3 yanvar boşanmalar üçün ən məşhur gündür

Boşanma prosesləri üzrə vəkillər  3 yanvar tarixini cütlər arasında boşanma üçün ən məşhur gün adlandırırlar. Nikahda münasibətlər üzrə psixoloq və “My Wife Doesn’t Love Me Any More: Love Coach Guide To Winning Her Back” kitabının müəllifi Endryu Marşal DailyMail-də yazır ki, məhz bu gün –yenidən birləşmə ümidi olan və doğrulmayan bayramlardan dərhal sonra cütlər qəti boşanma qərarı verirlər.

Yeri gəlmişkən, “cütlər” demək yanlışdır. Marşal yazır ki, boşanma hadisələrinin 68%-də qadınlar, 4%-də kişilər və cəmi 28%-də hər iki tərəf təşəbbüskar olur. 

“30 illik təcrübəm ərzində müşahidə edirəm ki, kişilər nəinki bu gün hər şeyin bitməsinə hazır deyillər, həm də çox vaxt ümumiyyətlə problem olduğunu görmürlər”, deyən Marşal əlavə edir ki, kişilər üçün qərar çox vaxt sürpriz olur. O, göylərdə uçan yarısına diqqətli olmağı tövsiyə edir, çünki bu halda həyəcan siqnalları hər zaman göz önündədir.

Psixoloq həyat yoldaşı yenicə boşanma sənədləri verən müştərisi Martinin sözlərindən sitat gətirir: Təəccüblü deyil ki, Keti (həyat yoldaşı) nikahda boğulduğunu hiss edirdi. Mən heç vaxt ondan nə etmək istədiyini və özünü necə hiss etdiyini soruşmurdum. O isə, onun fikrincə, mənim istədiklərimi edirdi”.

Beləliklə, Keti hamının xoşbəxt olması üçün öz hisslərini və fikirlərini basdırdı, bütün problemlər də bundan irəli gəldi. Məyusluq və kin kimi neqativ emosiyaları özünə qadağan edən insan hisslərini (hətta sevgi kimi hissi) əks istiqamətə çevirmək riski ilə üz-üzə qalır. Keti və Martin terapevtə getməyə, öz hissləri haqqında danışmağa davam edirdilər, onların münasibətləri yaxşılaşdı və cüt yenidən birləşməyi qərara aldı.

“Bu göstərir ki, “Səni sevirəm” sözləri heç də həmişə “Heç vaxt səni daha çox sevə bilmərəm” demək deyil”, deyən Marşal əlavə edir ki, boşanmanı gözləmədən, nikahda münasibətlər üzərində işləmək daha yaxşı olardı.

Marşal nikahın pozulmasında daha böyük problemi kişilərdə görür və məhz onlara addım atmağı məsləhət görürsə, Huffington Post müəllifi Lora Doyl hesab edir ki, günah məhz qadınlardadır. O, qadınların səhv etdiyi beş əsas məqamı qeyd edir: qadınlar həyat yoldaşlarının onları daha xoşbəxt etmək səylərini rədd edir; evdə özlərini işdəki kimi aparır; intim münasibətlərdən imtina edir; problemin həlli mümkün olduğu halda boşanmaya təşəbbüs edir; həyat yoldaşının düzəlməsini gözləyir. Doyl qadınlara “Six Lessons for Lasting Love” kitabını oxumağı tövsiyə edir. Bu kitabda o, qadınların ailə münasibətləri üzərində necə işləməli olduğunu açıqlayır.

Bunları oxuyacaqsınız və deyəcəksiniz ki, bu axı Qərbdə belədir. Bəs bizdə necədir? Nikahların əksəriyyətində, əlbəttə ki, problemlər var, amma onları kim həll edəcək? Yox, yaxşısı budur gəlin belə sual edək: ümumiyyətlə kim problem olduğunu etiraf edir? Problem olduğunu dərk etsə belə, kim ikinci yarısı ilə onları müzakirə edir?

Bəs bizim aramızda ailə psixoloqlarına gedən var? Ölkənizdə orta statistik ailənin cibinə uyğun kifayət qədər ailə psixoloqları varmı? Yox, yox, yox, bir daha yox. Kişi çayxanada dostları ilə oturdu, qadın da telefonla rəfiqəsinə ağladı, bu da terapiya.

Nəticədə problemlər və  deməli ailədə böhran çoxalır. Maraqlıdır ki, əvvəllər Azərbaycan ailəsi, xüsusən qadın üçün boşanma haram və rüsvayçılıq idi, indi isə boşanmaların sayı gündən günə artır. Dövlət Statistika Komitəsinin məlumatına görə, hər min nəfər əhaliyə 7,9 toy düşürsə, eyni sayda əhaliyə 8,1 boşanma düşür və getdikcə boşanma proseslərinin sayı artır.

Nə qədər bayağı səslənsə də, ailə cəmiyyətin nüvəsidir, ailəsiz cəmiyyət də olmaz. Yaxşı, bəs boşanma problemini necə həll edəcəyik, hansısa “milli” metodlar varmı? Bəlkə sizin öz sirləriniz var, paylaşın.