"Şuşa" sözündən istifadəyə məhdudiyyət tətbiq edilir

Bakı/27.04.22/Turan: Aprelin 26-da Milli Məclisin plenar iclasında "Azərbaycanın mədəniyyət paytaxtı - Şuşa şəhəri haqqında" qanuna dəyişiklik layihəsi birinci oxunuşda qəbul edilib.

Layihəyə əsasən, müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilən hallar istisna olmaqla, hüquqi şəxslərin, o cümlədən media subyektlərinin adlarında, mükafatların və təltiflərin adlarında, yerli, ölkə və ya beynəlxalq səviyyəli tədbirlərin, o cümlədən idman və digər yarışların, konsertlərin, festivalların, sərgilərin, konfransların, seminarların adlarında, kommersiya və reklam məqsədilə, əmtəə nişanlarında və coğrafi göstəricilərdə "Şuşa" sözündən istifadəyə yalnız müvafiq icra hakimiyyəti orqanının müəyyən etdiyi qurumun razılığı ilə yol verilir.

Milli Məclisin deputatı, Yeni Azərbaycan Partiyasının üzvü Mahir Abbaszadə Turan-a bildirib ki, Şuşa adından xüsusilə Şuşa işğal altına düşəndən sonra oradan məcburi köçkün düşən insanlar sahibkarlıq fəaliyyəti ilə məşğul olduqları müddətdə istifadə ediblər.

"Bəlkə də o zamanlarda bu addan istifadə məcburi köçkün düşmüş insanlar üçün bir təsəlli idi. Çünki hamının içərisində bir Şuşa həsrəti var idi".

Onun sözlərinə görə, Şuşa adından istifadə edən sahibkar subyektlərin böyük əksəriyyəti ya Şuşadan məcburi köçkün düşmüş, ya da Şuşa kökənli insanlarındır.

"Mənə elə gəlir ki, bu qəbul olunmuş qanunu onlar da normal anlayacaqlar. Çünki artıq bizim o Şuşa həsrətimizə son qoyulub və ona görə də biz artıq bundan sonra Şuşa ilə bağlı olan arzularımızı məhz elə Şuşanın özündə inkişaf etdirməliyik".

Müsavat Partiyasının başqanı Arif Hacılı bildirib ki, hər bir vətəndaş, iş adamı Şuşa şəhərinin adından istifadə edib müəyyən iş qurursa və bu adını təbliğ edirsə, bu, yalnız təqdirəlayiqdir.

"Bu, Azərbaycan xalqının mədəniyyət beşiyi olan Şuşaya sevgisinin göstəricisidir".

Onun fikrincə, nəzərə almaq lazımdır ki, ermənilər də Şuşa adından bir az təhrif olunmuş şəkildə istifadə edirlər.

"Bu baxımdan, Şuşa adının istifadəsinə məhdudiyyətlərin qoyulması yanlış qərardır".

Partiya rəhbəri hesab edir ki, təkcə Şuşa adına yox, bütövlükdə Şuşaya və digər işğaldan azad olunmuş ərazilərdə Azərbaycan xalqının məskunlaşması, orada iş yerlərin açılması, kənd təsərrüfatının inkişaf etdirilməsi kimi məsələlərə də məhdudiyyətlər qoyulub.

"Sanki hökümət Şuşaya, Şuşa adına, işğaldan azad olunmuş bütün ərazilərə yalnız özünə məxsus olan bir dəyər kimi yanaşır. Şuşa adından istifadə olunmasına məhdudiyyət qoyulması bu istəkdən irəli gəlir", deyə o qeyd edib.

Xatırladaq ki, Bakıda Şuşa restoranlar şəbəkəsi, Şuşa kinoteatrı, xeyriyyə cəmiyyətləri, şadlıq sarayı və digər ictimai obyektlər var. -0-