edir.